Read ewe Hiob 39 Bible Online

Hiob 39 - ewe bible

Hiob 39

¹Ènya agamegbɔ̃ewo ƒe vidziɣia? eye ɖe nèdze si ɣeyiɣi, si fu ɖua zinɔwoa?

²Exlẽ dzinu, alesi fu nɔa wo ƒom eye ènya ɣeyiɣi, si wodzia via?

³Wodzea klo heda wo viawo ɖi, eye wovona tso woƒe vevesesewo me.

⁴Ŋusẽ ɖoa wo viawo ŋu, eye wotsina le gbe me, wodzona, eye womegagbɔna vaa wo gbɔ o.

⁵Ameka na ablɔɖe gbetedzi? Eye ameka tu ka gbetedzi,

⁶si metsɔ gbegbe wɔ aƒe na, eye metsɔ dzeƒe wɔ eƒe nɔƒee?

⁷Du me howɔwɔ le kokoe ɖim nɛ, eye mele kplɔla ƒe ɣlidodo sem o.

⁸Ele ŋu tsam na gbeɖuƒe le towo dzi, eye wòle gbe mumu ɖesiaɖe yome mɔ dim.

⁹Ɖe tò alɔ̃ asubɔ wò kpoo, eye wòatsi wò lãto gbɔ adɔa?

¹⁰Ɖe àte ŋu ade ka tò ɖe agbleŋlɔnu ŋu, alo wòagudu bali me le yowòmea?

¹¹Ɖe naɖo ŋu ɖe eŋu, le esi ŋusẽ kako le esi ta, eye natsɔ wò dɔ agblẽ ɖe esi mea?

¹²Ɖe naɖo dzi ɖe eŋu be, atsɔ wò agblemenuwo ava aƒee, eye wòaƒo wo nu ƒu ɖe wò ava mea?

¹³Golonɔ ƒoa aʋala kpakpakpa, ke damixe ƒe aʋala kple fu ye wònyea?

¹⁴Kpao, hafi boŋ eɖaa eƒe azi ɖe anyigba, eye wònana ke dzodzoe ƒoa wo;

¹⁵ke eŋlɔnɛ be, be woaɖo afɔ edzi, eye gbemelãwo agbãe.

¹⁶Esẽa ŋuta le viawo ŋu, abe menye eto wonye o ene; eye ne eƒe agbagbadzedze zu dzodzro ha la, ŋɔ medzinɛ o.

¹⁷Elabena Mawu na nunya bu ɖee, eye mena gɔmesesea ɖekee o.

¹⁸Ne edzo ʋanana la, ekoa sɔ kple edola.

¹⁹Wòe na ŋusẽ sɔa, eye wòe tsa kɔdza tsyɔ kɔ ŋu nɛa?

²⁰Wòe na wòdzoa kpo abe ʋetsuvi enea? Eƒe gbagba fuxefuxe enye ŋɔdzi.

²¹Ele anyigba kam, ekpɔa dzidzɔ le eƒe ŋusẽ ŋu, eye wòyina ɖakpea akpablalawo.

²²Vɔvɔ̃ ɖoa nukokoe ne, ŋɔ medzinɛ o, eye metrɔa megbe dea yi o.

²³Daku, akplɔ kple tunuhlo le zi dom ɖe eŋu.

²⁴Enyrã, eye wòdze agbo heka anyigba le dadam, eye ne kpẽ di hã la, metɔna o.

²⁵Ne kpẽ ɖi la, exlɔ̃na be: Eɖo dzi loo! Aʋa kple aʋafia ƒe gbedeɖe kpakple aʋaɣli ƒe ya le edzi dzem tso adzɔge ke!

²⁶Wò nunya nue aʋako dzona, eye wòkekea eƒe aʋala ɖoa ta dziehe lena?

²⁷Ɖe hɔ̃ dzona le wò nya nu, eye wòwɔa eƒe atɔ de kɔkɔƒea?

²⁸Enɔa agakpewo dzi, eye wòwɔa atɔ ɖe agakpewo to kple towo ƒe tsutsuèaƒe.

²⁹Afima wòtsaa ŋu nuɖuɖu tsona, eye eƒe ŋku kpɔa keke didiƒe ke.

³⁰Viawo noa ʋu, eye afisi ame tsiaʋawo le la, afima wònɔna.