Read ewe Ezra 9 Bible Online

Ezra 9 - ewe bible

Ezra 9

¹Eye esi wowu nusiawo nu vɔ la, amegãwo va gbɔnye gblɔ bena: Israel-dukɔ la, nunɔlawo kple Lewi-viwo meɖe wo ɖokui ɖa tso anyigba dzi dukɔ, siwo nye Kanaanitɔwo, Xititɔwo, Perizitɔwo, Yebusitɔwo, Amonitɔwo. Moabitɔwo, Egiptetɔwo kple Amoritɔwo ƒe ŋunyɔnuwo me o;

²elabena woawo ŋutɔwo kple wo viŋutsuwo ɖe srɔ̃ tso woƒe nyɔnuviwo dome, ale be ƒome kɔkɔe la tsaka kple anyigba dzi dukɔawo, eye amegãwo kple dzikpɔlawo ƒe asiwo do ŋgɔ le nu tovo sia wɔwɔ me.

³Esi mese nya siawo la, medze nye awuwo kple nye awu ʋlaya, mekaka nye taɖa kple nye ge, eye mebɔbɔ nɔ anyi de kɔ to.

⁴Eye amesiwo katã vɔvɔ̃ ɖo le Israel ƒe Mawu ƒe nya, siwo wògblɔ ɖe aboyomeawo ƒe nu tovo wɔwɔ ŋu la, kpe ta ɖe gbɔnye, eye mebɔbɔ nɔ anyi de kɔ to, vaseɖe esime fiẽnuɖuvɔsaɣi ɖo.

⁵Eye esi wole fiẽnuɖuvɔ sam la, metsi tre tso nye nuxaxa me, eye nye awu kple nye awu ʋlaya la dzedze, eye medze klo heke nye abɔwo me na Yehowa, nye Mawu la,

⁶gblɔ bena: Nye Mawu, ŋu le kpeyem ŋutɔ, be mawu mo dzi na wo, nye Mawu: elabena míaƒe vodadawo gbɔ mía ta, eye míaƒe fɔɖiɖiwo kɔ yi ɖatɔ keke dziƒo ke.

⁷Tso mía fofowo ŋɔli ke míeda vo geɖe vaseɖe egbe, eye le míaƒe fɔɖiɖi ta wotsɔ mía kple míaƒe fiawo kple míaƒe nunɔlawo de asi na anyigba dzi fiawo, na yi kple aboyoɖeɖe, na haha kple ŋukpedodo, abe alesi wògale egbe siawo ko ene.

⁸Azɔ Yehowa, mía Mawu, ve mía nu vie, ekpɔtɔ ame susɔea ɖewo ɖi na mi, eye wona agbadɔtsyoti mi le eƒe nɔƒe kɔkɔe la, ne mía Mawu nana míaƒe ŋku dzi nakɔ, eye wòakpe ɖe mía ŋu míanɔ agbe vie le miaƒe kluvinyenye me.

⁹Elahena kluviwo míenye, ke mía Mawu megblẽ mí ɖi ɖe míaƒe kluvinyenye la me o, ke boŋ eve mía nu le Persia-fiawo ŋku me, ne woana agbe naɖo mía me, ne míatu mía Mawu le xɔ la, eye míaɖɔ eƒe gli gbagbãwo ɖo, eye gli nano mia si le Yuda kple Yerusalem.

¹⁰Azɔ mía Mawu, aleke gblɔ ge míala le nusiawo megbe? Elabena míegblẽ wò seawo ɖi,

¹¹se, siwo neɖe to wò dɔla nyagblɔɖilawo dzi gblɔ bena: Anyigba, si dzi mieva, be miaxɔe woanye mia tɔ la, anyigba makɔmakɔ wònye to anyigba dzi dukɔwo ƒe nu makɔmakɔ wɔwɔ me, elabena wotsɔ woƒe ŋunyɔnuwo kple woƒe nu makɔmakɔwo na wòyɔ tso go ɖeka yaseɖe go keme

¹²Eyata migatsɔ mia vinyɔnuwo na woƒe viŋutsuwo o, eye migaɖe woƒe vinyɔnuwo na mia viŋutsuwo o; migadi woƒe ŋutifafa kple woƒe nyui tegbee o, ne ŋusẽ naɖo mia ŋu, eye miaɖu anyigba dzi nu nyuitɔwo, eye miagblẽe ɖi na mia viŋutsuwo wòanye wo tɔ tegbee.

¹³Le nusiwo katã va mia dzi le míaƒe nuwɔwɔ vɔ̃ɖiwo kple miaƒe fɔɖiɖi gã ta la megbe la, elabena to míaƒe dzidadawo gbɔ hã la èkpɔtɔ ame ʋeea ɖewo ɖi na mí…

¹⁴ɖe míagada wò seawo dzi, eye míado ƒome kple dukɔ nyɔŋuwoa? Ɖe màdo dɔmedzoe ɖe mía ŋu, vaseɖe esime miatsrɔ̃ avɔ, eye amea ɖeke makpɔtɔ alo asi oa?

¹⁵Yehowa, Israel ƒe Mawu, enye dzɔdzɔetɔ, elabena míawoe nye ame susɔeawo, siwo kpɔtɔ ɖi, abe alesi wòle egbe siawo ene. Kpo ɖa, míele míaƒe fɔɖiɖiwo me le ŋkuwò me, elabena míate ŋu anɔ te ɖe nuwò le esia ta o.