Read ewe Hiob 32 Bible Online

Hiob 32 - ewe bible

Hiob 32

¹Eye ŋutsu etɔ̃awo dzudzɔ nya ŋuɖoɖo na Hiob, elabena edo eɖokui ame dzɔdzɔe.

²Tete dzi ku Elihu, Buzitɔ Baraxel ƒe vi, amesi tso Ram-ƒome la me la; Hiob ŋue dzi kui ɖo, elabena ebu eɖokui dzɔdzɔetɔe wu Mawu;

³eye exɔlɔ̃ etɔ̃awo ŋue dzi kui do, elabena womekpɔ nyaa ɖeke aɖo ŋu atsa abu fɔ Hiob o.

⁴Ke Elihu tsɔ nyawo le Hiob dzɔmi, elabena ame kemeawo nye xoxo nɛ.

⁵Eye esi Elihu kpɔ be, nya ŋuɖoɖo vɔ le ŋutsu etɔ̃awo nu la, dzi kui.

⁶Eye Buzitɔ Elihu, Baraxel vi la, xɔ dzi gblɔ bena: Ɖevi menye, ke miawo mietsi ƒo wɔ, eya ta dzi mele ƒonye o, eye mele vɔvɔ̃m be, maɖe nye nunyanya afia mi.

⁷Mebu be: Tsitsi neƒo nu, eye ƒe geɖe nede nunya fia!

⁸Ke gbɔgbɔ la le amegbetɔwo me, eye ŋusẽkatãtɔ ƒe gbɔgbɔ fia nunya wo.

⁹Nunya mele tsitsi me o, eye menye amegã ɖeɖiwo koe nyaa nusi le teƒe la o.

¹⁰Eyata mebe, mido tom, nye hã made nye nunyanya afia!

¹¹Kpɔ ɖa, medzɔ míaƒe nyawo sinu, eye melé to ɖe miaƒe gɔmesesewo ŋu, be miakpɔ nya vavãa ɖe hĩ!

¹²Melé ŋku ɖe mia ŋu, ke mia dometɔa ɖeke mena Hiob ƒe nu ɖe ga alo ɖo eƒe nyawo ŋu nɛ o.

¹³Ɖeko migagblɔ bena: Míedo go nunya, Mawu koe akpe ɖe dzi, menye amegbetɔ o.

¹⁴Ke medo nyaa ɖeke ɖe gbɔnye o; eye menye miaƒe nyawo tsɔ ge mala aɖo eŋu nɛ o.

¹⁵Dzi ɖe le wo ƒo, womagate ŋu aɖo eŋu o, eye gbɔgblɔ bu ɖe wo.

¹⁶Eye ɖe nyea manɔ lalam, esi womele nu ƒom o, wozi ɖoɖoe, eye nya ŋuɖoɖo megale wo ŋu o laa?

¹⁷Nye hã maɖo tɔnye nua ŋu, eye maɖe nye nunya afia!

¹⁸Elabena nya yɔm banaa, eye helehele tsi akɔta nam.

¹⁹Kpɔ na, nye dɔme le abe wein, si nu wotu nu ɖo la ene, eye wòbe, yeawó abe lãgbalẽgolo yeye ene.

²⁰Maƒo nu, ne nye akɔta nave; make nye nuyiwo, eye maɖo eŋu.

²¹Nyemade ame dzi o, eye nyemavivi nume na amea ɖeke o.

²²Elabena nyemenya alesi wovivia numee o; anye, ne nye wɔla aɖem ɖa bɔbɔe.