Read ewe Kronika II 11 Bible Online

Kronika II 11 - ewe bible

Kronika II 11

¹Esi Rexabeam va Yerusalem la, eƒo Yuda kple Benyamin ƒe aƒe la nu ƒu, wole aʋawɔla tiatia akpe alafa ɖeka kple blanyi, ne woaɖawo aʋa kple Israel, eye woagbugbɔ fiaɖuƒe la na Rexabeam.

²Tete Yehowa ƒe gbe va Mawu ƒe ame Semaya gbɔ bena:

³Gblɔ na Yuda-fia Rexabeam, Salomo vi, kple Israel blibo, si nye Yuda kple Benyamin bena:

⁴Ale Yehowa gblɔ esi: Migaho yi ɖawɔ aʋa kple mia nɔviwò o, mia dome amesiame negbugbɔ yi eƒe me, elabena gbɔnye nya sia tso! Tete woɖo to Yehowa ƒe gbe hegbugbɔ, eye wodzudzɔ aʋahoho ɖe Yerobeam ŋu.

⁵Eye Rexabeam nɔ Yerusalem, eye wòtso du sesẽwo ɖe Yuda

⁶Etso Betlexem, Etam, Tekoa,

⁷Bet-Zur, Soxo, Adulam,

⁸Gat, Maresa, Zif,

⁹Adorayim, Laxis, Azeka,

¹⁰Zora, Ayalon kple Xebron, siwo le Yuda kple Benyamin, wòzu du sesẽwo.

¹¹Ewɔ mɔ siawo sesĩe, eɖe aʋafiawo ɖo wo me, eye wòdzra nuɖuɖu, ami kple wein ɖo ɖe wo me;

¹²eda akpoxɔnuwo kple akplɔwo ɖe du sia du me, eye wòna wòzu du sesẽ ŋutɔwo. Yuda kple Benyamin nye etɔ.

¹³Eye nunɔlawo kple Lewi-viwo, siwo le Israel bliboa la, tso woƒe anyigbawo katã dzi va egbɔ;

¹⁴elabena Lewi-viwo gblẽ woƒe duwo kple woƒe anyigbawo ɖi heʋu va Yuda kple Yerusalem, elabena Yerobeam kple viawo nyã wo, be womaganye nunɔlawo na Yehowa o.

¹⁵Ke eya ŋuta ɖo nunɔlawo na nuxeƒewo kple azizãwo kpakple nyivi, siwo wòwɔ.

¹⁶Eye amesiwo ƒe dzi le Yehowa, Israel ƒe Mawu la, dim la, tso Israel-toawo katã me dze wo yome va Yerusalem, ne woasa vo na Yehowa, wo fofowo ƒe Mawu la.

¹⁷Woawoe ti ke Yuda-fiaɖuƒe la, eye wodo ŋusẽ Rexabeam, Salomo vi la, ƒe etɔ̃; elabena woto Dawid kple Salomo ƒe ʋe me ƒe etɔ̃.

¹⁸Eye Rexabeam ɖe Maxalat, Dawid vi Yerimot ƒe vinyɔnu, kple Abixayil, Isai vi Eliab ƒe vinyɔnu;

¹⁹eya dzi ŋutsuviwo nɛ, siwo nye: Yeus, Semarya kple Zaham.

²⁰Eyome wòde Absalom vinyɔnu Maaxa; eya dzi Abiya, Atai, Ziza kple Selomit nɛ.

²¹Eye Rexabeam lɔ̃ Absalom vinyɔnu Maaxa wu srɔ̃awo kple eƒe ahiãwo katã, elabena eɖe srɔ̃ wuienyi, eye wòdze ahiã blaade, eye wòdzi ŋutsuvi blave vɔ enyi kple nyɔnuvi blaade.

²²Eye Rexabeam tsɔ Abiya, Maaxa vi, ɖo tame le nɔviawo dome, elabena edi be, yeatsɔe aɖo fiae.

²³Eye wòdze aɖaŋu hemã viawo katã ɖe du sesẽawo katã me le Yuda kple Benyamin ƒe anyigbawo katã dzi, ena nuɖuɖu wo kpaŋkpaŋ, eye, wòɖe srɔ̃ geɖe na wo.