Read ewe Hiob 31 Bible Online

Hiob 31 - ewe bible

Hiob 31

¹Mebla nu kple nye ŋku, eye aleke lawɔ malé ŋku ɖe ɖetugbi ŋu?

²Nuka ahanye nye gome mo Mawu gbɔ le dzi me, kpakple nye domenyinu tso ŋusẽkatãtɔ gbɔ le dziƒo ʋi ma?

³Ɖe gbegblẽ mevaa ame vɔ̃ɖi dzi, eye dzɔgbevɔ̃e vaa nu vɔ̃ɖi wɔlawo dzi oa?

⁴Ɖe mele nye mɔwo kpɔm, eye wòxlẽa nye afɔɖeɖewo katã oa?

⁵Nenye ɖe metsɔ aʋatsokaka ɖo dɔe, eye nye afɔ tsona ɖe alakpadada ŋu la,

⁶ekema nedam le nudanu nyuitɔ dzi, eye Mawu nadze si nye fɔmaɖimaɖi.

⁷Ne nye afɔ da le mɔ dzi, nye dzi dze nye ŋku yome, eye ɖinuwɔwɔa ɖe le ɖe asi ŋu nam la,

⁸ekema maƒã nu, eye ame bubu naɖui, eye woaho nye nu miemiewo kple ke.

⁹Ne woflu nye dzi ɖe nyɔnu ŋu, eye mede xa ɖe hanyevi ƒe ʋɔtru nu la,

¹⁰ekema srɔ̃nye netu wɔ na ame bubu, eye ame tutɔ nedɔ egbɔ.

¹¹Elabena ŋukpenanu enye esia, eye se me dzedze wònye le ʋɔnudrɔ̃lawo ŋku me.

¹²E, dzo wònye, si abi nu vaseɖe tsiẽƒe ke, eye wòafiã nye agblemenuwo katã kple ke.

¹³Ne nye dɔlaŋutsu kple nye dɔlanyɔnu do nya me kplim, eye megbe woƒe nya dzɔdzɔe la,

¹⁴nuka mawɔ, nenye be, Mawu tso? Eye ne edzro eme kpɔ la, aleke made eŋu nɛ?

¹⁵Ɖe menye amesi mem ɖe vidzidɔ me la, me eya hã, eye ame ɖekae wɔ mí ɖe dɔme oa?

¹⁶Ɖe mete ame dahewo ƒe nudidi wo, eye mene nu ti kɔ na ahosiwo ƒe ŋkuwoa?

¹⁷Ɖe nye ɖeɖe meɖu nu, eye nyemena tsyɔ̃evi ɖul kplim oa?

¹⁸Kpao, ke boŋ enɔ gbɔnye tsi tso nye ɖevime abe fofoa gbɔ ene, eye tso keke danye ƒe dome ke mefia mɔnui.

¹⁹Ne mekpɔ ame ɖoko avɔ mele eŋu o, eye nutsyɔtsyɔ mele ame dahe si o la,

²⁰ɖe eƒe alime meyram, eye nye alẽwo ƒe tu de dzo lãme nɛ oa?

²¹Ne menye nye asi de tsyɔ̃evi ŋu, le esi xɔnamelɔ le asinye le dua me ta la,

²²ekema nye abɔta nege le abɔgba ŋu, eye nye abɔ netu ɖa le ekpeƒe!

²³Elabena gbegblẽ, si tso Mawu gbɔ la, do ŋɔdzi nam, eye nyemate ŋu anɔ te de eƒe gãnyenye nu o.

²⁴Ne meɖo dzi ɖe sika ŋu, eye megblɔ na sika nyuitɔ be: wò ŋue mele ŋu ɖom ɖo;

²⁵ne mekpɔ dzidzɔ be, nye kesinɔnuwo sɔ gbɔ, eye nye alɔ wɔ dɔ kpɔ nu geɖe;

²⁶ne mekpɔ alesi ɣe le keklẽmi, kple alesi dzinu le yiyim le atsyɔ̃ mee,

²⁷eye woflu nye dzi le adzame megbugbɔ nye asi ŋu na wo la,

²⁸ekema esia hã anye se me dzedze le ʋɔnudrɔ̃lawo ŋku me; elabena meda alakpa na Mawu le dzi.

²⁹Ɖe mekpɔ dzidzɔ le nye ketɔ ƒe dzɔgbevɔ̃e ŋu, eye meti kpo, esime vɔ dzɔ ɖe edzia?

³⁰Kpao, nyemena nye nu wɔ nuvɔ̃ o, eye nyemedi eƒe ku to ɖiŋudodo nɛ me o.

³¹Ɖe aƒenye me tɔwo menɔa gbɔgblɔm bena: Amekae meɖu eƒe lã ɖi ƒo oa?

³²Amedzro metsia xexe dɔna o, ke boŋ meʋua nye ʋɔ na mɔzɔla.

³³Ɖe metsyɔ nu nye dzidadawo dzi abe amegbetɔ ene, eye meɣla nye fɔɖiɖi ɖe akɔnua?

³⁴Ɖe menɔa ame geɖewo vɔ̃m, eye ƒomewo ƒe vlododo nɔa ŋɔ dzim nam, eyata ɖoɖoe zina le ŋunye, eye nyemedona ɖe ʋɔtru nu oa?

³⁵Oo, ɖe amea ɖe naɖo tom! Kpɔ ɖa, nye nuŋɔŋlɔ enye si, ŋusẽkatãtɔ neɖo eŋu nam! Nye adikãtɔ ƒe nuŋɔŋlɔ ɖe?

³⁶Vavã, malée ɖe abe, eye maxatsae ɖe ta abe atsyɔ̃ɖonu ene.

³⁷Mato nye afɔɖeɖewo ƒe xexlẽme nɛ, eye mate ɖe eŋu abe amegã ene.

³⁸Ne nye agble nɔa ɣli dom ɖe ŋunye, eye eƒe boliƒowo kalã nɔa avi fam,

³⁹ne meɖu eme nu femaxemaxe, eye mene gbɔgbɔ ɖo le agbletɔ me la,

⁴⁰ekema ŋu nemie ɖe lu teƒe, eye gbe vɔe nemie ɖe ƒo teƒe! Hiob gblɔ eƒe nya vɔ.