Read ewe Ester 5 Bible Online

Ester 5 - ewe bible

Ester 5

¹Le ŋkeke etɔ̃agbe la Ester do fiawu, eye wòyi fiasã ƒe xɔxɔnu emetɔ, si le fia ƒe xɔ ŋgɔ la. Fia la bɔbɔ nɔ eƒe fiazikpui dzi le fiasã me dze ŋgɔ aƒe la ƒe ʋɔtru.

²Ke esi fia la kpɔ fiasrɔ̃ Ester wòtsi tre ɖe xoxɔnua la, eve enu; eye fia la lé sikafiatikplɔ ɖe asi do ɖe Ester; tete Ester te va heka asi fiatikplɔ la ta me.

³Fia la gblɔ nɛ bena: Fiasrɔ̃ Ester, nya ka dzɔ ɖe dziwò, eye nuka dim nèle? Nenye fiaɖuƒe la ƒe afã gɔ̃e hã la, woatsɔe ana wò!

⁴Ester ɖo ŋu bena: Ne edze fia ŋu la, ekema fia kple Haman neva kplɔ̃, si meɖo nɛ egbe la ŋu.

⁵Tete fia la gblɔ be: Miɖayɔ Haman vɛ kaba, be míawɔ Ester ƒe nya la dzi! Eye fia la kple Haman wova kplɔ̃, si Ester ɖo la ŋu.

⁶Esime wole wein nom la, fia la gblɔ na Ester bena: Nuka dim nèle? Woana wò! Eye nuka biam nèle? Nenye fiaɖuƒe ƒe afã gɔ̃e hã la, woawɔ edzi!

⁷Ester ɖo ŋu gblɔ bena: Nye biabia kple nye didi enye si:

⁸Ne fia la ve nunye, eye ne edze fia la ŋu be, wòana nye nubiabiam, eye wòawɔ nye didi dzi la, ekema, ne fia kple Haman wova kplɔ̃, si magaɖo na wo ŋu la, mawɔ fia ƒe nya la dzi etsɔ.

⁹Tete Haman do go gbemagbe kple dzidzɔ, eye eƒe dzi gbɔ ɖe eme. Ke esi Haman kpɔ Mardoxai le fia ƒe agbo me metsi tre, ne wòahayi eɖokui ʋã ge le eŋku me o la, dzi ku Haman vevie ŋutɔ ɖe Mardoxai nu;

¹⁰ke Haman zi eɖokui dzi. Esi wòva eƒe me la, edɔ woɖayɔ exɔlɔ̃wo kple srɔ̃a Zeres vɛ.

¹¹Eye Haman xlẽ eƒe kesinɔnu nyuiawo, via gbogboawo kple nusiwo katã fia la tso ɖoe gãe, kpakple alesi wòtsɔe ɖo amegãwo kple fia ƒe dɔlawo dzi la na wo.

¹²Eye Haman gagblɔ bena: Fiasrɔ̃ Ester hã mekpe amea ɖeke kpe ɖe fia ŋu ɖe kplɔ̃, si wòɖo la ŋu o, negbe nye ko; etsɔ hã egakpem kpe ɖe fia la ŋu.

¹³Ke nusiawo katã meɖi ve nam o, ŋkeke alesi megale Yudatɔ Mardoxai kpɔm wobɔbɔ nɔ fia ƒe agbo me.

¹⁴Tete srɔ̃ Zeres kple xɔlɔ̃wo katã gblɔ nɛ bena Na, woatu ati wòakɔ abɔklugui blaatɔ̃, eye etsɔ la nagblɔe na fia la, ne woahe Mardoxai ɖe eŋu; emegbe nayi kplɔ̃ ŋu kple dzidzɔ kpakple fia la! Eye nya la dze. Haman ŋu, eye wòna wotu ati la.