Read ewe Hiob 34 Bible Online

Hiob 34 - ewe bible

Hiob 34

¹Eye Elihu xɔ dzi gblɔ bena:

²Mi nunyalawo, mise nye nyawo, eye mi nugɔmeselawo, milé to ɖe ŋunye!

³Elabena to doa nya kpɔna, abe alesi veme ɖɔa nuɖuɖu kpɔna ene.

⁴Mina míahe nya dzɔdzɔe atu anyi, ne míadze si nusi nyo la le mía dome.

⁵Elabena Hiob be: „Tɔnye dzɔ, gake Mawu gbe afiatsotso nam;

⁶wobum aʋatsokalae, evɔ wònye tɔnye dzɔ hafi: gbedala meli na nye aŋutrɔbi o, evɔ wònye nyemeda vo o hafi.“

⁷Afika amea de le abe Hiob ene, amesi le ɖiŋudoname nom abe tsi ene,

⁸eya kple ame vlowo le ha bɔm, eye eya kple ame vɔ̃ɖiwo le afɔ ɖeka dzi?

⁹Elabena egblɔ be: „Menye viɖe na amegbetɔ, ne edze xɔlɔ̃ kple Mawu o.“

¹⁰Eyata, mi ŋutsu nunyalawo, milé to ɖe ŋunye! Nede megbe xaa be, Mawu nawɔ nu vɔ̃ɖi, eye ŋusẽkatãtɔ nawɔ nu madzɔmadzɔ;

¹¹ke boŋ eɖoa eteƒe na amegbetɔ le eƒe nuwɔwɔ nu, eye wònana wòvaa me na ŋutsu le eƒe zɔzɔme nu.

¹²Nyateƒee, Mawu mewɔa nu vɔ̃ɖi o, eye ŋusẽkatãtɔ la metea nya dzɔdzɔe ɖe to o.

¹³Ameka tsa anyigba ɖe asi nɛ, eye ameka ɖo xexeme godoo la gɔme anyi?

¹⁴Ne edia eɖokui tɔ ko, eye wògbugbɔ eƒe gbɔgbɔ kple eƒe agbe gagbɔ ɖe eɖokui me la:

¹⁵ekema ŋutilãwo katã nu ayi, eye amegbetɔ agazu ke.

¹⁶Ne nunya le asiwò la, ekema se nya siawo, eye nalé to ɖe nye nyawo ƒe ɖiɖi ŋu!

¹⁷Ɖe amesi lé fu nya dzɔdzɔe la, ale ŋu aɖu dzia? Eye ɖe nébe, yeabu fɔ dzɔdzɔetɔ, si nye ŋusẽtɔ la?

¹⁸Ɖe wokpɔ mɔ agblɔ na fia be: yakame, eye na amegã be: ame vɔ̃ɖia?

¹⁹Eya, amesi medea amegãwo dzi o, eye meɖia kesinɔtɔwo ƒe nya wua ame dahewo tɔ o, elabena wo katã la eƒe asinudɔwɔwɔ wonye.

²⁰Woku ɖe aɖabaƒoƒo ɖeka me, dukɔwo ƒe mo tsyɔ zi le zãtiƒe, eye wo nu vi: woɖe ŋusẽtɔwo ɖa, ke menye to amegbetɔwo ƒe asi dzi o.

²¹Elabena etsɔ ŋku ɖo amegbetɔ ƒe mɔwo ŋu, eye wòle eƒe afɔɖeɖewo katã kpɔm.

²²Viviti kple blukɔa ɖeke meli, si me nu vɔ̃ɖi wɔla abe ɖo o.

²³Elabena meɖoa ŋkeke na amegbetɔ, be wòava ʋɔnu le Mawu ŋku me o.

²⁴Egbãa ŋusẽtɔwo gudugudu, eye wòtsɔa bubuwo ɖoa wo teƒe.

²⁵Esi wònya woƒe nuwɔnawo la, eyata wòtua asi wo ƒua anyi le zã me, eye woagbã gudugudu.

²⁶Eƒoa wo abe ame vɔ̃ɖiwo ene le dutoƒo;

²⁷elabena wode megbe le eŋu, eye womelé ŋku ɖe eƒe mɔwo ŋu o,

²⁸eye womehe ame dahewo ƒe ɣlidodo va eŋku me, ne wòase hiãtɔwo ƒe ɣlidodo o.

²⁹Ne ena gbɔɖeme va aƒe la, ameka abu fɔe? Eye ne eɣla eƒe mo la, ameka ate ŋu akpɔe? Ke eƒe ŋkn le dukɔwo kple amegbetɔwo katã ŋu,

³⁰be ame vlowo magaɖu dzi, eye woanye mɔ̃ka na dukɔ la o.

³¹Ɖe amea ɖe gblɔ na Mawu kpɔ be: Mekpe fu, evɔ wònye nyemewɔ vɔ̃a ɖeke o hafia?

³²Nusi kpɔm nyemele o la, fiaem, eye ne mewɔ nu madzɔmadzɔa ɖe la, nyemagawɔe azɔ oa?

³³Ɖe wòaɖo eteƒe le wò susu nua? Wò ŋue nu mele dzedzem o, eyata kpɔ eme natsɔ, menye nye o. Eye ne ènya nane la, gblɔe!

³⁴Nugɔmeselawo kple nunyala, siwo le to ɖomem la agblɔ nam be:

³⁵„Nunya mele Hiob ƒe nuƒoƒo me o, eye tamebubua ɖeke mele eƒe nyawo me o.

³⁶Oo, ɖe woate Hiob akpɔ atraɖii le ŋuɖoɖo, si wòna abe eme vlowo ene la ta!

³⁷Elabena etsɔ vɔ̃ɖiwɔwɔ kpe ɖe eƒe nuvɔ̃wo ŋu, ele alɔme ɖem le mía dome, eye wòle nu geɖe ƒom ɖe Mawu ŋu.