Read ewe Kronika I 27 Bible Online

Kronika I 27 - ewe bible

Kronika I 27

¹Esiawo nye Israel-viwo le woƒe xexlẽmewo nu, aƒekɔwo ƒe tatɔwo, ame akpewo kple ame alafawo ƒe amegãwo kpakple woƒe dɔdzikpɔlawo, amesiwo subɔ fia la, ha sia ha le eƒe ɖoɖo nu; wovana, eye wodzona dzinu sia dzinu le ƒe la me; ha sia ha le ame akpe blave vɔ ene.

²Yasobeam, Zabdiel vi, le ha gbãtɔ nu le dzinu gbãtɔ me; eƒe ha la le ame akpe blave vɔ ene.

³Etso Perez-viwo dome, eye wònye aʋafiawo katã ƒe tatɔ le dzinu gbãtɔ me.

⁴Axoxitɔ Dodai le dzinu evelia ƒe ha nu, eye amegã Miklot le eƒe ha la me; eƒe ha la le ame akpe blave vɔ ene.

⁵Aʋafia etɔ̃lia, le dzinu etɔ̃lia me, enye Benaya, nunɔla Yoyada ƒe vi, eya nye tatɔ, eye eƒe ha la le ame akpe blave vo ene.

⁶Benaya sia enye kalẽtɔ le ame blaetɔ̃awo dome, eye wòle ame blaetɔ̃awo nu; evia Amizabad le eƒe ha la me.

⁷Enelia, le dzinu enelia me, enye Asahel. Yoab nɔvi, eye via Zebadya dze eyome; eƒe ha la le ame akpe blave vo ene.

⁸Atɔ̃lia, le dzinu atɔ̃lia me, enye amegã Samhut, amesi nye Yizraxitɔ; eƒe ha la le ame akpe blave vo ene.

⁹Adelia, le dzinu adelia me, enye Ira, Ikes vi, tso Tekoa; eƒe ha la le ame akpe blave vɔ ene.

¹⁰Adrelia, le dzinu adrelia me, enye Pelonitɔ Xelez tso Efrayim-viwo dome; eƒe ha la le ame akpe blave vo ene.

¹¹Enyilia, le dzinu enyilia me, enye Xusatitɔ Sibexai tso Zarxi viwo dome; eƒe ha la le ame akpe blave vɔ ene.

¹²Asiekelia, le dzinu asiekelia me, enye Anatotitɔ Abiezer tso Benyamin-viwo dome; eƒe ha la le ame akpe blave vɔ ene.

¹³Ewolia, le dzinu ewolia me, enye Netofatitɔ Maharai tso Zarxi viwo dome; eƒe ha la le ame akpe blave vɔ ene.

¹⁴Wuiɖekɛlia, le dzinu wuiɖekɛlia me, enye Piratonitɔ Benaya tso Efrayim-viwo dome; eƒe ha la le ame akpe blave vɔ ene.

¹⁵Wuievelia, le dzinu wuievelia me, enye Netofatitɔ Xeldai tso Otniel viwo dome, eƒe ha la le ame akpe blave vɔ ene.

¹⁶Amesiwo le Israel-toawo nu, wonye esi: Eliezer, Zixri vi, enye Ruben-viwo ƒe amegã; Simeon-viwo tɔ enye Sefatya, Maaxa vi;

¹⁷Lewi-viwo tɔ enye Xasabya, Kemuel vi; Aron viwo tɔ enye Zadok;

¹⁸Yuda-viwo tɔ enye Elihu tso Dawid nɔviwo dome; Isaxar-viwo tɔ enye Omri, Mixael vi;

¹⁹Zebulon-viwo tɔ enye Yismaya, Obadya vi; Naftali-viwo tɔ enye Yerimot, Azriel vi;

²⁰Efrayim-viwo tɔ enye Hosea, Azazya vi; Manase-to afã la tɔ enye Yoel, Pedaya vi;

²¹Manase-to afã, si le Gilead la tɔ enye Ido, Zaxarya vi; Benyamin-viwo tɔ enye Yaasiel, Abner vi;

²²Dan-viwo tɔ enye Azarel, Yeroxam vi. Amesiawo nye Israel-toawo ƒe amegãwo.

²³Ke Dawid mexlẽ amesiwo xɔ ƒe blave kple amesiwo mekpɔ xɔ nenema haɖe o la, ɖe eme o, elabena Yehowa do ŋugbe be, yeawɔ Israel wòasɔ gbɔ abe dziƒoɣletiviwo ene.

²⁴Yoab, Zeruya vi, de asi wo xexlẽ me, ke mewu enu o, elabena eyatae dɔmedzoe va Israel dzi ɖo; eya ŋuti womede xexlẽme la fia Dawid ŋutinya me o.

²⁵Azmawet, Adiel vi, le fia la ƒe kesinɔnuwo nu, eye Yonatan, Uziya vi, le nusiwo wodzra ɖo ɖe agblewo, duwo, kɔƒewo kple mɔwo me la nu;

²⁶Ezri, Kelub vi, le agbledela, siwo ŋlɔa agble la nu;

²⁷Simei, Ramatitɔ, le weingblewo nu; eye Zabdi, Sifmitɔ, le wein, siwo wotsɔ tso weingblewo me dzra ɖo la nu.

²⁸Baal-Xanan, Gederitɔ, le amiti kple gboti, siwo wodo ɖe tagba la nu; eye Yoas le ami, siwo wodzra ɖo la nu:

²⁹Sitrai, Saronitɔ, le nyi, siwo ɖua gbe le Saron la nu; eye Safat, Adlai vi, le nyi, siwo le bali me la nu;

³⁰Obil, Ismaeltɔ, le kposɔwo nu; eye Yexdeya, Meronotitɔ, le tedzinɔwo nu;

³¹Yaziz, Hagritɔ, le alẽwo nu. Amesiawo katãe nɔ fia Dawid ƒe kesinɔnuwo nu.

³²Dawid tɔdia Yonatan enye adaŋudela, gɔmesese le esi, eye wonya agbalẽ me; Yexiel, Xaxmoni vi, le fiaviwo gbɔ;

³³Axitofel enye fia ƒe adaŋudela; Xusai, Arkitɔ, enye fia xɔlɔ̃.

³⁴Amesiwo kplɔ Axitofel ɖo, wonye Yoyada, Benaya vi, kple Abyatar; eye fia la ƒe aʋafia enye Yoab.