Read ewe Psalmowo 109 Bible Online

Psalmowo 109 - ewe bible

Psalmowo 109

¹Dawid ƒe ha na henɔ la. Wò, nye kafukafu ƒe Mawu, megazi kpi o!

²Elabena ame vɔ̃ɖiwo kple alakpadalawo ƒe nu ke ɖe ŋunye, eye wotsɔ alakpaɖewo ƒo nu kplim.

³Wotsɔ fuléamenyawo ɖe to ɖem, eye wowɔ avu kplim yakatsyɔ.

⁴Wolém ɖe ke me ɖe nye lɔlɔ̃ teƒe; gbedodoɖa sɔŋ ko nyama mezu.

⁵Wotsɔ vɔ̃ ɖo nyui teƒe nam kple fuléle ɖo nye lɔlɔ̃ teƒe.

⁶Da ame vɔ̃ɖi ɖe eŋu, eye Satana netsi tre ɖe eƒe nuɖusi me!

⁷Nenye ame ɖifɔ le ʋɔnudɔdrɔ̃ me, eye eƒe gbedodoɖa nezu nuvɔ̃!

⁸Eƒe ŋkekewo nezu ʋee, eye ame bubu nexɔ eƒe dɔ!

⁹Viawo nezu tsyɔ̃eviwo, eye srɔ̃a nezu ahosi!

¹⁰Viawo nenɔ tsa glãla tsam anɔ nu biam, eye woadi nu le adzɔge tso woƒe aƒedowo gbɔ!

¹¹Fetɔ nehe eƒe nuwo katã ɖe akɔme, eye ame tutɔwo neha nusiwo wòwɔ ɖɔ kpɔ la!

¹²Amea ɖeke meganɔ anyi nɛ, si ave enu o, eye amea ɖeke megakpɔ nublanui na eƒe tsyɔ̃eviwo o!

¹³Woatsrɔ̃ eƒe dzidzimeviwo, eye woƒe ŋkɔ netutu ɖa le ƒome, si adze eyome la me!

¹⁴Woaɖo ŋu fofoawo ƒe vodada le Yehowa gbɔ, eye womegatutu dada ƒe nuvɔwo ɖa o;

¹⁵ke boŋ woana Yehowa ŋku me ɖaa, eye netsrɔ̃ woƒe ŋkɔ ɖa le anyigba dzi!

¹⁶Elabena meɖo ŋku dɔmenyowɔwɔ dzi o, ke boŋ eli hiãtɔ kple ame dahe kpakple amesi ƒe dzi le nu xam la yome be, yeawui.

¹⁷Elɔ̃ fiƒode, eyata neva edzi; yayra ƒe nu menyo eŋu o, eyata nenɔ adzɔge nɛ!

¹⁸Eta fiƒode abe avɔ ene, eyata neɖo lãme nɛ abe tsi ene kple eƒe ƒuwo me abe ami ene!

¹⁹Nenye eƒe avɔ, si wòtana, kple alidziblanu si wòblaa ali dzi ɖaae!

²⁰Esia nenye nye ketɔwo kple amesiwo le nye gblɔm ɖe ŋunye la, ƒe fetu tso Yehowa gbɔ!

²¹Ke wò, Aƒetɔ Yehowa, wɔ nam le wò ŋkɔ la ta; esiwò amenuveve nyo ŋuti la ɖem!

²²Elabena hiãkpela kple ame dahe menye, eye nye dzi xɔ abi ɖe dɔme nam.

²³Nenye yi abe vɔvɔli, si le to ɖom la ene, eye woʋuʋum abe ʋetsuvi ene.

²⁴Nye klo zu hehe le nutsitsidɔ ta, eye ami no le lã me nam.

²⁵Nyea mezu alɔmeɖenu na wo, wokpɔm, eye woʋuʋu ta.

²⁶Kpe ɖe ŋunye, Yehowa, nye Mawu, xɔ nam le wò amenuveve la nu!

²⁷Ekema woadze sii be, wò asie nye esia, eye wò Yehowa ye wɔe.

²⁸Woaƒo fi ade faa, ke wò la, ayra tsã; ne wotso ɖe ŋunye hã, woaɖu ŋukpe; ke wò dɔla ya akpɔ dzidzɔ.

²⁹Nye ketɔwo ata vlododo, eye woado ŋukpe abe awu ʋlaya ene.

³⁰Matsɔ nye nu ada akpe na Yehowa vevie, eye makafui le ame geɖewo dome.

³¹Elabena ele tsitre ɖe ame dahe la ƒe nuɖusi me, ne yeaxɔe tso amesiwo le fɔ bumee la si me.