Read ewe Hiob 38 Bible Online

Hiob 38 - ewe bible

Hiob 38

¹Eye Yehowa ɖo ŋu na Hiob le dziya me gblɔ bena:

²Amekae tsɔ nuƒoƒo, si nunyaa ɖeke mele eme o la, blu aɖaŋuɖoɖo mee?

³Tso, nasa avɔ ɖe ali abe ŋutsu ene; mabia nya wò, eye nafia num!

⁴Afika nènɔ, esime meɖo anyigba gɔme anyi? Ne nunya le tagbɔ na wò la, ekema gblɔe!

⁵Ameka ɖo eƒe dzidzeme? Enyae tso! Alo ameka da dzidzeka nɛ?

⁶Nuka dzi wodo egɔme anyi do, eye ameka ɖo eƒe dzogoedzikpe,

⁷esime ŋukeɣletiviwo katã le aseye tsom, eye Mawu ƒe viwo katã gli kple dzidzɔa?

⁸Ameka tso ʋɔtruwo xe mɔ na atsiaƒu, esime wòdo tso vidzidɔ me?

⁹Esime metsyɔ alilikpo nɛ, eye medzii goŋgoŋ ɖe blukɔ me;

¹⁰meɖo liƒo nɛ, eye mede gameti kple agbo enu

¹¹hegblɔ bena: Afii nava se ɖo, eye mayi ŋgɔ o; eye afii wò tsotsoe kpakawo aƒo ɖoa?

¹²Le wò agbe me ŋkekewo me la, ɖe nèɖe se na ŋɖi kpɔ, eye néfia agudzedze ƒe nɔƒee,

¹³ne wòalé anyigbatoga aʋuʋu ame vɔ̃ɖiwo ɖa le eŋua?

¹⁴Etrɔna abe tsu, si wonyã ene, eye nɔnɔmewo tsia anyi abe avɔ ene.

¹⁵Woaxɔ kekeli le ame vɔ̃ɖi si, eye woaŋe abɔ, si woɖo ɖe dzi la.

¹⁶Ɖe nede atsiaƒu dzɔƒe, eye nèzɔ egɔme kpɔa?

¹⁷De woʋu ku ƒe agbo na wò, eye nekpɔ blukɔ tsiɖitsiɖi ƒe agbo kpɔa?

¹⁸Ekpɔ anyigba ƒe kekemea? Ne enya nusiawo katã la, gblɔe!

¹⁹Kekeli gbɔ mɔ ɖe, eye afika nye viviti ƒe nɔƒe,

²⁰ne nakplɔ wo ayi woƒe liƒo dzii, eye nanya woƒe aƒe gbɔ mɔa?

²¹Enyae tso, elabena ɣemaɣi wodzi wò, eye wò ŋkekewo ƒe xexlẽme sɔ gbɔ!

²²Ɖe nède afisi wodzra sno ɖo, eye nèkpɔ afisi woƒo dzikpewo nu ƒu do,

²³esiwo metu do ɖe xaxaɣi, avuwɔgbe kple aʋakpegbe ŋua?

²⁴Mɔ ka kekeli mãna tona, eye afika ɣedzeƒeya tona kakana ɖe anyigba dzi?

²⁵Ameka ɖo toƒe na tsidzadza gãwo kple mɔ na dziɖegbe kple dzikedzo,

²⁶ne tsi nadze ɖe anyigba, si dzi amegbetɔ mele o, kple gbedadaƒo, afisi amea ɖeke mele o,

²⁷ne woana tagba kple gbegbe naɖi kɔ, eye gbe mumu namie?

²⁸Ɖe fofo li na tsidzadza, eye zãmũ ƒe tagegewo la, ameka dzi wo?

²⁹Ameka ƒe dɔ mee tsi babla tso, eye ameka dzi dziƒo ƒe miãtsi bablawo?

³⁰Tsiwo lía abe kpe ene, eye tɔwo ŋgɔ bla ɖekae.

³¹Wòe saa atifieŋuwo ƒe ka, alo wòe ɖea ka avũ kple avũtɔa?

³²Wòe kplɔa ŋukeɣletivi doa goe, eye wòe kplɔa koklovinɔ kple viawoa?

³³Enya dziƒo ƒe sewoa, alo wòe ɖoa eƒe dziɖuɖu ɖe anyigba dzia?

³⁴A le ŋu aɖe gbe na alilikpo be, tsi geɖe nanyẽ atsyɔ dziwòa?

³⁵Ate ŋu ada dzikedzowo, eye woayi ava gblɔ na wò be: Míawoe nye esia?

³⁶Ameka tsɔ nunya ɖo alilikpo tsiɖitsiɖi me, eye ameka na gɔmesese yamenuwo?

³⁷Ameka tsɔ nunya xlẽ alilikpowoe, eye ameka trɔ dziƒotsigoewo ƒo ɖe anyi,

³⁸ale be anyigba wɔ agbi heƒuna, eye anyikɔwo léna ɖe wo nɔewo ŋu?

³⁹Wòe kaa ade na dzatanɔ, eye nèfaa dɔwuame nu na dzataviwo,

⁴⁰ne wotsyɔ akɔ anyi ɖe dowo me, eye wode xa ɖe avedodoewo mea?

⁴¹Ameka ɖaa nuɖuɖu na akpaviã, ne viawo le ɣli dom na Mawu, eye wole tsa glãla tsam nuɖuɖu makpɔmakpɔe?