Read ewe Nexemya 8 Bible Online

Nexemya 8 - ewe bible

Nexemya 8

¹Esi Israel-viwo le woƒe duwo me, eye dzinu adrelia do la, dukɔ blibo la ƒo ƒu sɔsɔe ɖe dogba dzi de tsigbo la nu; eye wogblɔ na agbalẽfiala Ezra bena, wòatsɔ Mose ƒe se, si Yehowa de na Israel la ƒe agbalẽ va.

²Tete nunɔla Ezra tsɔ se la va ameha la, ŋutsuwo kple nyɔnuwo siaa kpakple amesiame, si ale ŋu ase egɔme la ŋku me le dzinu adrelia ƒe ŋkeke gbãtɔ dzi.

³Eye wòxlẽe le dogba dzi le tsigbo la nu le ŋutsuwo kple nyɔnuwo kpakple amesiwo ate ŋu ase egɔme la ŋku me tso ŋdi kanya, vaseɖe esime ɣe ɖo ta, eye dukɔ blibo la ƒe to le te ɖe segbalẽ la ŋu.

⁴Agbalẽfiala Ezra tsi tre ɖe kɔkɔƒe, si wotsɔ ʋuƒo wɔe ɖe nusiawo tɔgbe ŋu, eye Matitya, Sema, Anaya, Uriya, Xilkiya kple Maaseya wotsi tre ɖe exa le ɖusi me, eye Pedaya, Misael, Malkiya, Xasum, Xasbadana, Zaxarya kple Mesulam wole eƒe mia me.

⁵Eye agbalẽfiala Ezra ʋu agbalẽ la le dukɔ blibo la ŋku me, elabena ekɔ de dzi wu dukɔ blibo la; eye esi wòʋui la, dukɔ blibo la tsi tre.

⁶Ezra kafu Yehowa, Mawu gã la, eye dukɔ blibo la wu asi dzi heɖo ŋu bena: Neva me! Neva me! Wobɔbɔ hede ta agu de Yehowa ŋku me, eye wotsyɔ mo anyi.

⁷Dukɔ la tsi wo teƒe, eye Yesua. Bani, Serebya, Yamin, Akub, Sabetai, Hodiya, Maaseya, Kelita, Azarya, Yozabad, Xanan, Pelaya kple Lewi-viwo wode se la me na dukɔ la.

⁸Woxlẽ Mawu ƒe segbalẽ la eme kɔ, eye woɖe eme, ale be wose nusi woxlẽ la gɔme.

⁹Tete anyigba dzikpɔla Nexemya kple nunɔla Ezra, amesi nye agbalẽfiala, kpakple Lewi-vi, siwo le eme ɖem na dukɔa la, gblɔ na dukɔ blibo la bena: Ŋkeke sia ŋu kɔ na Yehowa, mia Mawu la, migaxa nu o, eye migafa avi o! Elabena dukɔ blibo le avi fam, esime wose se la me nyawo.

¹⁰Eye wògblɔ na wo bena: Miyi, ne miaɖu aminu, eye miano aha vivi, eye miɖo ɖe de amesiwo si ɖeke mele o la, elabena ŋkeke sia ŋu kɔ na mia Aƒetɔ la, migaxa nu o; elabena dzidzɔkpɔkpɔ ɖe Yehowa ŋu enye miaƒe mɔ̃ sesẽ.

¹¹Eye Lewi-viwo la akɔ na dukɔ blibo la gblɔ bena: Mizi ɖoɖoe, elabena ŋkeke sia ŋu kɔ; eye migaxa nu o!

¹²Tete dukɔ blibo la yi be, yewoaɖaɖu nu ano nu, eye woana nu amewo, eye woatu aglo gã; elabena wose nya, si wogblɔ na wo la gɔme.

¹³Le ŋkeke eveagbe la dukɔ blibo la, nunɔlawo kple Lewi-viwo ƒe aƒekɔwo ƒe amegãwo va kpe la de agbalẽfiala Ezra gbɔ, be yewoase se la me nyawo gɔme.

¹⁴Eye yvokpɔ woŋlɔ ɖe se, si Yehowa de to Mose dzi la me be, Israel-viwo nana agbadɔ me le ŋkekenyuie la dzi le dzinu adrelia me;

¹⁵eye woado kpo aɖe gbeƒã le woƒe duwo katã me kple Yerusalem be; Mido yi towo dze eye mitso amiti ŋutɔ ƒe alɔwo, gbemiti ƒe alɔwo, mirte ƒe alɔwo, deʋayawo kple afi dɔdɔewo ƒe alɔwo, ne miatsɔ awɔ agbadɔe, abe alesi woŋlɔ ɖi ene!

¹⁶Tete dukɔ la yi ɖatsɔ wo, eye amesiame wɔ, agbadɔ de eƒe xɔta, woƒe xɔxɔnuwo, mawuƒe la ƒe xɔxɔnuwo kple tsigbo la ƒe ablɔ me kpakple Efrayim-gbo la ƒe ahiɔ me.

¹⁷Eye ameha blibo si gbɔ tso aboyo me la, wɔ agbadɔwo, eye wonɔ agbadɔwo me, elabena tso Yosua, Nun vi la ŋɔli la Israel-viwo mewɔ alea kpɔ o vaseɖe ŋkeke ma dzi, eye wònye dzidzɔ ga ŋutɔ.

¹⁸Exlẽ Mawu ƒe segbalẽ la gbesiagbe tso ŋkeke gbãtɔ dzi vaseɖe ŋkeke mlɔetɔ̃ dzi. Woɖu ŋkekenyuie la ŋkeke adre sɔŋ, eye ŋkeke enyilia nye takpegbe, abe alesi wònye kɔnui ene.