Read ewe Hiob 14 Bible Online

Hiob 14 - ewe bible

Hiob 14

¹Amegbetɔ nyanu tɔ dzidzia, eƒe agbe le kpuie, eye fuɖeɖe ti kɔ nɛ.

²Edona abe seƒoƒo ene, eye wòyrɔna; esina abe vɔvɔli ene, eye metɔna ɖi o.

³Esia tɔgbe ŋu nèke ŋku ɖo, eye nèkplɔm va wò ʋɔnuia?

⁴Ɖe ame dzadzɛ ate ŋu atso ame madzamadza mea? Ɖeka pɛ hã o!

⁵Ne woɖo eƒe ŋkekewo, eƒe dzinuwo ƒe xexlẽme le gbɔwò, eye nèdo liƒo nɛ, si dzi magbɔ o la,

⁶ekema ɖe kɔ ɖa le eŋu, ne wòagbɔ ɖe eme, eye wòakpɔ dzidzɔ, abe alesi agbatedɔwɔla kpɔa dzidzɔ le eƒe ŋkeke ŋu ene!

⁷Elabena mɔkpɔkpɔ li na ati; ne wolãe la, ekema egadzena yeye, eye eƒe alɔwo nu metsina o.

⁸Ne eƒe kewo do xoxo le anyigba me, eye eƒe takpo ku le to me la,

⁹tsi ƒe ʋeʋẽ nana be, wògadzena, eye wòtoa alɔ abe atilɔ mumu, si woɖo ene.

¹⁰Ke ne ŋutsu ku la, emlɔa anyi drana ɖi, eye ne amegbetɔ mia nu la, afika wògale?

¹¹Tsi nona le ta me, tɔsisi miena, eye eme ƒuna;

¹²ke ne amegbetɔ mlɔ anyi la, megafɔna o, ŋkeke alesi dziƒowo li la, menyɔna o, eye womenyɔnɛ tsoa eƒe alɔ̃dɔdɔa me o.

¹³Oo, ne naxaɣlam ɖe tsiẽƒe, eye nadzram ɖo, vaseɖe esime wò dɔmedzoe nu nafa; naɖo ɣeyiɣi nam, eye naɖo ŋku dzinye emegbe ɖe!

¹⁴Ne ŋutsu ku la, ɖe wògagbɔa agbea? Le nye aʋamenɔɣiwo katã la manɔ asiɖeɖe le ŋunye lalam.

¹⁵Àyɔm, eye matɔ na wò, ne wò asinudɔwɔwɔ ƒe nu le dzrowòm.

¹⁶Ke azɔ la èle nye afɔɖeɖewo xlẽm, eye mèto nye nuvɔ̃ ŋu yi o.

¹⁷Wodzi nye dzidada ɖa nu me goŋgoŋ hetre enu, eye nègale nye voɖadawo ɖitsim.

¹⁸Ke ne to ŋe dze eme la, etua wɔ, eye agakpe tena ɖa le eteƒe.

¹⁹Tsi nyia kpewo, eye tsidzadza kplɔa anyigbakewo dzonae, ale nègblẽa amegbetɔ ƒe mɔkpɔkpɔ mee.

²⁰Edzea edzi kple ŋusẽ ɖaa, eye enu va yina, ètrɔa eƒe mo bubui henyãnɛ ɖona ɖa.

²¹Ne bubu le viawo ŋu la, menyanɛ o, eye ne woɖi gbɔ la, medzea sii o.

²²Negbe eya ŋutɔ ƒe ŋutilã ƒe veve ko wòsena, eye eya ŋutɔ ƒe luʋɔ koe xaa nu.