Read ewe Hiob 16 Bible Online

Hiob 16 - ewe bible

Hiob 16

¹Tete Hiob ɖo ŋu gblɔ bena:

²Mese nusiawo tɔgbe wòsɔ gbɔ azɔ; mi katã la akɔfala ƒuƒluwo mienye.

³Nya toflokoawo va azɔa? Nukae ɖu lãme na wò, be nèɖo eŋu?

⁴Nye hã mate ŋu aƒo nu abe miawo ene; ɖe wònye miawoe xa ɖe tenyeƒe la, anye ne matrɔ nyawo aƒo ɖe anyi ɖe mia ŋu, eye maʋuʋu ta ɖe mia ŋu;

⁵anye ne matsɔ nye nu ade dzi ƒo na mi, eye nyemagbe nye nuyi tsɔtsɔ ado haha na mi o!

⁶Ne meƒo nu la, nye veveawo dzi maka aɖe o, eye ne medzudzɔ hã la, ɖe woavɔ nama?

⁷Ke azɔ la egbã lãme nam, eye nètsrɔ̃ nye aƒemetɔwo.

⁸Elém, esia nye ɖase; eye nye ƒuɖiɖi tsi tre ɖe ŋunye hele ɖase ɖim ɖe mo nam kaŋ.

⁹Eƒe dɔmedzoe vuvum, eye wòwɔ avu kplim; feɖu aɖukli ɖe ŋunye, eye wòklẽ ŋku ɖe ŋunye abe nye futɔ ene.

¹⁰Woke woƒe nu ɖe ŋunye baa, woɖu fewu heƒo tome nam, eye wotso ha ɖe ŋunye.

¹¹Mawu gblẽm ɖe ɖevi vloewo si me, eye wòtsɔm ɖe asi na ame vlowo.

¹²Meli bɔkɔɔ, tete wògbãm nyanyanya; elé kɔgbɔ nam, eye wòʋuʋum, eye wòtsɔm ɖo nudzidzea na eɖokui.

¹³Eƒe aŋutrɔwo blam kɔtɔɔ, ete nye ayikuwo nublanui makpɔe, eye wòtrɔ nye vevegoe kɔ ɖe anyigba.

¹⁴Ede abi ŋunye gadee de dzi, eye wòlũ de dzinye abe kalẽtɔ ene.

¹⁵Metɔ akpanya ɖe nye ŋutigbalẽ ŋu, eye metsɔ nye dzo ɖe ke me.

¹⁶Mefa avi, nye mo ɖo ʋusrã, eye ku ƒe vɔvɔli le nye aɖabawo dzi,

¹⁷evɔ wònye nu madzɔmadzɔa ɖeke mele nye asiwo me o, eye alakpa mele nye gbedodoɖa me o hafi.

¹⁸Anyigba, megatsyɔ nye nu dzi o, eye nye aʋadodo megakpɔ nɔƒea ɖeke o!

¹⁹Kpɔ ɖa, nye ɖasefo le dziƒo fifia hã, eye tanyeʋlila le dzi!

²⁰Xɔ̃nyewo le fewu ɖum le ŋunye, eye nye ŋku le aɖatsi fam na Mawu,

²¹be wòatso na ŋutsu la le eya kple Mawu dome, kple amegbetɔvi la le eya kple xɔlɔ̃a dome.

²²Elabena nye ƒe ʋeeawo le dedem, eye mayi demagbɔnugbe.