Read ewe Mose II 18 Bible Online

Mose II 18 - ewe bible

Mose II 18

¹Eye Midian-nunɔla Yetro, Mose to, se nusiwo katã Mawu wo na Mose kple eƒe dukɔ Israel, kple alesi Yehowa kplu Israel tso Egipte.

²Tete Mose to Yetro kple Mose srɔ̃ Zipora, si wòkplɔ ɖo ɖe aƒe,

³kple viaŋutsu eveawo, siwo dome ɖeka ŋkɔ nye Gersom, elabena egblɔ be: Amedzro menye le dzronyigba dzi?

⁴Evelia ƒe ŋkɔ nye Eliezer. Elabena fofonye ƒe Mawu la kpe de ŋunye, eye wòɖem tso Farao ƒe yi nu.

⁵Eye Mose to Yetro kple viaŋutsuwo kpakple srɔ̃a wova Mose gbɔ le gbea dzi, le Mawu ƒe to la gbɔ, afisi woƒu asaɖa anyi ɖo.

⁶Eye wòda ame ɖo ɖe Mose gbɔ be: Nye towo Yetro kple srɔ̃wò kpakple viaŋutsu eveawo míegbɔna gbɔwò.

⁷Tete Mose yi ɖakpe toa, eye wòde ta agu, eye wòɖuɖɔ nu nɛ; emegbe wòbia wo nɔewo ƒe dɔdɔ ta se, eye woyi agbadɔ la me.

⁸Eyome Mose xlẽ nusiwo katã Yehowa wɔ Farao kple Egiptetɔwo le Israel ta, kple fu, siwo katã dzɔ ɖe wo dzi le mɔ ta, kpakple alesi Yehowa ɖe wo la, na toa.

⁹Eye Yetro kpɔ dzidzɔ le nu nyui, siwo katã Yehowa wɔ na Israel, kple alesi wòde wo tso Egiptetɔwo si me la ŋuti.

¹⁰Eye Yetro gblɔ bena: Woakafu Yehowa, amesi ɖe mi tso Egiptetɔwo kple Farao si me, amesi ɖe dukɔ la tso Egiptetɔwo ƒe ŋusẽ te.

¹¹Fifi ko menyae bena, Yehowa kpe wu mawuwo katã; elabena etsɔ woawo ŋutɔ ƒe nu vlo wɔwɔ he toe na wo.

¹²Eyome Mose to, Yetro, tsɔ numevɔsawo kple akpedavɔsawo ve na Mawu, eye Aron kple Israeltɔ tsitsiwo katã va, be woaɖu nu kple Mose to le Mawu ƒe ŋku me.

¹³Esi ŋu ke la, Mose bɔbɔ nɔ anyi, be yeadrɔ̃ ʋɔnu na dukɔ la, eye dukɔ la tsi tre ɖe Mose gbɔ vaseɖe fiẽ.

¹⁴Ke esi Mose to kpɔ dɔ, siwo katã le esi le dukɔa ŋuti la, egblɔ bena: Nuka nèle wɔwɔm na dukɔ la alea? Nukaŋuti wò ɖeka nèbɔbɔ na anyi, eye dukɔ blibo la le tsitre ɖe gbɔwò tso ŋdi vaseɖe fiẽ?

¹⁵Mose ɖo ŋu na toa bena: Dukɔ la va gbɔnye, be woabia nu Mawu.

¹⁶Ne nyaa ɖe le wo si la, wotsɔnɛ vaa gbɔnyee, eye medrɔ̃a amesiame kple nɔvia dome nya na wo, eye megblɔa Mawu ƒe sewo kple ɖoɖowo na wo.

¹⁷Tete Mose to gblɔ ne bena: Menyo be, nanɔ wɔwɔm alea o.

¹⁸Ɖeɖi ate wò ŋutɔ kple dukɔ, si le gbɔwò la ŋu. Elabena dɔ la sesẽ na wò akpa; wò ɖeka màte ŋu awɔe o.

¹⁹Eyata ɖo to nye gbe, ne maɖo aɖaŋu na wò, eye Mawu akpe ɖe ŋuwò. Na dukɔ la nu le Mawu gbɔ, eye natso woƒe nyawo aɖo Mawu ŋku me.

²⁰Ɖe seawo kple ɖoɖoawo me na wo, eye nafia mɔ, si woato kple nusi woawo la wo.

²¹Tia ŋutsu zãzɛwo le dukɔ la dome, amesiwo vɔ̃a Mawu, ɖia anukware, eye woléa fu ŋubiabiã, eye naɖo wo amegãwoe, amea ɖewo ɖe ame akpe nu, amea ɖewo ɖe ame alafa nu, amea ɖewo ɖe ame blaatɔ̃ nu, eye amea ɖewo ɖe ame ewo nu,

²²bena woadrɔ̃ ʋɔnu na dukɔ la ɣesiaɣi, negbe nya veviwo ko woatso va gbɔwò; ke nya kpotokpotoewo la woa ŋutɔwo nadrɔ̃e. Ale naɖe agba le ɖokuiwò dzi, eye woaxɔ na wò.

²³Ne èwɔ alea, eye Mawu lɔ̃ ɖe dzi na wò la, ekema àkpɔ gbɔdzɔe, eye dukɔ blibo la hã ayi aƒe me le ŋutifafa me.

²⁴Eye Mose ɖo to toa ƒe gbe, eye wò wo nusianu, si wògblɔ nɛ la.

²⁵Eye Mose tia ŋutsu zãzɛwo le Israel-viwo dome heɖo amegãwoe ɖe dukɔ la nu. Ɖewo de ame akpe nu, ɖewo ɖe ame alafa nu, ɖewo ɖe ame blaatɔ̃ nu, eye ɖewo ɖe ame ewo nu.

²⁶Eye wodrɔ̃a ʋɔnu na dukɔ la ɣesiaɣi, negbe nya veviwo ko wotsɔna vaa Mose gbɔe, ke nya kpotokpotoewo katã la woawo ŋutɔ drɔ̃nɛ.

²⁷Emegbe Mose ɖo toa ɖa, wòyi wo denyigba dzi.