Read ewe Hiob 20 Bible Online

Hiob 20 - ewe bible

Hiob 20

¹Tete Naamalɔ Zofar do ŋu gblɔ bena:

²Esi metsi dzi le ɖokuinye me la, eyata nye susuwo ɖo eŋu nam.

³Manɔ nya heɖeameŋu, si nye nye dzu la sem, eye wòatsɔ nya toflokowo anɔ eŋu ɖom nam.

⁴Ɖe menya nusi li tso tititi ke, esime woɖo amegbetɔwo anyigba dzi la o be:

⁵Ame vlowo ƒe aseyetsotso nu mesena yina o, eye ame vɔ̃ɖi ƒe dzidzɔ nɔa anyi aɖabaƒoƒo ɖeka koa?

⁶Ne eƒe gãnyenye de dziƒo, eye eƒe ta ɖatɔ alilikpo la,

⁷aɖo agu ɖikaa abe eƒe mi ene; eye amesiwo kpee la, abia be: Afika eyama le?

⁸Enu ayi abe drɔ̃ekuku ene, eye womagakpɔe o, eye wòabu abe zã me ŋutega ene.

⁹Ŋku, si kpɔe la, magakpɔe akpɔ o; eye enɔƒe hã magakpɔe o.

¹⁰Viawo anyo dɔme na ame dahewo, eye woƒe asi agbugbɔ eƒe kesinɔnuwo ana.

¹¹Ŋusẽ dzodzo nɔ eƒe ƒuwo ŋu, ke woa kplii womlɔ ke me.

¹²Ne nu vɔ̃ɖi vivi le nu me nɛ, eye wòɣlae ɖe eƒe aɖe te,

¹³eɖo nuxi, meɖe asi le eŋu o, eye wògblẽe ɖe eƒe veme la,

¹⁴ekema eƒe nuɖuɖu atrɔ le eƒe dɔkaviwo me azu da kpui ƒe veve ɖe dɔme nɛ.

¹⁵Emi kesinɔnu, eye ele nɛ be, wòadzɔe; Mawu aɖee atso eƒe ɖɔ me.

¹⁶Eno da kpui ƒe aɖi, eye ƒli ƒe aɖi wui,

¹⁷Makpɔ dzidzɔ le tɔʋuwo kple tɔsisiwo, esiwo me anyitsi kple notsi kpekẽ le sisim la la ŋu o.

¹⁸Egbugbɔ nusi wòwɔ ɖɔ kpɔ la na, eye memii o; eye mekpɔ dzidzɔ le nusi wòɖɔ li la ŋu o.

¹⁹Elabena ete ame dahe ɖe anyi, eye wògblẽe ɖi; exɔ xɔ, si metu o la sesẽe.

²⁰Elabena atsi dzodzodzoe le eɖokui me, ke matsɔ eƒe nu veviwo aɖe eɖokuii o.

²¹Naneke mekpɔtɔ o le eƒe nutsuɖuɖu la, eyata eƒe dzɔgbenyuie matɔ ɖi o.

²²Ne nu bɔ ɖe esi kpaŋ la, ŋɔdzi alée be, hiãtɔwo ƒe asiwo katã le ye dzi va ge.

²³Esime wòle eƒe ƒoɖo yɔm kple nuɖuɖu la, eɖe ga eƒe dɔmedzoe heliheli la ɖe eŋu, eye wòna wòdza ɖe edzi le nuaɖuƒe.

²⁴Ne esi le ga yibɔ lãnu nu la, ekema akɔblida aƒo ɖee.

²⁵Ehoe wòdo le eƒe lã me, eye esi ga dadzo la ɖo tso eƒe vevegoe me la, ŋɔdzi lée.

²⁶Wodzra vivitiwo katã ɖo ɖi ɖe eƒe kesinɔnuwo ŋu; dzo, si womeƒlɔ ɖo o la, fiãe, eye wòɖuɖɔ nusi kpɔtɔ ɖe eƒe agbaɖɔ me la ƒiaƒiaƒia!

²⁷Dziƒo aklo nu le eƒe vodada dzi, eye anyigba atso ɖe eŋu.

²⁸Wòalɔ eƒe me gblemenuwo adzoe, eye wòado dzodzo yayaya le Mawu ƒe dɔmedzoe ŋkeke la dzi.

²⁹Esia nye ame vlo ƒe gome tso Mawu gbɔ kpakple domenyinu, si woɖo ɖi nɛ tso Mawu gbɔ.