Read ewe Hiob 37 Bible Online

Hiob 37 - ewe bible

Hiob 37

¹Ẽ, esia na nye dzi lã kpokpokpo, eye wòbu ɖe dɔ me nam.

²Oo, mise eƒe gbeɖeɖe hoo kple bublu, si dona tsoa eƒe nu me la ɖa!

³Eɖea asi eŋu ɖona ɖe dziƒo blibo la te, eye eƒe dzikedzo dea anyigba ƒe mlɔeanu.

⁴Emegbe wòxlɔ̃na, eye wòɖea gbe fiatɔe, naneke mexea mɔ nɛ o, ke boŋ wosea eƒe gbe.

⁵Mawu ɖea gbe nukutɔe, ewɔa nu gã, si mele nyanya me o.

⁶Elabena egblɔna na sno bena: Dza ɖe anyigba dzi! eye na tsidzadza gã be: Ɖuɖu yoo!

⁷Enana amewo katã dea asi asitɛ me, ne amegbetɔwo katã nadze si eƒe nuwɔwɔ.

⁸Gbemelã yia bebeƒe, eye wògbɔna ɖe eme le emlɔƒe.

⁹Ahom tsoa dziehe, eye vuvɔ tsoa anyiehe.

¹⁰Mawu ƒe ƒuƒu nana tsi blana, eye tɔ kekewo ƒoa ƒu ɖeka.

¹¹Etsɔa tsi ɖoa agba na alilikpowo, eye eƒe dzikedzo kakaa alilikpowo me,

¹²eye wòtrɔna ƒoa xlã godoo le eƒe kpɔkplɔ nu, ne wòawɔ nusiwo katã woɖo nɛ la le anyigba bliboa dzi.

¹³Enana wòvana, ne wòatsɔe ahe to na anyigba dzi nɔlawo loo, alo ne wòawɔ dɔmenyo na woe.

¹⁴Hiob, lé to de esia ŋu, zi ɖoɖoe, eye nalé ŋku de Mawu ƒe nukunuwo ŋu!

¹⁵Enya alesi Mawu dɔa dɔwoe, eye wònana kekeli dona tsoa eƒe alilikpowo mea?

¹⁶Ɖe enya alesi alilikpowo nɔa agba sami, nusi nye nunyala ŋutɔŋutɔ ƒe nukunuwɔwɔa?

¹⁷Wo, amesi ƒe awuwo xɔa dzo, nenye be, dzieheya na anyigba ɖo ho anyi la,

¹⁸mi kpakpliie xa dziŋgɔli, si le abe ahuhɔ̃e, si wokɔ ene la gobaa?

¹⁹To nusi míaɖagblɔ nɛ la, na mi! Elabena míate ŋu ahe nyaa ɖeke ayi eŋku mee o le míaƒe viviti la ta.

²⁰Ɖe woaɖagblɔ nɛ be, mele nu ƒo gea? Alo ɖe amea ɖe bi be, woatsrɔ̃ea?

²¹Eye azɔ womele kekeli, si le keklẽm le alilikpowo me la, kpɔm o; ke ne ya ƒo to edzi la, eŋu kɔna.

²²Sika tsoa anyiehe, eye atsyɔ̃ɖoɖo, si dzia ŋɔ la, le Mawu ŋu.

²³Ŋusẽkatãtɔ la, amea ɖeke matui o, eƒe ŋusẽ tri akɔ, ke metea se kple dzɔdzɔenyenye blibo ɖe to o.

²⁴Eyata amegbetɔ navɔ̃e. Meléa ŋku ɖe amesiwo katã bua wo ɖokui nunyalawoe la ŋu o.