Read ewe Mose II 29 Bible Online

Mose II 29 - ewe bible

Mose II 29

¹Eye nusi nawɔ na wo, be nawɔ wo kɔkɔe, ne woazu nunɔlawo asubɔm la, enye si: Lé nyitsu ɖagbee ɖeka kple agbo eve, siwo sɔ blibo,

²eye natsɔ wɔ memee aƒo abolo maʋamaʋà kple aboŋgo maʋamaʋã, eye natɔ tatali maʋamaʋã akɔ ami ɖe dzi.

³Tsɔ wo de kusi me, eye woatsɔ woa kple kusi la vɛ, eye nakplɔ nyitsu la kple agbo eveawo vɛ.

⁴Eye na bena, Aron kple viaŋutsuawo nate va Mawu ƒe agbadɔ la nu, eye nale tsi na wo.

⁵Fɔ awua wo vɛ, eye nado awutewui ʋlaya la kple dziwui la kpakple kɔmewu la na Aron; gba wo dzi nɛ kple akɔgbanu, eye natsɔ akɔtaɖonu la aɖo eŋu.

⁶Bla tablanu la nɛ, eye natsi ŋgoblanu kɔkɔe la ɖe tablanu la ŋu.

⁷Tso ami ko ɖe eƒe tame, eye nasi ami ne.

⁸Emegbe nana viaŋutsuawo nate va, eye woaɖo awutewui ʋlayawo.

⁹Bla ali dzi na wo, Aron ŋutɔ kple viaŋutsuawo, eye nabla tablanu la na wo, bena nunɔladɔ nazu wo to tegbee. Ale naɖo Aron kple viaŋutsuawo enye si;

¹⁰He nyitsu la va Mawu ƒe agbadɔ la ŋgɔ, eye Aron kple viaŋutsuawo natsɔ woƒe asiwo aɖe nyitsua ƒe tame.

¹¹Eye nawu nyitsu la le Yehowa ƒe ŋku me, le Mawu ƒe agbadɔ la nu.

¹²Eye nade asibide nyitsu la ƒe ʋu me asisi ɖe vɔsamlekpui la ƒe dzowo ŋu, ke natsɔ ʋu mamlea katã akɔ ɖe vɔsamlekpui la te.

¹³Eyome naɖe ami, siwo katã le dɔmenuawo ŋu kple aklã ŋuti nuwo kpakple ayiku eveawo kple wo ŋuti nuwo, eye nata dzo wo ɖe vɔsamlekpui la dzi.

¹⁴Ke natɔ dzo nyitsu la ƒe lã, eƒe agbalẽ kple dɔmemiwo le asaɖa la godo; elabena nuvɔ̃ ŋuti vɔsae.

¹⁵Emegbe nahe agbo ɖeka vɛ, eye Aron kple viaŋutsuwo natsɔ woƒe asiwò ada ɖe agbo la ƒe tame,

¹⁶eye nawu agbo la atsɔ eƒe ʋu awu ɖe vɔsamlekpui la dzi godoo ava kpe.

¹⁷Eyome nafli agbo la ɖe eƒe ƒunuɖeƒeewo, eye nakpala eƒe dɔmenuwo kple eƒe afɔwo, eye natsɔ wo ada ɖe eƒe akpa mamleawo kple la dzi.

¹⁸Eye natɔ dzo agbo blibo la ɖe vɔsamlekpui la dzi; elabena numevɔsa wònye na Yehowa, ʋeʋẽ lilili kple Yehowa ƒe dzo wònye.

¹⁹Emegbe nahe agbo evelia vɛ, eye Aron kple viaŋutsuwo natsɔ woƒe asiwò ada ɖe agbo la ƒe tame.

²⁰Eye nawu agbo la atsɔ eƒe ʋu asisi ɖe Aron kple viaŋutsuawo ƒe nuɖusi togboewo, nuɖusi-degblefetsuwo kple nuɖusifɔ-degblefetsuwo ŋu, eye natsɔ ʋu mamlea awu ɖe vɔsamlekpui la ŋu godoo ava kpe.

²¹Eye natsɔ ʋu, si le vɔsamlekpui dzi, kple ami awu ɖe Aron ŋutɔ kple eƒe awuawo kpakple viaŋutsuawo kple woƒe awuawo ŋu, bena eya ŋutɔ kple eƒe awuwo, viaŋutsuawo kple woƒe awuawo ŋuti nakɔ.

²²Eyome naɖe ami, siwo le agboa ŋu; ɖe asike la kple eŋu miwo, ami, siwo le dɔmenuawo ŋu, aklã ŋu miwo, ayiku eveawo kple wo ŋu miwo kpakple nuɖusita; elabena ameɖoɖo ƒe agboe.

²³Eye natsɔ abolo bɔbɔ ɖeka, aboŋgo ɖeka kple tatali ɖeka, siwo nye nu maʋamaʋãwo le Yehowa ŋku me la, le kusia me,

²⁴eye natsɔ nuawo katã ade asiƒome na Aron kple viaŋutsuawo, eye nanyè nuawo le Yehowa ƒe ŋku me.

²⁵Emegbe naxɔ nuawo le wo si ada ɖe vɔsalã la dzi le vɔsamlekpuia dzi, eye natɔ dzo wo, bena woaʋẽ lilili de Yehowa. Yehowa ƒe dzo wònye.

²⁶Ɖe agbo, si wowu hena Aron ɖoɖo la ƒe akɔ, eye nanyee le Yehowa ƒe ŋku me, emegbe woazu towò.

²⁷Kɔ agbo, si wowu hena Aron kple viaŋutsuawo ɖoɖo la, ƒe akɔ kple ata, siwo wonye la ŋuti,

²⁸bena woanye Aron kple viaŋutsuawo to, eye wòanye ɖoɖo na Israel-viwo tegbee, elabena asidzɔe. Eye wòanye adzo, si Israel-viwo ana Yehowa tso woƒe akpedavɔsawo me.

²⁹Aron ƒe awu kɔkɔeawo nazu viaŋutsu, siwo ana eteƒe la tɔ, eye woano wo ŋu, hafi wòasi ami na wo, eye woaɖo wo.

³⁰Viaŋutsuwo dometɔ, si azu nunɔla ɖe eteƒe, amesi ayi Mawu ƒe agbadɔ la me, bena wòasubɔ le kɔkɔeƒea la, nadoe ŋkeke adre sɔŋ.

³¹Ke naɖa agbo, si wowu hena ameɖoɖo la, ƒe lã le teƒe kɔkɔe la

³²Eye Aron kple viaŋutsuawo naɖu agbolã la kple abolo, siwo le kusia me la, le Mawu ƒe agbadɔ la nu.

³³Ale woaɖu nusi wotsɔ ɖe nuvɔ̃ ɖa hafi ɖo wo, eye wowɔ wo kɔkɔe la; ke ame bubua ɖeke mekpɔ mɔ aɖui o, elabena nu kɔkɔe ye.

³⁴Ne ameɖovɔsalã la kple abolo la ƒe ɖe tsi anyi ŋu ke ɖe edzi la, ekema woatɔ dzoe; womaɖui o, elabena nu kɔkɔe ye.

³⁵Wɔ na Aron kple viaŋutsuawo pɛpɛpɛ, abe alesi mede se na wò ene: ŋkeke adre sɔŋ naɖo wo.

³⁶Gbesiagbe nawu nyitsu ɖeka hena nuvɔ̃ŋutivɔsa, abe avulenu ene. Eye naɖe nuvɔ̃ ɖa le vɔsamlekpui la ŋu to avulénuwo meme le edzi me, eye nasi ami ne awɔe kɔkɔe.

³⁷Ŋkeke adre sɔŋ name avulénuwo le vɔsamlekpui la dzi, eye nawɔe kɔkɔe, bena vɔsamlekpui la nazu nu kɔkɔetɔ. Nusianu, si aka vɔsamlekpui ŋu la, azu kɔkɔe.

³⁸Eye nusiwo namè le vɔsamlekpuia dzi, wonye esi. Gbesiagbe name alẽvi eve, siwo xɔ ƒe ɖekaɖeka.

³⁹Me alẽvi ɖeka le ŋdi, eye alẽvi evelia le fiẽ.

⁴⁰Eye natsɔ dzomi hin eneliawo ɖeka adzaba wɔ memee efa ewoliawo ɖeka, eye natsɔ wein hin eneliawo ɖeka hena nunovɔsa akpe ɖe alẽvi ɖeka la ŋu.

⁴¹Mè alẽvi evelia le fiẽ me: eye nawɔ nuɖuvɔsa kple nunovɔsa, siwo kpe ɖe eŋu la, abe ŋdi tɔ ene: esia enye dzo, si aʋẽ lilili ɖe Yehowa.

⁴²Esia enye gbesiagbe numevɔsa, si miaƒe dzidzimeviwo ame le Mawu ƒe agbadɔ la nu le Yehowa ƒe ŋku me, afisi maɖe ɖokuinye afia nu aƒo nu kpli mi le.

⁴³Afima maɖe ɖokuinye afia Israel-viwo le, eye nye ŋutikɔkɔe ana agbadɔ la ŋuti nakɔ.

⁴⁴Makɔ agbadɔ la kple vɔsamlekpuia ŋu, eye makɔ Aron kple viaŋutsuawo ŋuti, bena woanye nunɔlawo asubɔm.

⁴⁵Mana Israel-viwo dome, eye manye woƒe Mawu.

⁴⁶Eye wòadze sii be, nyee nye Yehowa, woƒe Mawu, si kplɔ wò tso Egipte-nyigba dzi, bena manɔ wo dome, nye Yehowa!