Read ewe Hiob 21 Bible Online

Hiob 21 - ewe bible

Hiob 21

¹Tete Hiob ɖo ŋu gblɔ bena:

²Oo, misee, mise nye nuƒoƒo dzro, eye esia anye miaƒe akɔfaname.

³Migbɔ dzi ɖi nam, ne maƒo nu vɔ, hafi miaɖe alɔme le ŋunye.

⁴Amewo ŋue mele konyi fam ɖo loo, eye nukaŋuti magbɔ dzi ɖi ɖo?

⁵Mitrɔ ɖe ŋunye, eye miaƒe nu neku, eye mitsɔ asi ɖo nu!

⁶Hm, ne meɖo ŋku edzi la, vɔvɔ̃a ɖoam, eye nye lãme blea fu.

⁷Nukaŋuti ame vɔ̃ɖiwo tsia agbe, wokua amegã, eye woƒe ŋusẽ dzina ɖe edzi?

⁸Wo viwo lia ke le wo gbɔ kple woƒe dzidzimeviwo le wo ŋku me.

⁹Woƒe aƒewo nɔa ŋutifafa me, ŋɔ medzia wo o, eye Mawu ƒe atam mevaa wo dzi o.

¹⁰Eƒe nyitsu yɔa asi, eye menyea dzodzro o; eƒe nyinɔ dzia vi, eye fu megena le eƒo o.

¹¹Woɖea woƒe ŋutsuviwo doa goe abe lãha ene, eye wo viwo nɔa adzrɔ ɖim.

¹²Wonɔa ha dzim ɖe gakogoe kple gakasaŋku ŋu, eye wonɔa dzidzɔ kpɔm ɖe dze ƒe ɖiɖi ŋu.

¹³Woɖua woƒe ŋkekewo le dzidzɔ me, eye le adahaƒoƒo ɖeka me woɖoa agu yia tsiẽƒe.

¹⁴Ke wogblóna na Mawu be: Te ɖa le mía gbɔ, míele naneke dim, be míanya le wò mɔwo ŋu o.

¹⁵Ameka nye ŋusẽkatãtɔ, ne míasubɔe, eye viɖe ka wònye na mí, ne míaɖe kuku nɛ?

¹⁶Kpa ɖa, woƒe dzɔgbenyuie mele wo si me o; eyata ame vɔ̃ɖiwo ƒe adaŋudede nede megbe xaa tso gbɔnye!

¹⁷Zi nenie ame vɔ̃ɖiwo ƒe akaɖi mehetsina, eye woƒe gbegblẽ mehevaa wo dzi o? Emãa woƒe gome na wo le eƒe dɔmedzoe me,

¹⁸be woanɔ abe gbe ƒuƒu le ya nu ene, abe tsro, si ahom kplɔna dzonae ene.

¹⁹Mawu ɖo nuxi dzɔgbevɔ̃e ɖi na viawo. Aɖo eteƒe nɛ, be wòa ʋẽe ase!

²⁰Eƒe ŋkuwo akpɔ eya ŋutɔ ƒe gbegblẽ, eye wòano ŋusẽkatãtɔ ƒe dziku heliheli la.

²¹Elabena eƒe aƒe me nya ka tsɔ egbɔ le emegbe, nenye be, wotsi eƒe dzinuwo ƒe xexlẽme nu?

²²Ɖe wobe, yewoafia nunya Mawu, eya amesi drɔ̃a ʋɔnu dziƒotɔwoa?

²³Amea ɖe ku, esime wole dzɔgbenyuie geɖe me, esime wòɖe dzi ɖi, eye wòli bɔkɔɔ;

²⁴eƒe zewo yɔ fũ kple notsi, eye ami yɔ eƒe ƒuto me.

²⁵Ke ame bubu ku, esime eƒe luʋɔ le nu xam, eye mede nu nu nyui ŋu kpɔ o.

²⁶Wo kple eve la womlɔ wo nɔewo gbɔ le ke me, eye nyẽwo ɖi ba ɖe wo dzi.

²⁷Kpɔ ɖa, menya miaƒe susuwo kple tame vɔ̃, siwo ɖom miele ɖe ŋunye.

²⁸Ne miele gbɔgblɔm be, afika ŋutasẽla ƒe aƒe le, eye afika agbadɔ, si me ame vɔ̃ɖiwo nɔ la, le hã la,

²⁹ɖe miebia mɔzɔlawo se, eye mielé to ɖe woƒe nuteƒekpɔkpɔwo ŋu be,

³⁰wokpɔa ame vɔ̃ɖi ta le gbegblẽɣi, eye wotsonɛ ɖi le dɔmedzoedogbe oa?

³¹Ameka agblɔ eƒe zɔzɔme ɖe ŋku me nɛ kaŋ, eye ne eƒo nu la, ameka aɖo eteƒe nɛ?

³²Emegbe wokplɔnɛ ɖo yia yɔdo gbɔe, eye woganɔa eƒe yɔɖo ŋu dzɔm.

³³Bali me anyikɔwo vivi enu, eye xexeame katã tsɔ eƒe afɔ, abe alesi wodo ŋgɔ nɛ bibibi ene.

³⁴Aleke mianɔ akɔ fam nam ɖe ya me? Miaƒe ŋuɖoɖowo la, alakpa ɖeɖe ko wonye.