Read ewe Hiob 12 Bible Online

Hiob 12 - ewe bible

Hiob 12

¹Eye Hiob ɖo du gblɔ bena:

²Nyateƒee! Miawo koe nye amewo, eye ne mieku la, ekema nunya ku.

³Nye hã nunya le asinye ahe miawo ke ene, eye mia kpli miawo miele kpo ɖeka dzi. Amekae menye nusiawo tɔgbe oa?

⁴Ame ŋutɔ xɔlɔ̃wo ƒe alɔmeɖenu menye tsã, nye amesi yɔa Mawu, eye wòɖoa toe, nye ame dzɔdzɔe kple mawuvɔ̃la anye alɔmeɖenu!

⁵Amesi le dedie buna be, yeado vlo dzɔgbevɔ̃e, eye yeatu nu amesi ƒe afɔ mele te dzi o la.

⁶Adzoblasuwo ƒe agbadɔwo le ŋutifafa me, eye amesiwo le dedie do dziku na Mawu, eye woƒe kɔŋɔŋlɔ nye mawu na wo.

⁷Ke bia lãwo se, eye woafia nu wò, kple dziƒoxewo: eye woagblɔe na wo,

⁸kpakple anyigba dzi nutatawo, eye woafia nu wò, eye ƒumelãwo atoe na wò.

⁹Amekae medze sii le nusiawo katã ŋu be, Yehowa ƒe asie wɔ nusiawo oa?

¹⁰Eya, amesi si me nu gbagbewo katã ƒe luʋɔ kple amegbelɔwo katã ƒe ŋutilã ƒe gbɔgbɔ le!

¹¹Ɖe to medoa nya kpɔna, abe alesi veme ɖɔa nuɖuɖu kpɔna ene oa?

¹²Ɖe nunya le amegã ɖeɖiwo si, eye tagbɔ kɔkɔ li na ame tsitsiwoa?

¹³Eya si ko nunya kple ŋusẽ, aɖaŋuɖoɖo kple tagbɔ kɔkɔ le.

¹⁴Kpɔ ɖa, ne egbã nane la, amea ɖeke megatunɛ o, eye ne ede ame xɔ la, amea ɖeke meʋunɛ o.

¹⁵Kpɔ da, ne exa mɔ na tɔwo la, womiena; ne eɖe asi le wo ŋu la, wowuwlua anyigba.

¹⁶Eya si me ŋusẽ kple nunya vavãtɔ le, eye etɔ enye mɔtrelawo kple amesiwo kplɔa amewo tre mɔe.

¹⁷Eɖea aboyo adaŋumegãwo amamae, eye wòdoa tsu ʋɔnudrɔ̃lawo.

¹⁸Edea fiawo ƒe dzizizi ɖa, eye wòdoa ka ali na wo.

¹⁹Eɖea aboyo nunɔlawo amamae, eye wòlãa amesiwo ƒo kè ɖe to la, ƒu anyi.

²⁰Exɔa nuƒoƒo nyui le nuƒolawio si, eye wòɖea nunya le tagbɔ na amegã ɖeɖiwo.

²¹Etrɔa vlododo kɔna ɖe amegãwo dzi, eye wodoe agblɔ ŋusẽtɔwo ƒe alidziblanu me.

²²Ekloa nu le nusi ɣia nigbinigbi la dzi tso viviti me, eye wòhea blukɔ vaa kekeli nui.

²³Enana duwo dzina ɖe dzi, eye wòtsrɔa wo; enana dukɔwo kekea ta, eye wògakplɔa wo dzonɛ.

²⁴Egblẽa tagbɔ na anyigba dzi dukɔwo ƒe tatɔwo, eye wònana wotsaa tsa glãla le gbegbe, si mɔa ɖeke mele o.

²⁵Wotsaa asi le viviti me akaɖia ɖeke menɔa wo si o, eye wònana wotsaa tsa glãla abe ahamulawo ene.