Read ewe Mose II 25 Bible Online

Mose II 25 - ewe bible

Mose II 25

¹Eye Yehowa gblɔ na Mose bena:

²Gblɔ na Israel-viwo bena, woadzɔ nu nam. Midzɔ nu nam le amesiame, si lɔ̃ tso dzime faa la si.

³Nusiwo miadzɔ le wo si la wonye: Sika, klosalo kple akɔbli,

⁴aɖabɛ blɔtɔ kple aɖabɛ dzĩtɔ ƒe ka, ka dze, ɖeti ɣi kple gbɔ̃fuwo,

⁵agbogbalẽ, si wode ama dzi, nyogbalẽ kple xé.

⁶Ami ɖe akaɖiniedede ŋu kple ami ʋeʋẽe hena sisi kple numeme ʋeʋẽe.

⁷Soham-kpe kple kpe xɔasiwo, bena woatsɔ aɖo kɔmewu kple akɔtaɖonu la ŋu.

⁸Eye woawɔ nɔƒe kɔkɔe nam, bena manɔ wo dome.

⁹Alesi metia nɔƒe la tutume kple eŋuti nuwo katã wɔwɔ wò la, nenema pɛpɛpɛ miawɔe.

¹⁰Eye woatsɔ xé akpa aɖakae, eƒe didime nanye abɔklugui eve kple afã, kekeme nanye abɔklugui ɖeka kple afã, eye eƒe kɔkɔme nanye abɔklugui ɖeka kple afã.

¹¹Eye nafa sika nyuitɔ ɖe eŋu; nafae ɖe eme kple ekɔgo, eye natsɔ sika ado atsiã ɖe eto akpe ɖo.

¹²Emegbe nakɔ sikasigɛ ene, eye naklã wo ɖe eƒe dzogoe eneawo ŋu; asigɛ eve nanɔ axa ɖeka, eye asigɛ eve hã nanɔ axa evelia.

¹³Eyome natsɔ xé akpa kpowo, eye nafa sika ɖe wo ŋu.

¹⁴Eye natsɔ kpoawo aƒo ɖe asigɛ, siwo le aɖaka la ƒe axawo dzi la me, bena woatsɔ wo akɔ aɖaka lae.

¹⁵Kpoawo natsi asigɛawo me le aɖaka la ŋu, eye womaɖe wo le eme o.

¹⁶Eye natsɔ se, siwo mana wò la, ade aɖaka la me.

¹⁷Tsɔ sika nyuitɔ wɔ nutsyɔnu ɖe nutuvi la dzi; eƒe didime nanye abɔklugui eve kple afã, eye eƒe kekeme nanye abɔklugui ɖeka kple afã.

¹⁸Eye natsɔ sika atu Kerubi eve ɖe nutsyɔnu la ƒe goawo kple eve dzi.

¹⁹Wɔ Kerubi ɖeka ɖe go si dzi, eye Kerubi evelia ɖe go keme dzi; ale Kerubiawo kple eve nanɔ go eveawo dzi.

²⁰Eye Kerubiawo naklẽ aʋala aɖo ta dzi, ale be woƒe aʋalawo nabi ɖe nutsyɔnu la dzi; wòadze ŋgɔ wo nɔewo, eye woade mo to ɖe nutsyɔnu la dzi.

²¹Eye natsɔ nutsyɔnu la aɖo aɖaka la tame, ke natsɔ se, siwo mana wò la, ade aɖaka la me.

²²Kerubi eve, siwo le nubablaɖaka tame la domee maɖe ɖokuinye afia wò le, eye magblɔ nya, siwo katã made asi na Israel-viwo la na wò tso afima.

²³Emegbe natsɔ xé akpa kplɔ̃e; eƒe didime nanye abɔklugui eve, kekeme nanye abɔklugui ɖeka, eye eƒe kɔkɔme nanye abɔklugui ɖeka kple afã.

²⁴Fa sika nyuitɔ ɖe eŋu, eye natsɔ sika ado atsiã ɖe eŋu akpe ɖo.

²⁵Eye naɖo to nɛ akpe ɖo, esi akeke asi ɖeka, eye natsɔ sika ado atsiã de to la ŋu akpe ɖo.

²⁶Tsɔ sika wɔ asigɛ ene, eye naklã asigɛawo ɖe eƒe afɔ eneawo ƒe axa eneawo dzi.

²⁷Asigɛawo nate ɖe toawo ŋu, bena woaƒo kpo ɖe wo me akɔ kplɔ̃ lae.

²⁸Tsɔ xé kpa kpewo, eye nata sika ɖe wo ŋu; woawoe woatsɔ akɔ kplɔ̃ lae.

²⁹Eye natsɔ sika nyuitɔ awɔ eŋu gbawo, nutɔgbawo, goewo kple trewo, nusiwo ŋu dɔ woawɔ le edzi.

³⁰Eye natsɔ abolo aɖo kplɔ la dzi le ŋkunye me ɖaa.

³¹Eyome natsɔ sika nyuitɔ awɔ akaɖitii; woatu akaɖitia, eƒe afɔ kple ati la, eye woawɔ kawo, seƒoƒowo kple woƒe tamekukuwo ɖe eŋu.

³²Alo ade nanɔ akaɖiti la ƒe axawo dzi; alɔ etɔ̃ nanɔ axa ɖeka, eye alɔ etɔ hã nanɔ axa evelia.

³³Seƒoƒo etɔ kple woƒe tamekukuwo nanɔ alɔ ɖeka ŋuti, eye seƒoƒo etɔ̃ kple woƒe tamekukuwo nanɔ alɔ evelia ŋuti; alea woanɔ alɔ ade, siwo le akaɖitia ŋu la, ŋuti akpe ɖo.

³⁴Eye seƒoƒo ene kple woƒe tamekukuwo nanɔ atia ŋutɔ ŋuti.

³⁵Seƒoƒo ɖeka kple etamekuku nanɔ alɔ eveve kpeƒe le ati la ŋu.

³⁶Kɔawo kple alɔavvo nawɔ ɖeka ɖe ati la ŋu; sika nyuitɔ woatso atu akaɖiti lae blibo.

³⁷Emegbe nawɔ akaɖigbɛ adre ada ɖe wo dzi, eye woabi aɖo ta ŋgɔ.

³⁸Eye natso sika nyuitɔ awɔ ɖovulãnuwo kple ganu suewoe.

³⁹Woatso sika nyuitɔ talento ɖeka awɔ akaɖiti la kple eŋu nuawo katãe.

⁴⁰Kpɔ dzi, be nawɔe ɖe nɔnɔme, si wotia wò le toa dzi la nu pɛpɛpɛ.