Read ewe Kronika II 24 Bible Online

Kronika II 24 - ewe bible

Kronika II 24

¹Yoas xɔ ƒe adre, esime wòzu fia, eye woɖu fia ƒe blane le Yerusalem. Dadaa ŋkɔ nye Zibya tso Beer-Seba.

²Eye Yoas wɔ nusi dze Yehowa ŋu le nunɔla Yoyada ƒe agbenɔɣi katã.

³Eye Yoyada ɖe srɔ̃ eve ne, eye wòdzi ŋutsuviwo kple nyɔnuviwo.

⁴Le nusiawo megbe la Yoas ɖo ɖe ta me be, yeaɖɔ Yehowa ƒe aƒe la ɖo.

⁵Eye wòƒo nunɔlawo kple Lewi-viwo nu ƒu gblɔ na wo bena: Miyi Yuda-duwo me, eye midzɔ ga le Israel blibo la si ƒe sia ƒe, ne miatsɔ aɖo mia Mawu ƒe aƒe la ɖo. Mitsɔ dzo ɖe nusiawɔwɔ ŋu! Ke Lewi-viwo metsɔ dzo ɖe eŋu o.

⁶Tete fia la yɔ Yoyada, si nye tatɔ la, eye wògblɔ nɛ bena: Nukaŋuti meɖi tso Lewi-viwo si be, woaɖaxɔ Yehowa ƒe dɔla Mose ƒe adzɔ, si wòɖo na Israel ƒe ameha la ɖe Mawu ƒe agbadɔ la ŋu la, tso Yuda kple Yerusalem si oa?

⁷Elabena Atalya baɖa ma ƒe viwo gbã Mawu ƒe aƒe la, eye wotsɔ Yehowa ƒe aƒe la ƒe nunana kɔkɔewo katã wɔ Baal tɔe.

⁸Tete fia la de se be, woawɔ aɖakaa ɖe, eye wotsɔe ɖa ɖe Yehowa ƒe aƒe la ƒe agbo nu le egodo.

⁹Eye wòna woɖe gbe ƒã le Yuda kple Yerusalem be, woatsɔ Mawu ƒe dɔla Mose ƒe adzo, si wòɖo na Israel le gbe dzi la, vɛ na Yehowa.

¹⁰Tete amegãwo katã kple dukɔ blibo la kpo dzidzɔ, eye wotsɔe va ko ɖe aɖaka la me, vaseɖe esime wòyɔ.

¹¹Ne wokpɔ be, ga la sɔ gbɔ la, ekema Lewi-viwo tsɔa aɖaka la yia amesi fia la ɖo la gbɔ, eye fia ƒe agbalẽŋlɔla kple nunɔlagã ƒe dɔwɔla vana, eye wotrɔnɛ le aɖaka la me gatsɔnɛ ɖadana ɖe eteƒe. Alea wowɔe gbesiagbe, eye woƒo ga geɖe nu ƒu.

¹²Eye fia la kple Yoyada wotsɔ wo na Yehowa ƒe aƒe la ƒe dɔnunɔlawo, eye woɖatsɔ kpefulawo kple atikpalawo, ne woaɖɔ Yehowa ƒe aƒe la ɖo hekpe ɖe gayibɔ- kple akɔblidɔwɔlawo ŋu, ne woaɖɔ Yehowa ƒe aƒe la do.

¹³Esi dɔnunɔlawo lé dɔa me la, dɔ la de ŋgɔ to wo si me, eye wogaɖɔ Mawu ƒe aƒe la ɖo wòɖo eƒe nɔnɔme, eye wowɔe asi te eŋu.

¹⁴Ke esi wowɔe vo la, wotsɔ ga susɔea na fia la kple Yoyaɖa, eye wotsɔe wo Yehowa ƒe aƒe la me nuwo, subɔsubɔdɔwɔnuwo kple vɔsanuwo, trewo, sikanuwo kple klosalonuwo. Ale wosa numevɔ le Yehowa ƒe aƒe la me ɖaa le Yoyada ƒe agbenɔɣi katã.

¹⁵Yoyada tsi, eye agbe tii, eye woku; exɔ ƒe alafa ɖeka kple blaetɔ̃ hafi ku.

¹⁶Eye woɖii ɖe Dawid ƒe du la me ɖe fiawo gbɔ, elabena ewɔ nyui na Israel kple Mawu kpakple eƒe aƒe la.

¹⁷Le Yoyada ƒe ku megbe la Yuda-amegãwo va de ta agu na ha la, eye fia la ɖo to woƒe gbe.

¹⁸Wogblẽ Yehowa, wo fofowo ƒe Mawu ƒe aƒe la ɖi, eye wosubɔ Aserawo kple legbawo Tete dɔmedzoe va Yuda kple Yerusalem dzi le woƒe fɔɖiɖi sia ta.

¹⁹Eye wòɖo nyagblɔɖilawo ɖe wo gbɔ, be woatrɔ wo ɖe Yehowa ŋu, eye woxlɔ̃ nu wo, ke womeɖo to o.

²⁰Eye Mawu ƒe gbagba dze nunɔla Yoyada ƒe vi Zaxarya dzi, eye wòtsi tre ɖe dukɔ la ŋku me gblɔ na wo bena: Ale Mawu gblɔ esi: Nukaŋuti míeɖa Yehowa ƒe se dzi, ne dzɔgbenyuiea ɖeke maganɔ mia ŋu o? Esi miegblẽ Yehowa ɖi la, eyata eya hã gblẽ mi ɖi.

²¹Tete wobla ɖe eŋu, eye woƒu kpee le Yehowa ƒe aƒe ƒe xɔxɔnu, le fia la ƒe sedede nu.

²²Ke fia Yoas meɖo ŋku alesi fofoa Yoyada ve enu la dzi o, eye wowu via. Eye esi wòle kukum la, egblɔ be: Yehowa kpɔe, eye abia eta.

²³Le ƒe ɖeka megbe la Aramtɔwo ƒe aʋakɔ ho ɖe eŋu, eye wova Yuda kple Yerusalem, wowu dukɔ la ƒe amegãwo katã le dukɔ la dome, eye woɖo woƒe aboyonuwo katã ɖe Damasko-fia.

²⁴Aramtɔwo va kple aʋakɔ suea ɖe ko hafi, ke Yehowa tsɔ aʋakɔ gã ŋutɔ na wo, le esi wogblẽ Yehowa, wo fofowo ƒe Mawu la ɖi la. Eye wohe to na Yoas.

²⁵Eye esi wodzo le egbɔ la, — ele dɔ lém vevie, hafi wogblẽe ɖi, — eƒe dɔlawo bla ɖe eŋu le hlɔ̃, si wòɖo ɖe nunɔla Yoyada ƒe viwo ŋu la ta; eye wowui ɖe eƒe aba dzi. Ale woku, eye woɖii ɖe Dawid ƒe du la me, ke womeɖii ɖe fiawo ɖiƒe o.

²⁶Amesiwo bla ɖe eŋu la, wonye esi: Zabad, Amoni-nyɔnu Simeat ƒe vi, kple Yozabad, Moab-nyɔnu Simri ƒe vi.

²⁷Viaŋutsuwo kple nya gbogbo, siwo wogblɔ ɖe eŋu kpakple alesi wògbugbɔ Mawu ƒe aƒe la gɔme ɖo anyi la, woŋlɔ wo ɖe ŋutinya, siwo le fiawo ƒe agbalẽ me la me. Eye via Amazya zu fia ɖe eteƒe.