Read ewe Mose II 40 Bible Online

Mose II 40 - ewe bible

Mose II 40

¹Eye Yehowa gblɔ na Mose bena:

²Le ɣleti gbãtɔ ƒe ŋkeke gbãtɔ dzi natu nɔƒe, si enye Mawu ƒe agbadɔ la.

³Tsɔ nubablaɖaka la da ɖe eme, eye natsɔ xɔmetsovɔ la axe aɖaka la ŋku me.

⁴Tsɔ kplɔ la da ɖe eme, eye natsɔ ŋkumeɖobolo la ada ɖe edzi; emegbe nakɔ akaɖiti la ava eme, eye natɔ akaɖigbɛawo aɖo edzi.

⁵Eye natsɔ sikavɔsamlekpui, si dzi woado dzudzɔ ɖo, ada ɖe nubablaɖaka la ƒe ŋgɔdze, eye natsɔ avɔ atu agbadɔ la nu.

⁶Eye natsɔ numevɔsamlekpui la ada ɖe nɔƒe la, si enye Mawu ƒe agbadɔ la, ŋu ʋɔtrua ƒe ŋgɔdze.

⁷Tsɔ tsileze la da ɖe Mawu ƒe agbadɔ la kple vɔsamlekpui la dome, eye naku tsi de eme.

⁸Eye natɔ kpɔ ɖe eŋu godoo ava kpe, eye natsɔ avɔ atu agbo la nu.

⁹Tsɔ ami sisi la si na nɔƒe la kple nusiwo katã le eme, eye nakɔ eya ŋutɔ kple eŋu nuwo katã ŋu, bena woazu kɔkɔe.

¹⁰Si ami na numevɔsamlekpui la kple eŋu nuwo katã, eye nakɔ vɔsamlekpui la ŋu, bena vɔsamlekpui la nazu nu kɔkɔewo ƒe nu kɔkɔe.

¹¹Eye nasi ami na tsileze la kple eƒe zɔ, eye nakɔ eŋu.

¹²Emegbe nana Aron kple viaŋutsuwo nate va Mawu ƒe agbadɔ la nu, eye nale tsi na wo.

¹³Eye na Aron nado awu kɔkɔeawo, eye nasi ami nɛ àwɔe kɔkɔe, bena wòazu nunɔla asubɔm.

¹⁴Eyome nana viaŋutsuwo nate va, eye woado awutewui ʋlayawo,

¹⁵eye nasi ami na wo, abe alesi nèsii na wo fofo ene, bena woazu nunɔlawo asubɔm. Ami sisi sia nanye dzesi na wo kple woƒe dzidzimeviwo bena, nunɔladɔ la zu wo tɔ tegbee.

¹⁶Eye Mose wɔe pɛpɛpɛ. Alesi Yehowa de se ne la, nenema wòwɔ.

¹⁷Le ƒe evelia ƒe ɣleti gbãtɔ ƒe ŋkeke gbãtɔ dzi wotu nɔƒe la.

¹⁸Ale Mose tu nɔƒe lae. Efɔ afɔawo da ɖi, eye wotsɔ ʋuƒoawo de wo me; emegbe wòde gametiawo wo ŋu, eye wòtu sɔtiawo.

¹⁹Eye wòkeke kuntruawo ɖe nɔƒe la dzi, emegbe wògbã wo dzi, abe alesi Yehowa de se na Mose ene.

²⁰Etsɔ se la de aɖaka la me, eye wòde kpoawo aɖaka la ŋu; eyome wòkɔ nutsyɔnu la da de aɖaka la tame.

²¹Eye wokɔ aɖa ka la da ɖe nɔƒe la, eye wotsɔ xɔmetsovɔ la xe nubablaɖaka la ŋku me, abe alesi Yehowa de se na Mose ene.

²²Eye wotsɔ kplɔ la da ɖe Mawu ƒe agbadɔ la me, le nɔƒe la ƒe anyiehekpa dzi, le xɔmetsovɔ la ŋgɔ,

²³eye wotsɔ abolo da de edzi le Yehowa ƒe ŋku me, abe alesi Yehowa de se na Mose ene.

²⁴Eyome wotsɔ akaɖiti la da ɖe Mawu ƒe agbadɔ la me, le kplɔ la kasa, le nɔƒe la ƒe dziehekpa dzi,

²⁵eye wòfɔ akaɖigbɛawo do edzi le Yehowa ŋku me, abe alesi Yehowa de se na Mose ene.

²⁶Eye wòtsɔ sikavɔsamlekpui la da de Mawu ƒe agbadɔ la me, le xɔmetsovɔ la ŋgɔ,

²⁷eye wotsɔ atike ʋeʋẽewo do dzudzɔ de edzi, abe alesi Yehowa de se na Mose ene.

²⁸Emegbe wòtsɔ avɔ tu agbadɔ la nu.

²⁹Eye wòtsɔ numevɔsamlekpui la da ɖe nɔƒe, si enye Mawu ƒe agbadɔ la ŋgɔ, eye wome numevɔsa kple nuɖuvɔsa le edzi, abe alesi Yehowa de se na Mose ene.

³⁰Eye wotsɔ tsileze la da de Mawu ƒe agbadɔ la kple vɔsamlekpui la dome, eye wòku tsi, si woale la, de eme.

³¹Eya me Mose kple Aron kple viaŋutsuwo klɔa woƒe asiwo kple afɔwo ɖo.

³²Ne wole Mawu ƒe agbadɔ la me yi ge, alo wole tete ge ɖe vɔsamlekpuia ŋu la, woléa tsi, abe alesi Yehowa ɖe se na Mose ene.

³³Eye wòtɔ kpɔ ƒo xlã nɔƒe la kple vɔsamlekpui la godoo va kpe, eye wòtsɔ avɔ la tu agbo la nu. Ale Mose wu dɔ blibo la nu.

³⁴Tete alilikpo tsyɔ Mawu ƒe agbadɔ la dzi, eye Yehowa ƒe ŋutikɔkɔe yɔ nɔƒe la taŋ.

³⁵Ke Mose mete ŋu yi ɖe Mawu ƒe agbadɔ la me o, elabena alilikpo tsyɔ edzi, eve Yehowa ƒe ŋutikɔkɔe yɔ nɔƒe la taŋ.

³⁶Eye ne alilikpo la ho tso nɔƒe la dzi la, Israel-viwo hã hona, alea wowɔ le woƒe mɔzɔzɔ la katã me.

³⁷Ne alilikpo la meho o la, womehona o, vaseɖe gbesigbe woaho hafi.

³⁸Le woƒe mɔzɔzɔwo katã me la Mawu ƒe alilikpo la nɔ nɔƒe la dzi le ŋkeke me, ke edzena na Israel ƒe aƒe blibo la le zã me abe dzo ene.