Read ewe Hiob 18 Bible Online

Hiob 18 - ewe bible

Hiob 18

¹Tete Suaxtɔ Bildad ɖo ŋu gblɔ bena:

²Ɣekaɣi miawɔ nyaʋa ase ɖo? Midze nunya gbã, emegbe hafi miaƒo nu!

³Nukaŋuti wobu mí lãwoe, eye míenye bometsilawo le mía ŋku me?

⁴Tsiã, wò amesi vuvu wò ŋutɔ ɖokuiwò le wò dɔmedzoe me, wò tae anyigba azu aƒeɖo, eye woate agakpe ɖa le eteƒea?

⁵Ke ame vɔ̃ɖi ƒe akaɖi tsina, eye eƒe dzoƒaɖe meklẽna o.

⁶Kekeli doa viviti le eƒe agbadɔ me, eye eƒe akaɖi tsina le eta me.

⁷Eƒe afɔ legbe ɖeɖe tona ɖe eme, eye eya ŋutɔ ƒe adaŋudede ƒunɛ anyi.

⁸Elabena wonyãnɛ wòtsɔa eƒe afɔ dea ɖɔ me, eye wòzɔa mɔ̃ka dzi.

⁹Adoboli miãna ɖe afɔkpo dzi nɛ, eye mɔ̃ka ɖenɛ.

¹⁰Wotrea ƒoɖetoe nɛ, eye wolia eƒe mɔ̃ de etoƒe.

¹¹Ŋɔdzidodowo doa dzikatsoƒoe nɛ, eye woyɔnɛ de nu kplikplikpli.

¹²Eƒe dzɔgbevɔ̃e tsia dɔmeɣee de eŋu, eye gbegblẽ nɔa klalo de exa.

¹³Eƒe ŋutilã ŋu nuwo duduna, eye ku ƒe ŋgɔgbevi ɖua eƒe ŋutilã ŋu nuwo.

¹⁴Woaɖee ɖa le eƒe agbadɔ, si ŋu wòle ŋu ɖom ɖo la me, eye nu akplɔe aƒu fia dziŋɔla.

¹⁵Nusi menye etɔ o la, nɔa eƒe agbadɔ me, eye wokɔa aŋɔ ɖe enɔƒe.

¹⁶Eƒe kewo kuna ɖe to me, eye eƒe alɔwo yrɔna ɖe dzi me.

¹⁷Womeɖoa ŋku edzi le anyigba dzi o, eye eƒe ŋkɔ buna le ablɔ me.

¹⁸Wotua asii tsoa kekeli me dona ɖe viviti me, eye wonyãnɛ ɖa le xexeame.

¹⁹Vi alo tɔgbuiyɔvia ɖeke manɔ esi le eƒe dukɔ dome o, eye amea ɖeke makpɔtɔ ɖe enɔƒe o.

²⁰Ɣetoɖoƒetɔwo ƒe nu aku le eƒe ŋkeke la ŋu, eye ɣedzeƒetɔwo ƒe tame able fu.

²¹Alea nu madzɔmadzɔ wɔla ƒe nɔƒewo nɔna, eye alea amesi ŋlɔ Mawu be la, ƒe teƒe nɔna.