Read ewe Hiob 7 Bible Online

Hiob 7 - ewe bible

Hiob 7

¹Ɖe menye aʋa mee amegbetɔ le le anyigba dzi oa? Eye ɖe eƒe ŋkekewo mele abe agbatedɔwɔla ƒe ŋkekewo ene oa?

²Alesi kluvi ƒe ŋku blãna ɖe vɔvɔli ŋu, eye alesi agbaledɔwɔla nɔa eƒe fetu dzɔmee la,

³nenema nyea mexɔ hiãɣletiwoe, eye wotso fuzãwo nam.

⁴Ne memlɔ anyi la, ekema mebuna be: Ɣekaɣi mele fɔfɔ ge? Fiẽ gbɔ hã metsɔ o; eye meƒoa togogoe wòtiam, vaseɖe esime ŋu ɖena le eme.

⁵Nye ŋutilã dze nyẽ, eye wòƒo anyi; nye ŋutigbalẽ lé akpɔ, eye wògagbã tsi,

⁶Nye ŋkekewo ɖia ɖu wu avɔlɔ̃ʋu, eye wo nu yina mɔkpɔkpɔ manɔmee.

⁷Mibu eme kpɔ, ƒuƒu enye nye agbe, eye nye ŋku magakpɔ dzɔgbenyule o.

⁸Amesiwo ƒe ŋku le ŋunye la, womagakpɔm o; eye ne wò ŋkuwo dim la, nyemaganɔ anyi o.

⁹Alilikpo buna, eye enu yina; nenema ke, ne amea ɖe yi tsiẽ la, megagbɔna o,

¹⁰megatrɔna va eƒe me o, eye enɔƒe megadzea si eyama o.

¹¹Eyata nye hã nyemaxe mɔ na nye nu o; maƒo nu, esi nye dzi ɖo ŋɔdzi me, eye mafa konyi le nye luʋɔ ƒe vevesese me.

¹²Atsiaƒue menyea, alo bosoe menye, be nèɖe ŋudzɔlawo ɖo ŋunyea?

¹³Ne megblɔ be: Nye aba nefa akɔ nam, eye nye dɔƒe nexɔ nye hlãwo tso nam ti la,

¹⁴ekema ètsɔa drɔ̃e doa vɔvɔ̃ nam, eye nètsɔa ŋutega ɖoa ŋɔdzi nam,

¹⁵ale be nye luʋɔ di be, gbɔgbɔtsixe natsi ye ƒo, eye wòlɔ̃ ku wu ƒuɖiɖi glaŋglaŋ sia.

¹⁶Etim azɔ, nyemebe, manɔ agbe tegbee o. Ɖe asi le ŋunye, elabena ƒuƒu enye nye ŋkekewo.

¹⁷Nuka nye amegbelɔ be, nèɖo kɔkɔe, eye be, nétsɔ wò tame ɖo eŋu?

¹⁸Eɖoa teƒe nɛ ŋdi sia ŋdi, eye nèdonɛ kpɔna aɖabaƒoƒo sia aɖabaƒoƒo.

¹⁹Ɣekaɣi naɖe kɔ ɖa le ŋunye, eye naɖe asi le ŋunye, be mami ta tetee?

²⁰Ne mewɔ nuvɔ̃ la, nuka wonye mewɔ wò, wò amegbetɔwo ŋn dzɔla? Nukaŋuti nètsɔm ɖo nu dzidzea na ɖokuiwò, be metrɔ zu agba na ɖokuinye?

²¹Nukaŋuti mẽtsɔ nye dzidadawo ke o, eye mèna nye vodadawo nu yi o? Elabena azɔ mele ke me mlɔ ge, eye ne èdim la, nyemaganɔ anyi o.