Read ewe Psalmowo 111 Bible Online

Psalmowo 111 - ewe bible

Psalmowo 111

¹Mikafu Yehowa! Makafu Yehowa tso dzi blibo me le dzime dzɔdzɔe tɔwo ƒe adaŋu me kple amehawo dome.

²Yehowa ƒe dɔwɔwɔ lolo, amesiwo katã dzrom wole la, dia eyome.

³Gãnyenye kple atsyɔ̃ nye eƒe nuwɔwɔ, eye eƒe dzɔdzɔenyenye li tegbee.

⁴Edo ŋkuɖodzinu eƒe nukunuwo ŋu, amenuvela kple nublanuikpɔla enye Yehowa.

⁵Ena nuɖuɖu amesiwo vɔ̃nɛ la; eɖoa ŋku eƒe nubabla dzi tegbee.

⁶Ede eƒe nuwɔwɔ ƒe ŋusẽ fia eƒe dukɔ la, esime wòtsɔ dukɔwo ƒe domenyinu na wo.

⁷Eƒe asinudɔwɔwɔwo nye nyateƒe kple ʋɔnudɔdrɔ̃, eye eƒe sewo katã le eteƒe;

⁸elia ke wo ɖaa tegbee, eye wòwɔ wo le nyateƒe kple nuteƒewɔwɔ me.

⁹Eɖo ɖeɖe ɖe eƒe dukɔ, eye wòɖo eƒe nubabla anyi tegbee; eƒe ŋkɔ le kɔkɔe, eye ŋɔdzi le eŋu.

¹⁰Yehowa vɔvɔ̃ enye nunya ƒe gɔmetoto; amesiwo katã léa eme la, gɔmesese nyui sua wo si; eƒe kafukafu li tegbee.