Read ewe Psalmowo 102 Bible Online

Psalmowo 102 - ewe bible

Psalmowo 102

¹Hiãtɔ ƒe gbedodoɖa, ne nu te eŋu, eye wòtrɔ eƒe konyifafawo ƒo ɖe Yehowa ŋku me.

²Yehowa, se nye gbedodoɖa, eye nye ɣli nede gbɔwò!

³Megaɣla wò mo ɖem le nye xaxagbe o, ƒu to anyi ɖe ŋunye! Netsɔ, naɖo tom le gbesigbe meyɔ wò!

⁴Elabena nye ŋkekewo nu va yi abe adzudzɔ ene, eye nye ƒuwo biã hẽ abe dzo ene.

⁵Nye dzi yrɔ, eye wòƒu abe gbe ene; elabena meŋlɔ aboloɖuɖu be.

⁶Nye ŋutilã miã ɖe nye ƒu ŋu le nye ŋeŋe sesĩ la ta.

⁷Meɖi aluge le gbedzi kple favieʋuto, si le aƒedo me.

⁸Alɔ̃dɔdɔ zu dɔ, eye mele abe xevi tsi akogo le xɔta ene.

⁹Nye futɔwo le alɔme ɖem le ŋunye atraɖi, eye amesiwo nyrã ɖe ŋunye la, tsɔm wɔ ɖiŋuɖonui.

¹⁰Elabena mele dzowɔ ɖum abe abolo ene, eye nye nunono tɔtɔ kple aɖatsi

¹¹le wò dɔmedzoe kple wò dziku la ta, elabena ède asi tanye xlã ɖe anyi.

¹²Nye ŋkekewo le abe vɔvɔli, si ɖo to la ene, eye meƒu abe gbe ene.

¹³Ke wò Yehowa la, èli tegbee, eye wò ŋkɔ le dzidzimewo katã me.

¹⁴Atso àkpɔ nublanui na Zion, elabena enuveɣi ɖo, eye azãgbe la de.

¹⁵Elabena wò dɔlawo melɔ̃a nu le eƒe kpewo gbɔ o, eye eƒe anyiglãwo ƒe nu vea wo.

¹⁶Dukɔwo avɔ̃ Yehowa ƒe ŋkɔ, eye anyigbawo dzi fiawo avɔ̃ wò ŋutikɔkɔe.

¹⁷Yehowa agbugbɔ Zion atso, eye wòado le eƒe ŋutikɔkɔe me,

¹⁸atrɔ ɖe ame ɖeƒeƒlewo ƒe gbedodoɖa ŋu, eye mado vlo woƒe kukuɖeɖe o.

¹⁹Woaŋlɔ esia ɖi na megbeviwo, eye dukɔ, si woava mè la, akafu Yehowa.

²⁰Elabena ekpɔ nu tso eƒe kɔkɔƒe kɔkɔe la, Yehowa do mo ɖe anyigba dzi tso dziƒo,

²¹ne wòase gatɔwo ƒe ŋeŋe, eye wòaɖe ga kuviwo,

²²ne woaxlẽ nya afia le Yehowa ƒe ŋkɔ ŋu le Zion kple eƒe kafukafu ŋu le Yerusalem,

²³nenye be, dukɔwo katã kple fiaɖuƒewo kpe ta, be woasubɔ Yehowa.

²⁴Ebɔbɔ nye ŋusẽ de anyi le mɔ ta, eye wòto nye ŋkekewo ɖe eme.

²⁵Mele gbɔgblɔm be: Nye Mawu, megana nunye nayi le nye ŋkekewo ƒe domedomee o! Wo ƒewo anɔ anyi tso dzidzime yi dzidzime.

²⁶Gbaɖegbe ke nèdo anyigba gome anyi, eye wò asinudɔwɔwɔ enye dziƒowo.

²⁷Woawo nu ayi, ke wò la ànɔ anyi; wo katã anyunyɔ abe ava ene, eye àɖɔ li wo woaɖɔ abe awu ene.

²⁸Ke wò la nenema ko nèle, eye wò ƒewu nu metsona o.

²⁹Wò dɔla ƒe viwo anɔ anyi, eye woƒe ƒome ali ke le ŋkuwò me.