Read ewe Mose II 26 Bible Online

Mose II 26 - ewe bible

Mose II 26

¹Tsɔ kuntru ewo wɔ nɔƒe la; eye aɖaŋuvɔlɔ̃lawo natsɔ ɖetí ɣi dada, aɖabɛ blɔtɔ kple dzĩtɔ ƒe ka kpakple ka dze alɔ̃e, eye woalɔ̃ Kerubiwo ɖe eme.

²Kuntru ɖeka ƒe didime nanye abɔklugui blave vɔ enyi, eye eƒe kekeme nanye abɔklugui ene. Dzidzeme ɖeka nanɔe na kuntruawo katã.

³Woatɔ kuntruawo akpe ɖe wo nɔewo ŋu atɔ̃atɔ̃.

⁴Eye natɔ aɖabɛ blɔtɔ ƒe ka kpukpuiwo de kuntru kpekpea ƒe go ɖeka me, nenema ke natɔe ɖe kpekpe evelia hã ƒe go ɖeka me.

⁵Tɔ ka kpuspui blaatɔ̃ ɖe kuntru kpekpeawo ƒe go ɖekaɖekawo me, eye kawo nanɔ sɔsɔ ɖeka me.

⁶Eye natso sika atu ganuvi blaatɔ̃ aku kawo, eye ganuviawo nakpe kuntruawo woazu agbadɔ ɖeka.

⁷Eyome natsɔ gbɔ̃fu alɔ̃ kuntru wuiɖekɛ, bena woatsɔ agba nɔƒe la tame.

⁸Kuntru ɖeka ƒe didime nanye abɔklugui blaetɔ̃, eye eƒe kekeme nanye abɔklugui ene. Dzidzeme ɖeka nanɔe na kuntru wuiɖekɛawo katã.

⁹Natɔ Kuntru atɔ̃ akpe vovo, eye natɔ kuntru ade hã akpe vovo, eye naŋe kuntru adelia, si le agbadɔ la ƒe ŋgɔdze la me ɖe eve.

¹⁰Emegbe natɔ ka kpukpui blaatɔ̃ ɖe kuntru kpekpea ƒe go ɖeka me, eye nagatɔ ka kpukpui blaatɔ̃ ɖe kpekpe evelia ƒe go ɖeka me.

¹¹Eyome natu akɔbliganuvi blaatɔ̃, eye natsɔ ganuviawo aku kaawo, bena agbadɔ la nakpe azu ɖeka.

¹²Eye agbadɔkuntru la ƒe go ɖeka si tsi edzi le agbadɔa megbe la, nadzɔ ɖe anyi atsyɔ kuntru gbãtɔwo.

¹³Eye kuntru, siwo tsi edzi le agbadɔ la ƒe didime go eveawo dzi la, nadzo de anyigba abɔklugui ɖeka, bena woaxe agbadɔ la ŋu.

¹⁴Emegbe natso agbogbalẽ, si wode ama dzi la, agba agbadɔ la, eye nagatsɔ nyogbalẽ agba edzi.

¹⁵Esia yome natsɔ xè adze ʋuƒo, siwo woatu na agbadɔ la.

¹⁶Ʋuƒo ɖeka ƒe didime nanye abɔklugui ewo, eye eƒe kekeme nanye abɔklugui ɖeka kple afã.

¹⁷Eye nayrɔ ʋuƒo ɖeka gɔme wòadze eve, bena woate ŋu ali ɖe anyi. Alea nayrɔ agbadɔ la ƒe ʋuƒoawo katã gɔmee.

¹⁸Nawɔ ʋuƒowo hena agbadɔ la; ʋuƒo blave nano dziehe gome.

¹⁹Eye natso klosalo awɔ afɔ blane ɖe ʋuƒo blaveawo te; afɔ eve nanɔ ʋuƒo ɖesiaɖe ƒe nu eveawo gɔme.

²⁰Eyome nawɔ ʋuƒo blave hena agbadɔ la ƒe anyiehe gome.

²¹Eye natsɔ klosalo awɔ afɔ blane ɖe wo gome, afɔ eve nano ʋuƒo ɖesiaɖe gɔme.

²²Eye nadze ʋuƒo ade hena agbadɔ la ƒe axa, si le ɣedzeƒe gome.

²³Eye nagadze ʋuƒo eve hena dzogoe, siwo le agbadɔ la ƒe ɣetoɖoƒe gome.

²⁴Eye woakpe wo gome kple wo tame ɖe ʋuƒoawo ŋu, bena asigɛ ɖeka nano wo ŋu. Alea woawo wo kple eve lae, eye woanɔ dzogoeawo kple eve dzi.

²⁵Wo katã le ʋuƒo enyi, siwo gome woawo klosalofɔ wuiade ɖo, afɔ eve nanɔ ʋuƒo ɖesiaɖe gɔme.

²⁶Emegbe natsɔ xé akpa gameti atɔ̃ hena ʋuƒo, siwo le agbadɔ la ƒe axa ɖeka;

²⁷gameti atɔ̃ hã na ʋuƒo, siwo le agbadɔ la ƒe axa evelia, kpakple gameti atɔ̃ hena ʋuƒo, siwo le agbadɔ la megbe le ɣetoɖoƒe gome.

²⁸Eye gameti dometɔ nato ʋuƒoawo titina, tso agbadɔ la ƒe go ɖeka me vaseɖe go keme me.

²⁹Fa sika ɖe ʋuƒoawo ŋu, eye natsɔ sika atu wo ŋuti sigɛ, siwo me woaƒo gametiawo ɖo, eye nafa sika ɖe gametiwo hã ŋu.

³⁰Tu agbadɔ la ɖe nɔnɔme, si wofia wo le toa dzi la nu pɛpɛpɛ.

³¹Aɖaŋuvɔlɔlawo natsɔ aɖabɛ blɔtɔ kple dzĩtɔ ƒe ka, ka dzẽ kple ɖeti ɣi dada alɔ̃ xɔmetsovɔe, eye woalɔ̃ Kerubiwo de eme.

³²Eye naku wo ɖe xésɔti ene, siwo ŋu wofa sika ɖo, eye wowɔ klosalofɔwo ɖe wo gɔme, eye sika gatagbadzɛwo le wo ŋuti la ŋu.

³³Ku xɔmetsovɔ la ɖe kuntru gbãtɔwo ƒe kpeƒe, eye natso nubablaɖaka la ada ɖe xɔmetsovɔ la godo, eye xɔmetsovɔ la natsɔ kɔkɔeƒe la kple kɔkɔeƒewo ƒe kɔkɔeƒe la me na mi.

³⁴Eye natsɔ nutsyɔnu la ada ɖe nubablaɖaka la dzi le kɔkɔeƒewo ƒe kɔkɔeƒe la me.

³⁵Tsa kplɔ̃ la da ɖe xɔmetsovɔa ŋgɔ le anyiehe gome, eye natsɔ akaɖiti la ada ɖe agbadɔ la ƒe dziehe gome le kplɔ̃ la kasa.

³⁶Eye avɔlɔ̃lawo natsɔ aɖabɛ blɔtɔ kple dzĩtɔ ƒe ka, ka dze kple ɖeti ɣi dada alɔ̃ avɔ, bena woatsɔ atu agbadɔ la nu.

³⁷Emegbe natsɔ xé akpa sɔti atɔ̃ hena avɔ la; fa sika ɖe wo ŋu, eye natsɔ sika awɔ wo ŋuti gatagbadzɛawo, eye natsɔ akɔbli akɔ afɔwo ɖe wo gɔme.