Read ewe Kronika II 10 Bible Online

Kronika II 10 - ewe bible

Kronika II 10

¹Eye Rexabeam yi Sixem, elabena Israel blibo la va Sixem, be woatsɔe aɖo fiae.

²Esime Yerobeam, Nebat vi la, see la, — elabena ele Egipte, afisi wòsi le fia Salomo nu yi — Yerobeam trɔ gbɔ tso Egipte.

³Eye wodɔ ame wòɖayɔe vɛ. Tete Yerobeam kple Israel blibo la va, eye woƒo nu kple Rexabeam bena:

⁴Fofowò na míaƒe kɔkuti la kpe, eyata ka fofowò ƒe dɔ sesẽ kple eƒe kɔkuti kpekpe, si wòɖo mía dzi la, dzi ɖe na mi, ekema miasubɔ wò.

⁵Eɖo ŋu na wo bena: Miva gbɔnye le ŋkeke etɔ̃ megbe! Eye dukɔ la dzo.

⁶Tete fía Rexabeam de adaŋu kple ame tsitsi, siwo nɔ fofoa Salomo ŋu le eƒe agbenɔɣi, gblɔ bena: Adaŋu ka miaɖo, be woatsɔ aɖo ŋu na dukɔ sia?

⁷Woɖo ŋu nɛ bena: Ne ekɔ dɔme ɖe dukɔ sia ŋu egbea, nèwɔ wo nyuie, eye neƒo nu kpli wo nyuie la, ekema woasubɔ wò ɖaa.

⁸Ke egbe ame tsitsiawo ƒe adaŋu, si woɖo nɛ la, eye wòɖade adaŋu kple ɖekakpui, siwo nye ehatiwo, eye wonɔa eŋu la,

⁹gblɔ na wo bena: Aɖaŋu ka miaɖo, ne miatsɔ aɖo ŋu na dukɔ, si va gblɔ nam bena: Ka kɔkuti, si fofowò ɖo mía dzi la dzi ɖe na mi?

¹⁰Tete ɖekakpui, siwo nye ehatiwo la, ɖo eŋu nɛ bena: Ale naɖo ŋu na dukɔ, si va gblɔ na wò bena: Fofowò na míaƒe kɔkuti kpe, eyata ka edzi ɖe na mí la, ahagblɔ na wo enye si: Nye asibide kɔtoetɔ tri wu fofonye ƒe ali.

¹¹Fofonye tsɔ kɔkuti kpekpe ɖo mia dzi, ke nye la mana miaƒe kɔkuti la nakpe ɖe edzi na mi: fofonye ƒo mi kple atam, ke nye la maƒo mi kple dziɖegbe!

¹²Le ŋkeke etɔ̃agbe la Yerobeam kple dukɔ blibo la va Rexabeam gbɔ, abe alesi fia la gblɔ bena: Miva gbɔnye le ŋkeke etɔ̃agbe ene.

¹³Eye fia la he nya sesẽ kpli wo. Fia Rexabeam gbe ame tsitsiawo ƒe aɖaŋu,

¹⁴eye wòƒo nu kpli wo le ɖekakpuiawo ƒe aɖaŋuɖoɖo nu bena: Fofonye na miaƒe kɔkuti kpe, ke nye la mana woakpe ɖe edzi na mi; fofonye ƒo mi kple atam, ke nye la maƒo mi kple dziɖegbe!

¹⁵Ale fia la meɖo to dukɔ la o, elabena Mawue trɔe alea, ne Yehowa nawɔ eƒe nya, si wògblɔ to Silotɔ Axiya dzi na Yerobeam. Nebat vi la dzi.

¹⁶Esi Israel blibo la kpɔ bena, fia la mese yewoƒe gbe o la, dukɔ la ɖo ŋu na fia la bena: Gome ka le Dawid gbɔ na mí, eye domenyinu ka le Isai vi la gbɔ na mi? Israel, amesiame neyi eƒe agbadɔ me! Azɔ Dawid, kpɔ wò aƒe gbɔ! Eye Israel blibo la yi woƒe agbadɔwo me.

¹⁷Ke Rexabeam ɖu fia ɖe Israel-vi, siwo le Yuda-duwo me la dzi.

¹⁸Eye fia Rexabeam da Hedoram, amesi le dɔwɔwɔ nu la, ɖo ɖa, ke Israel-viwo ƒu kpee woku. Tete fia Rexabeam wɔ kaba ɖo tasiaɖam hesi yi Yerusalem.

¹⁹Ale Israel ʋu le Dawid ƒe aƒe la gbɔ vaseɖe egbe.