Read ewe Kronika II 8 Bible Online

Kronika II 8 - ewe bible

Kronika II 8

¹Le ƒe blave, siwo Salomo tsɔ tu Yehowa ƒe xɔ kple eya ŋuta ƒe xɔ megbe la,

²Salomo gbugbɔ du, siwo Xuram tsɔ nɛ la tso, eye wòna Israel-viwo nɔ afima.

³Eye Salomo ho yi ɖaxɔ Xamat-Zoba.

⁴Eye wòtso Tadmor le gbe dzi kple nudzraɖoƒedu, siwo katã wòtso ɖe Xamat.

⁵Etso Dzigbe-Bet-Xoron kple Anyigbe-Bet-Xo-ron wonye du sesẽwo, siwo ŋu woɖo gli ɖo, eye agbo kple gameti le wo nu.

⁶Etso Baalat kple nudzraɖoƒedu, siwo katã Salomo tso, kpakple tasiaɖamwo kple sɔdolawo ƒe duwo katã hekpe ɖe xɔ, siwo katã Salomo ɖi be, yeatu ɖe Yerusalem, Libanon kple eƒe fiaɖuƒe ƒe anyigba bliboa dzi la ŋuti.

⁷Dukɔ, siwo katã kpɔtɔ le Xititɔwo, Amoritɔwo, Perizitɔwo, Xiwitɔwo kple Yebusitɔwo dome, amesiwo metso Israel dome o la,

⁸woƒe vi, siwo kpɔtɔ ɖe anyigba dzi le wo megbe, amesiwo Israel-viwo metsrɔ̃ gbidigbidi o la, woawo Salomo tso wo yakadɔwɔlawoe vaseɖe egbe.

⁹Ke Salomo metso Israel-viwo dometɔa ɖeke wo kluvii ɖe eƒe dɔwɔwɔ ŋu o, ke boŋ woawo nye eƒe aʋawɔlawo tatɔwo kple tasiaɖamwo kple sɔdolawo ƒe amegãwo.

¹⁰Fia Salomo ƒe dɔdzikpɔlawo ƒe amegãwo le ame alafa eve kple blaatɔ̃, amesiwo kpɔa dukɔ la dzi.

¹¹Ke Salomo kplɔ Farao vinyɔnu la tso Dawid ƒe du la me yi xɔ, si wòtu nɛ la me, elabena egblɔ be: Srɔ̃nyea ɖeke manɔ Israel-fia Dawid ƒe me o, elabena kɔkɔeƒe wònye, le esi Yehowa ƒe aɖaka la va afima ta.

¹²Ɣemaɣi Salomo sa numevɔ na Yehowa le Yehowa ƒe vɔsamlekpui, si woɖi ɖe akpala la ŋgɔ la dzi,

¹³eye wosa vɔ le ŋkeke sia ŋkeke ƒe kɔa nu, le dzudzɔgbewo, dzinu yeyewo kple ŋkekenyuiewo dzi, zi etɔ̃ le ƒe ɖeka me, le abolo maʋamaʋã ŋkekenyuiewo, le kwasiɖawo ŋkekenyuiewo kple agbadɔŋkekenyuiewo dzi le Mose ƒe se la nu.

¹⁴Eɖo nunɔlawo ƒe hawo woƒe subɔsubɔdɔwo nu, le fofoa Dawid ƒe ɖoɖo la nu kple Lewi-viwo woƒe dɔwo nu, ne woakafu, eye woasubɔ le nunɔlawo gbɔ, le ŋkeke sia ŋkeke ƒe kɔa nu, kple agbonudzɔlawo ƒe hawo ɖe agbo sia agbo nu, elabena alea Mawu ƒe ame Dawid de se gblɔ.

¹⁵Eye womeɖe ɖeke le fia ƒe se, si woɖe ɖe nunɔlawo, Lewi-viwo kple nua wo katã kpakple nudzraɖoƒeawo ŋu la me o.

¹⁶Ale wowɔ Salomo ƒe dɔ blibo lae tso gbesigbe woɖo Yehowa ƒe xɔ la gɔme anyi, vaseɖe esime wowu enu; wowɔ Yehowa ƒe xɔ la ɖe mii keŋkeŋ.

¹⁷Ɣemaɣi Salomo ho yi Ezyon-Geber kple Elot, le ƒu nu le Edom-nyigba dzi.

¹⁸Eye Xuram tsɔ ʋuwo ɖe eƒe dɔlawo si ɖo ɖee hekpe ɖe ƒu ŋu dɔwɔlawo ŋu, eye woawo kple Salomo ƒe dɔlawo yi Ofir ɖatsɔ sika talento alafa ene blaatɔ̃ tso afima vɛ na fia Salomo.