Read ewe Hiob 22 Bible Online

Hiob 22 - ewe bible

Hiob 22

¹Eye Temanitɔ Elifaz ɖo ŋu gblɔ bena:

²Ɖe ŋutsu enye viɖenu na Mawua? Kpao, boŋ nunyala enye viɖenu na eya ŋutɔ ɖokui ko.

³Ne ènye ame dzɔdzɔe la, ɖe ŋusẽkatãtɔ tsɔ ɖe le emea? Eye ne fɔɖiɖi mele wò zɔzɔme ŋu o la, viɖe ka wònye nɛ?

⁴Ɖe wòle to hem na wò le wò mawuvɔvɔ̃ ta, eye wòkplɔ wò yi ʋɔnuia?

⁵Ɖe wò nu vɔ̃ɖi wɔwɔ mekeke ta, eye seƒeɖo meli na wò vodadawo oa?

⁶Elabena èxɔ awɔbanu le nɔviwòwo si yakatsyɔ, eye nèɖe avɔ le avɔkoewɔlawo ŋu.

⁷Mèna tsi amesiwo gbafa ƒo la wono o, eye nète abolo dɔwuitɔwo.

⁸Ŋutsu alɔkpa sesẽ tɔ tɔ enye anyigba la, eye ame ŋkutatɔ anɔ edzi.

⁹Eɖo ahosiwo ɖa asi gbɔlo, eye wogbã alɔ na tsyɔeviwo.

¹⁰Eyata adoboliwo kpe ta ɖe ŋuwò godoo, eye vɔvɔ ɖo dzikatsoƒoe na wò zi ɖeka.

¹¹Mèle viviti kple tsiɖɔɖɔ, si nyè tsyɔ dziwò la, kpɔm oa?

¹²Ɖe Mawu mekɔ abe dziƒo ene oa? Eye kpɔ alesi ɣletivi kɔkɔtɔwo gbɔ metsɔe o ɖa!

¹³Eye wòa nele gbɔgblɔm be: Nuka Mawu nya? De wòate ŋu adrɔ̃ ʋɔnu to alilikpo dodo mea?

¹⁴Alilikpowo xe eŋku me, ale be mele nu kpɔm o, eye wòle tsatsam le dziƒo ƒe goawo dzi.

¹⁵Ɖe nèbe, yealé blemamɔ, si ame gbegblẽwo zɔ la, me ɖe asia?

¹⁶Amesiwo wotsrɔ̃ ɖa, hafi woƒe ɣeyiɣi la ɖo edzi, eye woƒe agunu lolo zu tɔsisi.

¹⁷Amesiwo gblɔ na Mawu be: Te ɖa le mía gbɔ, nuka ŋusẽkatãtɔ awɔ mí hã?

¹⁸Evɔ wonye etsɔ kesinɔnuwo yɔ xɔ na wo taŋ hafi. Ame vɔ̃ɖiwo ƒe adaŋudede nede megbe xaa tso gbɔnye!

¹⁹Ame dzɔdzɔewo akpɔ eteƒe; eye dzi adzɔ wo, eye ame maɖifɔ aɖu fewu le wo ŋu be:

²⁰Wotsrɔ̃ míaƒe adikãtɔwo vavã, eye dzo fiã woƒe nuwo!

²¹Dze xɔlɔ̃ kplii, eye ŋuwò afa, elabena to esia me dzɔgbenyuie ava dziwò.

²²Xɔ nufiafia tso eƒe nu me, eye eƒe nuƒoƒo nede dzigbɔ na wò!

²³Ne ètrɔ de ŋusẽkatãtɔ ŋu, eye nèbɔbɔ ɖokuiwò ɖe anyi la, ne èɖe nu manyomanyo ɖa le wò agbadɔ me,

²⁴eye nètsɔ to me sika kɔ ɖe ke me kple Ofir-sika kɔ ɖe tɔʋu ƒe kpekuiwo me la,

²⁵ekema ŋusẽkatãtɔ anye sika kple klosalo na wò gleglegle.

²⁶E, ekema àkpɔ dzidzɔ le ŋusẽkatãtɔ ŋu, eye àwu wò mo dzi na Mawu.

²⁷Ne edo gbe ɖa nɛ la, aɖo to wò, eye àwɔ wò adzɔgbeɖeɖe dzi.

²⁸Ne èɖo nane ɖe tame la, adze edzi na wò, eye kekeli aklẽ ɖe wò mawo dzi.

²⁹Ne wole to yim la, ekema ãgblɔ be: Míva dzi! Exɔna na amesi bɔbɔ eɖokui ɖe anyi.

³⁰Aɖe ame ɖifɔ hã; eye woaɖee le wò asiwo ƒe dzadzɛnyenye ta.