Read ewe Psalmowo 104 Bible Online

Psalmowo 104 - ewe bible

Psalmowo 104

¹Luʋɔnye, kafu Yehowa! Yehowa, nye Mawu, èlolo ŋutɔ, ètaa gãnyenye kple atsyɔ̃ ɖoɖo.

²Etsyɔa kekeli abe avɔ ene, eye wòkekea dziƒo abe agbadɔvɔ ene.

³Etsɔa tsiwo sãa eƒe dziƒoxɔ dzi, etsɔa alilikpowo wɔa eƒe tasiaɖam, eye wòzɔa ya ƒe aʋalawo dzi.

⁴Etsɔa ya wɔa eƒe dɔlawoe kple dzo flafla wɔa eƒe subɔlawoe.

⁵Edo anyigba gɔme anyi ɖe eƒe anyinɔwo dzi, ne magaʋã gbeɖe akpɔ o.

⁶Etsɔ tsi gbana tsyɔ edzi abe avɔ ene; tsi kɔ gbɔ towo ta.

⁷Wosi le wò bublu nu, eye wode afɔ du me le wò gbeɖeɖe nu.

⁸Towo kɔ dzi, baliwo nyẽ ɖe eme le teƒe, si nèɖo enyi na wo.

⁹Eɖo liƒo na wo, womagbɔ edzi o, eye womagbugbɔ atsyɔ anyigba dzi o.

¹⁰Ena tsi dzɔ tso baliwo me, wosi to towo domee:

¹¹wonaa tsi gbemelãwo katã wonona, gbetedzi faa eƒe tsikɔwuame nu.

¹²Dziƒoxewo nɔa wo to, eye wonana wosea wo ŋkɔ le atilɔwo me.

¹³Enana towo ƒoa tsi beke tso eƒe dziƒoxɔ me, eye eƒe dɔwɔwɔ ƒe kutsetse ɖia ƒo na anyigba.

¹⁴Enana gbe miena na lãwo kple agblemenuwo na amegbetɔwo ƒe ŋudɔwɔwɔ, ne woaɖe nuɖuɖu atso anyigba me.

¹⁵Wein doa dzidzɔ na amagbetɔ ƒe dzi, eye wònana eƒe mo zrɔ̃na lãlãlã wu ami; ke abolo doa ŋusẽ amegbetɔ ƒe dzi.

¹⁶Mawu ƒe atiwo ɖia ƒo, Libanon ƒe sederti, siwo wòdo.

¹⁷Afima xewo wɔa ato ɖo, eye damixe tsɔa kpomitiwo me wɔ eƒe aƒee.

¹⁸To kɔkɔwo li na agamegbɔ̃wo, eye agawo nye sitsoƒe na hotoklolowo.

¹⁹Ewɔ ɣleti, ne wòade vovo ɣeyiɣi me: ɣe nya eƒe toɖoƒe.

²⁰Eɖoa viviti anyi, eye zã dona, eya me ave me lãwo katã ʋãa wo ɖokui lena.

²¹Dzataviwo le xɔxlɔ̃m ɖe nuléle ŋu, eye wobiaa woƒe nuɖuɖu tso Mawu si me.

²²Ne ɣe dze la, woƒoa wo ɖokui nu ƒu, eye wotsyɔa akɔ anyi ɖe wo nɔƒe.

²³Amegbetɔ dona yia eƒe nuwɔƒe kple eƒe dɔwɔwɔ dzi vasena ɖe fiẽ.

²⁴Yehowa, wò dɔwɔwɔwo sɔ gbɔ loo! Ewɔ wo katã le nunya me: anyigba yɔ fũ kple wò nuwɔwɔwo.

²⁵Atsiaƒu enye si, elolo, eye wòkeke le goawo kple eve me: afima lã suewo kple gãwo siaa, siwo mele xexlẽ me o la, ʋãa wo ɖokui lena;

²⁶ʋuwo zɔa edzi yina; afima boso, si nèwɔ, be wòafe le eme la le.

²⁷Wo katã wole asiwò nu kpɔm, be nana nuɖuɖu yewo le enaɣi.

²⁸Ena wo, eye wofɔe, èʋu wò asi me, eye wodi ƒo kple wò nu nyui.

²⁹Ne èɣla wò ŋku me la, woluluna; ne èɖe woƒe gbɔgbɔ ɖa la, wokuna, eye wogbugbɔna yia woƒe ke me.

³⁰Ne èɖo wò gbɔgbɔ ɖa la, wodzɔna, eye nègawɔa anyigba ƒe ŋku me yeye.

³¹Yehowa ƒe ŋutikɔkɔe li tegbee! Yehowa kpɔa dzidzɔ le eƒe dɔwɔwɔwo ŋu!

³²Eya, amesi doa mo de anyigba dzi, tete wòdzena nyanyanya, ekaa asi towo ŋu, eye wotua adzudzɔ.

³³Madzi ha na Yehowa, ŋkeke alesi mele agbe; maƒo saŋku na nye Mawu, ŋkeke alesi meli.

³⁴Nye susuwo avivi enu; nye la, Yehowa ŋu ko makpɔ dzidzɔ ɖo.

³⁵Nuvɔ̃wɔlawo atsrɔ̃ le anyigba dzi, eye ame vɔ̃ɖiwo maganɔ anyi o! Luʋɔnye, kafu Yehowa! Mikafu Yehowa!