Read ewe Hiob 10 Bible Online

Hiob 10 - ewe bible

Hiob 10

¹Nye agbe le ŋu nyɔm na nye luʋɔ, eyata mana konyifafa naɖo bababa, eye maƒo nu le nye luʋɔ ƒe vevesesewo me.

²Megblɔ na Mawu be: Megabu fam o; na manya nusi la nele avu wɔm kplim ɖo!

³Ɖe wòle nuwò vivim be, nète ame ɖe anyi, eye nètsɔ nye, wò asinudɔwɔwɔ la, ƒu gbe, eye nèklẽ ɖe ame vlo ƒe adaŋudede dzia?

⁴Ŋutilãŋkue le tawòa? alo ɖe nèkpɔa nu, abe alesi amegbetɔ kpɔa nui enea?

⁵Ɖe wò ŋkekewo le abe amegbetɔ ƒe ŋkekewo enea? Eye wò ƒewo le abe ŋutsu ƒe ƒewo enea?

⁶Hafi nèle nye vodadawo gɔme dim, eye nèle nye nuvɔ̃wo ta biam le sesem,

⁷eya wònye ènyae be, nyemeɖi fɔ o hafi, eye amea ɖeke mate ŋu axɔ ame le asiwò me o.

⁸Wò asie mem, eye néwɔ nye afisiafi pɛpɛpɛ tso, hafi natsrɔ̃m mahã?

⁹Ɖo ŋui be, tsue nètsɔ wɔm, eye ɖe nèbe, magatrɔ zu anyia?

¹⁰Ɖe mèkɔm ɖe anyi abe notsi ene, eye nèna mebla abe notsi kpekẽ ene oa?

¹¹Efa ŋutigbalẽ kple lã ɖe ŋunye, eye nède ƒu kple lãmeka menye.

¹²Ena agbe kple amenuvevem, eye wò ametakpɔkpɔ dzra nye gbɔgbɔ ɖo.

¹³Nusia nèɣla ɖe wò dzi me, menyae be, èɖo esia ɖe tame.

¹⁴Ne mewɔ nuvɔ̃ la, èle ŋudzɔ nam hã, eye mètso nam le vodada me o.

¹⁵Ne meɖi fɔ la, haha nam! Eye ne tɔnye dzɔ la, nyemafɔ ta dzi o, nye amesi nye ŋukpego, eye mele nye hiã leƒe kpɔm.

¹⁶Eye ne mefɔe ɖe dzi le, ekema àyɔm ɖe nu abe dzata ene, eye àgawɔ nukunuwo ɖe ŋunye atraɖii.

¹⁷Aɖo ɖasefo bubuwo ɖe ŋunye ɖaa, àdzi wò dziku ɖe dzi ɖe ŋunye, eye aʋakɔwo anɔ li ɖɔm wo nɔewo atraɖii ɖe ŋunye.

¹⁸Nukaŋuti nèna medo tso danye ƒe dɔ me ɖo? Ɖe wònye ɖe metso me la, anye ne ŋkua ɖeke mekpɔm o;

¹⁹anye ne nyemeli o, eye anye ne wotsɔm tso danye ƒe dɔme hede yɔ me.

²⁰Ɖe nye ŋkekewo mele ʋee ko oa? Nedzudzɔ, eye wòate ɖa le ŋunye, ne magbɔ ɖe eme vie,

²¹hafi mayi, eye nyemagatrɔ agbɔ o, mayi viviti kple blukɔ ƒe anyigba dzi,

²²anyigba, si dzi viviti do ɖo kpekpekpe, eye wòtɔtɔ hɔlɔhɔlɔ, eye ne ŋu ke la, ele abe blukɔ ene.