Read ewe Hiob 13 Bible Online

Hiob 13 - ewe bible

Hiob 13

¹Mikpɔ ɖa, nusiawo katã mekpɔ kple nye ŋkuwo, nye to see, eye wòdzrae ɖo.

²Nu alesi nu mienya la, nye hã menyae; míe kple miawo la kpo ɖeka dzi míele.

³Ke medi be, maƒo nu kple ŋusẽkatãtɔ, eye wòle dzroyem be, mía kple Mawu míahe nya akpa.

⁴Ke miawo la, ami ɖem miele ɖe aʋatso, eye gbedala dzodzrowo mienye.

⁵Oo, ne miazi ɖoɖoe dzro de; ekema woabu esia nunyae na mi.

⁶Mise ɖokuinye nuɖeɖe dzro, eye milé to ɖe nye nuyiwo ƒe nyaʋiʋli ŋu!

⁷Ɖa miebe, yewoagblɔ nu madzɔmadzɔ ahatsɔ di Mawu ƒe nyonyo, eye miaka aʋatso ahatsɔ ɖi eƒe nyonyoa?

⁸Ɖe miebe, yewoade edzia? Alo ɖe miebe, yewoawɔ dzre ɖe Mawu nua?

⁹Ne edzro mia me kpɔ la, ɖe eteƒe akɔa? Alo ɖe miebe, yewoaflui, abe alesi woflua amegbetɔ enea?

¹⁰Ahe to na mi kokoko, ne miele ame dzi dem le adze me.

¹¹Ɖe eƒe gãnyenye mado ŋɔdzi na mi, eye eƒe vɔvɔ̃ malé mi oa?

¹²Miaƒe nye tsitsiwo nye tofloko, eye miaƒe aʋakpoƒuƒuwo nye anyi ɖeɖe.

¹³Miɖe nu ɖa le ŋunye, ne maƒo nu, eye nusi be, yeava dzinye la, neva!

¹⁴Malé nye ŋutilã ɖe aɖu nu, eye matsɔ nye luʋɔ aɖo nye asi me.

¹⁵Kpɔ ɖa, ele wu ye ge tsã, eya ko sinu kpɔm mele; ke ɖeko mebe, maʋu go nye zɔzɔme ɖe ŋku me nɛ,

¹⁶eye esia nye nye dziɖuɖu xoxo, elabena ame vloa ɖeke medona ɖe eŋku me o.

¹⁷Mise nye nyawo dzro, eye nye nyameɖeɖe nede to me na mi!

¹⁸Kpɔ ɖa, medzra ɖo ɖe dzrenya la ŋu, eye menyae be, tɔnyee le dzɔdzɔ ge.

¹⁹Ameka ate ŋu akpe kplim? Eya ko hafi mazi ɖoɖoe, eye maku.

²⁰Negbe nu eve ko megawɔm o, ekema nyemaɣla ɖokuinye ɖe ŋkuwò me o:

²¹Te wò asi ɖa le ŋunye, eye wò ŋɔdzi megade dzikatsoƒoe nam o!

²²Ekema yɔm, eye matɔ, alo nyea maƒo nu, eye nado eŋu nam!

²³Vodada kple nuvɔ̃ nenie le ŋunye? Na manya nye dzidadawo kple nye nuvɔ̃wo!

²⁴Nukaŋuti nèɣla wò ŋku me dem, eye nèle buyem wò futɔe?

²⁵Ɖe nèbe yeado vodi na aŋgba, si nu ya, alo nayɔ ahɔ̃liti ƒuƒu ɖe nua?

²⁶Hafi nètsɔ vevesesewo ɖo dzinye, eye nèna mele nye ɖevime vodadawo ƒe dome nyim;

²⁷ède ga nye afɔwo ɖe atiboli ŋu, èle ŋudzɔ hã na nye mɔwo katã, eye nèɖo liƒo na nye afɔƒome;

²⁸evɔ wònye menyunyɔ abe nu ŋɔɖua kple avɔ, si agbagblaʋui du la, ene hafi.