Read ewe Hiob 15 Bible Online

Hiob 15 - ewe bible

Hiob 15

¹Tete Elifaz, Temanitɔ la, ɖo eŋu gblɔ bena:

²Ɖe nunyala atsɔ nya tofloko aɖo eŋu, eye ɣedzeƒeya ayɔ eƒe ɖɔmea?

³Atsɔ nuƒoƒo, si mele ɖeke me o, kple nya, siwo maɖe ame o la, anɔ eɖokui ta ʋlimia?

⁴Edzudzɔ mawuvɔvɔ̃, eye nèɖi gbɔ tamesusuwo le Mawu ŋku me.

⁵Elabena wò vodada le nu fiam wò nu, eye nètia ayetɔwo ƒe aɖe.

⁶Wò nue le fɔ, bum wò, menye nyee o, eye wò nuyiwoe nye ɖasefowo ɖe ŋuwò.

⁷Wòe nye ame gbãtɔ wodzi loo? Wòe tredzɔdzɔ na togbɛwoa?

⁸Ɖe nèse Mawu ƒe adaŋudede kple to, eye nèfi nunya na ɖokuiwòa?

⁹Nuka nènya, eye míawo míenyae o? Nuka gɔme nèse, eye míawo míedze sii o?

¹⁰Ta ɣi tɔwo kple amegã ɖeɖiwo le míawo hã dome, amesiwo ƒe ŋkeke sɔ gbɔ wu fofowò tɔ.

¹¹Ɖe Mawu ƒe akɔfanamewo kple nya bɔbɔe, si gblɔm wole na wò la, nye nu tsɛ na wòa?

¹²Afika wò dzi le fluwòm yinae, eye nukaŋuti wò ŋku le totrom,

¹³be nètrɔ wò dziku ɖe Mawu ŋu, eye wò nu le nyawo dudum le ƒoƒom ɖi?

¹⁴Nuka nye amegbetɔ, be yeadza, kple nyɔnu tɔ dzidzia, be yeanye ame dzɔdzɔe?

¹⁵Kpɔ ɖa, meɖoa dzi ɖe eƒe ame kɔkɔewo ŋu o, eye dziƒo medza le eŋku me o,

¹⁶ʋuu eke, ne wòahayi ame nyɔŋu, ame gbegblẽ, amesi noa nu vlo wɔwɔ abe tsi ene la, nye ge?

¹⁷Mele nya to ge na wò, lé to ɖe ŋunye! Eye nusi mekpe la, eya gblɔ ge mala:

¹⁸nusi nunyalawo xlẽ fia le wo fofowo ŋu, eye womeɣlae o,

¹⁹wo, amesiwo ɖeɖe wotsɔ anyigba la na, eye amedzroa ɖeke meto wo dome o.

²⁰Ŋɔdzi léa ame vlo le eƒe agbe me ŋkekewo katã me, eye ƒe geɖe siawo wotu ɖo na ŋutasẽla.

²¹Ŋɔdzigbe ɖi le eƒe to me be: Adzoblasu le ƒoƒo ge ɖe edzi le ŋutifafaɣi me.

²²Mele mɔ kpɔm be, yeasi le viviti nu o, eye ɖe wotiae da ɖi hena yi.

²³Ele tsa glãla tsam le abolo ta be, afika ɖe le? Enyae be, vivitidogbe le klalo ɖe ye xa.

²⁴Ŋɔdzi kple hiã do dzikatsoƒoe na, wodze edzi abe fia, si dzra ɖo ɖe tadede aʋa me ŋu ene.

²⁵Elabena eɖo eƒe asi ɖe Mawu ŋu, eye wòdze aglã ɖe ŋusẽkatãtɔ ŋu;

²⁶eƒu ɖu ɖe edzi kple kɔ dzeti kpakple akpoxɔnu ƒe kpo titri la.

²⁷Eklã ɖe mo gbɔ, eye eƒe alime ɖa ami,

²⁸Ena du gbagbãwo kple xɔdowo me, siwo woɖo ɖi de anyiglãgozuzu ŋu.

²⁹Eyata makpɔ ho o, eƒe kesinɔnu mali ke o, eye mabi alɔ wòatɔ anyi o.

³⁰Masi le viviti nu o, dzoƒaɖe ana eƒe alɔwo naƒu, eye Mawu ƒe nu me ƒuƒu aɖee ɖa.

³¹Megana ŋu ɖom ɖe yakanuwɔwɔ ŋu o, eɖokui flum wòle; elabena axɔ yakanu ɖe eteƒe.

³²Ava me hafi eƒe ɣeyiɣi naɖo dzi, eye eƒe deʋala made ama o.

³³Adudu, abe alesi weintsetse gboewo luluna le weinka ŋu ene, eye woadudu abe amiti ƒe seƒoƒo ene.

³⁴Elabena ame vlowo ƒe ha medzina ɖe dzi o, eye dzo afiã zãnuxɔlawo ƒe agbadɔ.

³⁵Wofɔ agbagbadzedze ƒe fu hetsɔ dzɔgbevɔ̃e dzi, eye alakpa tsi ɖe dɔ me na wo.