Read ewe Ezra 1 Bible Online

Ezra 1 - ewe bible

Ezra 1

¹Le Persia-fia Kores ƒe ƒe gbãtɔ me la — ne Yehowa ƒe nya, si wògblɔ to Yeremya nu la, nava me — Yehowa nya Persia-fia Kores ƒe gbɔgbɔ, eye wòna woɖe gbe ƒã le eƒe fiaɖuƒe blibo la me, eye wòna woŋlɔ agbalẽ hã bena;

²Persia-fia Kores ƒe gbe enye si: Yehowa, dziƒo Mawu la, tsɔ anyigba dzi fiaɖuƒewo katã nam, eye wòde se nam be, matu xɔ na ye de Yerusalem le Yuda.

³Eyata mi eƒe dukɔ la dome amesiame neyi Yerusalem le Yuda, eye eƒe Mawu anɔ kplii, ne wòatu xɔ na Yehowa, Israel ƒe Mawu, si nye, Mawu le Yerusalem.

⁴Eye amesiwo tsi teƒe, siwo katã wole la, teƒe la nɔlawo natsɔ klosalo kple sika, kesinɔnu kple lãwo na wo akpe de nunana, siwo woana faa, ɖe Mawu ƒe aƒe, si le Yerusalem ŋu la ŋuti.

⁵Tete Yuda kple Benyamin ƒe aƒekɔwo, nunɔlawo kple Lewi-viwo, amesiame, si ƒe gbɔgbɔ Mawu nyɔ la, tso be, yewoayi aɖatu Yehowa ƒe xɔ le Yerusalem.

⁶Eye wo gbɔ nɔlawo katã tsɔ klosalonuwo kple sika, kesinɔnuwo kple lãwo kpakple nu xɔasiwo do alɔ na wo hekpe de nusiwo katã wona laa la ŋuti.

⁷Eye fia Kores tsɔ Yehowa ƒe aƒe ma nusiwo Nebukadnezar ɖafɔ tso Yerusalem heva da de eƒe mawuwo ƒe me la na.

⁸Persia-fia Kores na kesinɔnu dzikpɔla Mitredat de wo nu, eye wòxlẽ wo na Yuda ƒe amegã Sesbazar.

⁹Woƒe xexlẽme enye si, sikagba blaetɔ̃ kple klosalogba akpe ɖeka, hɛ blave vɔ asieke,

¹⁰sikakplu blaetɔ̃, klosalokplu ha evelia tɔwo alafa ene kple ewo kpakple nu bubuwo akpe ɖeka.

¹¹Sikanuawo kple klosalonuawo kalã le akpe atɔ̃ alafa ene; Nusiawo katã Sesbazar tsɔ gbɔe, esime aboyomeawo tso Babel va Yerusalem.