Read ewe Ezra 4 Bible Online

Ezra 4 - ewe bible

Ezra 4

¹Ke esi Yuɖa kple Benyamin ƒe ketɔwo se be, aboyoviwo le gbedoxɔ tum na Yehowa, Israel ƒe Mawu la,

²wova Zerubabel kple aƒekɔwo ƒe lalɔwo gbɔ gblɔ na wo bena; Míawo hã míatui kpli mi, elabena míele mía Mawu la dim abe míawo ke ene, eye eya míele vɔ sam na tso gbesigbe Asur-fia Asar-Xadon kple mi va afisiae la.

³Tem Zerubabel kple Yesua kpakple Israel ƒe aƒekɔwo ƒe tatɔ mamleawo ɖo ŋu na wo bena: Medze be, mía kpli miawo míatu xɔ na mia Mawu la o, ke boŋ míawo ɖeɖe míatui na Yehowa, Israel ƒe Mawu la, abe alesi Persia-fia Kores de se na mi ene.

⁴Eye anyigba dzi dukɔ la do alogblɔdɔ Yuda-dukɔ la, eye wodo ŋɔdzi na wo le xɔ la tutu me.

⁵Wode aɖaŋuɖolawo ɖewo ŋu, be woagblẽ woƒe tameɖoɖo la me, tso Persia-fia Kores ƒe agbenɔɣi katã vaseɖe Persia-fia Dario ƒe fiaɖuɖu me.

⁶Esi Axasweros le fia ɖum la, woŋlɔ agbalẽ tso Yudatɔwo kple Yerusalemtɔwo nu le eƒe fiaɖuɖu ƒe gɔmedzedzea me.

⁷Le Artaxsasta ŋɔli la Bislam, Mitredal, Tabeel kple wo nɔvi mamleawo ŋlɔ agbalẽ ɖo ɖe Persia-fia Artaxsasta. Woŋlɔ agbalẽ la ɖe Aramgbe me eye woɖe egɔme ɖe Persia-gbe me.

⁸Aɖaŋumegã Rexum kple agbalẽŋlɔla Simsai woŋlɔ agbalẽ ɖe Yerusalem ŋuti ɖo ɖe fia Artaxsasta bena:

⁹Aɖaŋumegã Rexum kple agbalẽŋlɔla Simsai kpakple wo nɔvi mamleawo, siwo tso Dina, Afarsatax, Tarpal, Afarsa, Arkewa, Babel, Susan, Deha kple Elam,

¹⁰hekpe ɖe dukɔ bubu, siwo fia ga Asnapar, amesi ŋu bubu le, kplɔ va ɖo Samaria-ɖu me kple anyigba bubu, siwo le tɔsisi la ƒe go keme dzi, kple nya bubuwo. —

¹¹Agbalẽ, si woŋlɔ ɖo ɖe fia Artaxsasta la me nya enye si: Wò dɔlawo, ŋutsu, siwo le tɔsisi la ƒe go keme dzi, kple nya bubuwo.

¹²Fia la nanyae be, Yudatɔ, siwo tso gbɔwò va mia gbɔ le Yerusalem la, gale du dzeaglã vɔ̃ɖi la tsom, wole gliawo nu flɔm, eye wole woƒe anyinɔwo ɖɔm ɖo.

¹³Azɔ fia la nanyae be, ne wotso du sia, eye woflɔ gliawo nu la, ekema woagbe nudzɔdzɔ, adzɔ kple mɔtaho nana, eye mlɔe ke la woade fiawɔ bla me.

¹⁴Eyata esi wonye míawoe ɖua fiasã me dze, eye medze be, míanɔ fia ƒe ŋukpe kpɔm o la, eyaŋuti míele ame ɖom ɖa, ne míana fia la nanyae;

¹⁵elabena ne wodzro fofowòwo ƒe nyadzɔdzɔgbalẽ me la, ekema akpɔe le nyadzɔdzɔgbalẽ la me, adze sii be, du sia nye aglãdzedu, si be gbegblẽva fiawo kple anyigbawo dzi, eye wodzea aglã le eme tso gbaɖegbe ke; eyatae wogblẽ du sia ɖo.

¹⁶Eyata míele nanam fia la nanyae be, ne woagatso du sia, eye woflɔ gliawo nu la, ekema esia awɔ be, gomea ɖeke megana asiwò le tɔsisi la ƒe go keme dzi o.

¹⁷Tete fia la ɖo du ɖe adaŋumegã Rexum kple agbalẽŋlɔla Simsai kpakple wo nɔvi bubu, siwo le Samaria kple anyigba bubuwo dzi le tɔsisi la ƒe go keme dzi la bena: Ŋutifafa na mi! kple nya bubuwo.

¹⁸Agbalẽ, si míeɖo ɖe mí la, woxlẽe nam dedie.

¹⁹Eye meɖe se be, woadzro eme, eye wokpɔ be, du sia tsia tre ɖe fiawo ŋu tso gbaɖegbe ke, wowɔa ʋunyaʋunya, eye wodzea aglã le eme.

²⁰Fia sẽŋuwo nɔ Yerusalem, wokpɔ ŋusẽ ɖe anyigba siwo katã le tɔsisi la ƒe ɣetoɖoƒe gome la dzi, eye wona nudzɔdzɔ kple adzɔ kple mɔtaho wo.

²¹Eyata mide se, ne woaxe mɔ na ŋutsuawo, be womagatso du sia o, vaseɖe esime made se hafi.

²²Eyata mikpɔ nyuie, ne miagawɔ ƒome le nusia me, be gbegblẽ la nadzi de dzi, eye wòazu hlã na fiawo o.

²³Esi wonya xlẽ Artaxsasta ƒe agbalẽa me nya na Rexum kple agbalẽŋlɔla Simsai kpakple wo nɔviwo la, wowɔ kplakplakpla yi Yudatɔwo gbɔ le Yerusalem, eye wotsɔ sesẽ xe mɔ na wo.

²⁴Yemaɣi wodzudzɔ Mawu ƒe xɔdɔ la le Yerusalem, eye wòtsi anyi vaseɖe Persia-fia Dario ƒe fieɖuɖu ƒe ƒe evelia me.