Read ewe Hiob 9 Bible Online

Hiob 9 - ewe bible

Hiob 9

¹Hiob ɖo ŋu gblɔ bena:

²Nyateƒe, menyae be, ele alea; eye aleke amegbetɔ ƒe nya adzɔ le Mawu gbɔa?

³Ne edze eŋu wòbe, yeahe nya kplii la, mate ŋu aɖo akpe ƒe ɖeka ŋu o.

⁴Dzi nyanu le esi, eye eƒe ŋusẽ kako. Ameka tsi tre ɖe eŋu, eye megbe kpɔdodoe o?

⁵Emli towo ɖa, ke womenyae o; etrɔ wo bu anyi le eƒe dɔmedzoe me.

⁶Eʋuʋu anyigba le enɔƒe, ale be eƒe sɔtiwo na.

⁷Ede se na ɣe, eye medze o, eye wòtu nu ɖe ɣletiviwo nu.

⁸Eya ɖeka keke dziŋgɔli me, eye wòzɔ ƒu dzeagbo dzi.

⁹Ewɔ koklovinɔ, avũ kple avũtɔ kple atifieŋu kpakple dzieheɣletiviwo.

¹⁰Ewɔ nu gã, si me dzodzro meli o, kple nukunu, siwo melexexlẽ me o.

¹¹Kpɔ ɖa, eto ŋunye yi, eye nyiemekpɔe o; esa agbe va yi, eye nyemedze sii o.

¹²Kpɔ ɖa, ehoa nu kple ke, ameka axe mɔ na? Ameka agblɔ nɛ be: Nuka wɔm nèle?

¹³Mawu mefaa eƒe dziku nu o, eye Raxab ƒe xɔnametɔwo abɔbɔ ɖe ete.

¹⁴Aleke nyea mahe nya kplii, eye afika makpɔ ava dzɔdzɔe le le eƒe ŋkume?

¹⁵Ne tɔnye dza ʋuu keke hã la, nyemate ŋu aɖo ŋu nɛ o, koko boŋ maƒo na nyia ʋɔnudrɔ̃la la.

¹⁶Ne meyɔe, eye wòtɔ nam hã, nyemaxɔe ase be, ele to ɖe nye gbe ŋu o.

¹⁷Edze dzinye le ahom me, eye wòdzi nye abiwo ɖe dzi naneke mawɔmawɔe.

¹⁸Mede mɔ nam be, magbɔ o, ke boŋ ena vevesesewo ɖi ƒo nam.

¹⁹Ne eɖi ŋusẽ nu la, kpɔ ɖa, ŋusẽtɔ enye si; eye nenye ʋɔnudɔdrɔ̃ la, ameka akplɔm ayii?

²⁰Ne tanye dzɔ la, nye nu abu fɔm, eye ne nyemeɖi fɔ o hã la, abum bubui.

²¹Nyemeɖi fɔ o! Nyemedze si ɖokuinye o, eye megbe nye agbe!

²²Wo katã le ɖeka! Eyata mebe: Ame maɖifɔ kple fɔɖila siaa wotsrɔ̃na.

²³Ne atam de asi amewuwu me ɖe vo me ta, ekema eɖea alɔme te ame maɖifɔwo ƒe vevesese ŋu.

²⁴Wotsɔ anyigba de asi na nu vlo wɔlawo, eye wòtsyɔ nu mo na woƒe ʋɔnudrɔ̃lawo. Ne menye eyae o la, ekema amekae wɔe?

²⁵Nye ŋkekewo le abla dem wu duƒula; wosi, eye womekpɔ dzɔgbenyuiea ɖeke o.

²⁶Woyi mii abe aƒlaʋu ene, eye abe alesi hɔ̃ dea agba anyi ɖe nuɖuɖu dzi ene.

²⁷Ne mebu be: maŋlɔ nye konyifafa be, madzudzɔ adãɖoɖo, eye makɔ mo la,

²⁸ekema nye veveseseawo katã doa vɔvɔ̃ nam, elabena menyae be, mèle tsotso ge nam o.

²⁹Fɔɖila menye tso, nukata manɔ agbagba dzem dzodzro ɖo?

³⁰Ne mele snotsi, eye meklɔ nye asi de adzalẽtsi me la,

³¹ekema anyrɔm ɖe ba me, eye manyɔ ŋu na nye awuwo.

³²Elabena menye ame wònye abe nye ene, ne maɖo ŋu nɛ be: na míayi ʋɔnu o.

³³Nyametsolaa ɖeke mele mía dome, ne wòado asi mí ame eve la dzi o.

³⁴Ne eɖe eƒe ameƒoti la ɖa le ŋunye, eve eƒe ŋɔdzi megaɖo vɔvɔ̃ nam o la,

³⁵ekema maƒo nu, eye nyemavɔ̃e o; elabena menye alea mele o.