Read ewe Psalmowo 108 Bible Online

Psalmowo 108 - ewe bible

Psalmowo 108

¹Hadzidzi, Dawid ƒe ha.

²Mawu, nye dzi dze eme, madzi ha, eye mate saŋku; nye kafukafu hã awɔe.

³Saŋku kple kasaŋku, mifɔ! Menya agudzedze.

⁴Yehowa, makafu wò le dukɔwo dome, eye madzi kafukafuha ne wò le anyigbadzilɔwo dome.

⁵Elabena wò amenuveve kɔ gbɔ dziƒo ta, eye wò nyateƒe datɔ alilikpowo.

⁶Oo Mawu, kɔ dokuiwò dzi gbɔ dziƒo ŋu, eye wò ŋutikɔkɔe nagbɔ anyigba blibo la ta!

⁷Ne woaxe na wò ame lɔlɔ̃wo; tsɔ wò nuɖusi ɖe mí, eye naɖo tom!

⁸Mawu ƒo nu le eƒe kɔkɔeƒe la be: Makpa dzidzɔ, mamã Sixem, eye madzidze Sukot-bali me la.

⁹Gilead enye tɔnye, eye tɔnyee nye Manase; Efrayim enye nye taxenu, eye Yuda anye nye fiatikplɔ;

¹⁰nye tsileze enye Moab, mada nye atokota ɖe Edom dzi, eye metso aseye ɖe Filistitɔwo ŋu.

¹¹Amekae akplɔm ayi du sesẽ la mee, eye ameka akplɔm vaseɖe Edom?

¹²Mawu, ɖe menye wòe gbe mi oa, Mawu, eye mèho kple míaƒe aʋakɔwo oa?

¹³Kpe ɖe mía ŋu ɖe míaƒe ketɔwo ŋuti, elabena amegbetɔ ƒe xɔname mele ɖeke me o!

¹⁴Mawue míatsɔ awɔ kalẽe, eye eya anyã avuzi le míaƒe ketɔwo dzi.