Read ewe Hiob 5 Bible Online

Hiob 5 - ewe bible

Hiob 5

¹Yɔ ame kpɔ, ɖe amea ɖe atɔ na wò hã? Eye kɔkɔetɔawo dometɔ ka ŋu nèbe, yeatrɔ ɖo?

²Ke boŋ dziku wua bometsila, eye abunetɔ kuna ɖe ŋuʋaʋã me.

³Mekpɔ bometsilaa ɖe do ke; tete wònyunyɔ ɖe enɔƒe enumake.

⁴Ɖeɖe metso ɖe viawo gbo o, wofanya wo le agbo la me, eye xɔnametɔa ɖeke meli o.

⁵Dɔwuitɔwo mi eƒe agblemenuwo, eye woɖahe wo tso keke ŋuvegoewo me ke, eye tsikɔwuitɔwo ɖa tsyo ɖe eƒe kesinɔnuwo ŋu.

⁶Elabena dzɔgbevɔ̃e medona tsoa ke me o, eye hiãtuame metsoa anyigbatu me o,

⁷ke boŋ wodzi amegbetɔ ɖe hiãtuame ŋu, abe alesi dzoxi dzena yia dzii ene.

⁸Nyee wònyea, anye ne matrɔ ɖe Mawu ŋu, eye matsɔ nye nya ade asi na Mawu,

⁹amesi wɔa nu gã, siwo me dzodzro meli o, kple nukunu, siwo mele xexlẽ me o,

¹⁰amesi naa tsidzadza anyigba, eye woɖoa tsi ɖe lãnyiƒewo.

¹¹Edoa ame bɔbɔɖokuiwo de dzi, eye wòkplɔa dzɔgbenyuie ƒua nuxalawo.

¹²Egblẽ ayetɔwo ƒe tameɖoɖo me, be woƒe asiwo magawɔ naneke wòaɖɔ aʋu o.

¹³Eléa nunyalawo le woƒe ayenuwɔwɔ me, eye wònana ayedzelawo tsi klokloklo le woƒe adaŋudede me.

¹⁴Viviti kpea wo le ŋkeke me, eye wonoa asi tsam le ŋdɔkutsu abe zã me ene.

¹⁵Ke eɖea ame dahe tsoa yi nu, tsoa woƒe nu me, eye tsoa ŋusẽtɔ si me.

¹⁶Mɔkpɔkpɔ li na hiãtɔ, eye nu vlo wɔwɔ amia nu.

¹⁷Kpɔ ɖa, woayra amegbetɔ, si Mawu hea to na, eyata megado vlo ŋusẽkatãtɔ ƒe tohename o.

¹⁸Elabena edea abi eme ŋu, eye wògablanɛ, eƒoa ame, eye eƒe asi daa gbe le eŋu.

¹⁹Aɖe wò le fukpekpe ade me, eye le adadrelia me la vɔ̃a ɖeke maka esi ŋuwò o.

²⁰Le dɔŋɔli la aɖe wò tso ku me, eye le, aʋa me la aɖe wòtso yi nu.

²¹Aɣla de adeɖiƒoame, eye ne gbegblẽ va la, mãvɔ o.

²²Àko gbegblẽ kple dɔwuame, eye mavɔ̃ anyigba dzi gbemelãwo o.

²³Elabena mia kple agble me kpewo miabla nu, eye gbemelãwo adze xɔlɔ̃ kpli wò.

²⁴Ekema adze sii be, wò agbadɔ ŋu fa, eye ne èɖe ŋku de nɔwòƒe la, naneke mahiã wò o.

²⁵Adze sii be, viwòwo sɔ gbɔ, eye wò dzidzimeviwo le abe gbe le anyigbã dzi ene.

²⁶Atsi aƒu ga, hafi ayi yɔ me, abe alesi wotsɔa lu bablawo va aƒee le woƒe ɣeyiɣi dzi ene.

²⁷Kpɔ ɖa, nusia me míedzro, eye ele eme alea; see eye nadzrae ɖo!