Read ewe Psalmowo 119 Bible Online

Psalmowo 119 - ewe bible

Psalmowo 119

¹Woayra amesiwo fɔɖiɖi mele woƒe azɔlime ŋu o, amesiwo zɔna le Yehowa ƒe se la me.

²Woayra amesiwo wɔa eƒe ɖaseɖiɖiwo dzi, amesiwo dinɛ tso dzi blibo me;

³womewɔa nu vɔ̃ɖia ɖeke hã o, eye wozɔa eƒe mɔwo dzi.

⁴Edo wò sededewo di, ne woalé wo me ɖe asi pɛpɛpɛ. Oo, ɖe ŋusẽ anɔ nye azɔlime ŋu, be malé ŋku ɖe wò ɖoɖowo ŋu!

⁵

⁶Ekema ŋu makpem o, nenye be, meɖe ŋku ɖe wò seawo katã.

⁷Matsɔ dzi, si toa mɔ ɖeka la, ada akpe na wò, ne mesrɔ̃ wò ɖoɖo dzɔdzɔeawo,

⁸Malé ŋku ɖe wò ɖoɖowo ŋu, megagblẽm di keŋkeŋ o!

⁹Aleke ɖekakpui alẽ eƒe mɔ atsɔ fɔɖiɖi manɔmee? Ne elé ŋku ɖe eɖokui ŋu ɖe wò nya la nu.

¹⁰Medi wò tso dzi blibo me, megana matra tso wò seawo gbɔ o!

¹¹Meɣla wò nyawo ɖe nye dzi me, ne nyemagawɔ nuvɔ̃ ɖe ŋuwò o.

¹²Yehowa, woakafu wò, fia wò ɖoɖowom!

¹³Matsɔ nye nuyiwo axlẽ wò nu me ɖoɖowo katã afia.

¹⁴Mekpe dzidzɔ ɖe wò ɖaseɖiɖi ƒe mɔwo ŋu abe ɖe kesinɔnu vovovowo ŋu ene.

¹⁵Maɖe ŋugble le wò sededewo ŋu, eye maɖe ŋku ɖe wò mɔwo.

¹⁶Nye dzeme akɔ ɖewò ɖoɖowo ŋu, nyemaŋlɔ wo be o.

¹⁷Wɔ nyuie na wò dɔla, ne mana agbe ale ŋku ɖe wò nya la ŋu.

¹⁸Klo nu ɖa le nye ŋku dzi, ne makpa nukunuwo le wò se la me!

¹⁹Amedzroe menye le anyigba dzi; megaɣla wò se la ɖem o!

²⁰Wò ɖoɖowo yome didi ɣesiaɣi na nye luʋɔ gbã gudugudu.

²¹Eblu ɖe dadala, siwo woƒo fi de la ta, amesiwo tra tso wò se la gbɔ.

²²Mli ŋukpe kple vlodoame da le ŋunye, elabena meléa ŋku ɖe wò ɖaseɖiɖiwo ŋu!

²³Ne amegãwo kpe ta, eye wole nu ƒom le ŋunye hã, wò dɔla dea ŋugble le wò ɖoɖowo ŋu.

²⁴Wò ɖaseɖiɖiwo nye nye dzidzɔ kple adaŋudelawo nam.

²⁵Nye luʋɔ le ɖe anyigba ŋu, gbɔ agbem le wò nya la nu.

²⁶Mexlẽ nya fia le nye zɔzɔme ŋu, eye nèɖo tom. Fia wò ɖoɖowom.

²⁷Na mase wò sededewo ƒe mɔwo gɔme, eye mayi tame le wò nukunuwo ŋu.

²⁸Nye luʋɔ fa aɖatsi le nuxaxa ta; fam ɖe tsitrenu le wò nya la nu!

²⁹Te aʋatsomɔ ɖe aga tso gbɔnye, eye natsɔ wò se la ve nunye!

³⁰Metia nyateƒemɔ, eye metsɔ wò ɖoɖowo tu enyi ɖe ŋkunye me.

³¹Yehowa, meku ɖe wò ɖaseɖiɖiwo ŋu, megana ŋu nakpem o.

³²Maƒu du le wò sewo ƒe mɔ dzi, elabena èvu nye dzi gbloto.

³³Yehowa, fia wò ɖoɖo ƒe mɔm, eye malé ŋku ɖe eŋu vaseɖe nuwuwu!

³⁴Na gɔmesesem, ne malé ŋku ɖe wò se la ŋu, eye malé eme ɖe asi tso dzi blibo me.

³⁵Na mato wò se la ƒe mɔ dzi, elabena eƒe nu nyo ŋunye.

³⁶Bi nye dzi de wò ɖaseɖiɖiwo ŋu, eye menye de ŋubiabia ŋu o.

³⁷Ɖe nye ŋku ɖa le nu dzodzrowo kpɔkpɔ ŋu. Gbo agbem le wò mɔ dzi!

³⁸Wɔ wò ŋugbe, si nèdo na amesiwo vɔ̃a wò la, dzi na wò dɔla.

³⁹Na nye ŋukpe, si vɔ̃m mele la, nu nayi; elabena wò ɖoɖowo nyo.

⁴⁰Kpɔ ɖa, wò sewo le dzroyem; tsɔ wò dzɔdzɔenyenye gbɔ agbem.

⁴¹Yehowa, wò amenuveve kple wò xɔname neva dzinye le wò ŋugbedodo la nu,

⁴²ne maɖo nye ŋu na amesi le alɔme ɖem le ŋunye la; elabena meɖo ŋu ɖe wò nya ŋu.

⁴³Megaɖe nyateƒenya la ɖa le nunye keŋkeŋ o, elabena mele wò ɖoɖowo sinu dzɔm.

⁴⁴Malé ŋku ɖe wò se la ŋu ɣesiaɣi ɖaa tegbee,

⁴⁵eye mazɔ le teƒe keke, elabena medi wò se la yome.

⁴⁶Maƒo nu le wò ɖaseɖiɖi la ŋu le fiawo ŋku me, eye ŋu makpem o.

⁴⁷Nye dzeme akɔ ɖe wò se, siwo melɔ̃na la ŋu.

⁴⁸Mawu nye alɔ dzi ɖe wò se, siwo melɔ̃na la ŋu, eye made ŋugble le wò ɖoɖowo ŋu.

⁴⁹Wɔ wò nya dzi na wò dɔla, le esi nèna mele mɔ kpɔm ta.

⁵⁰Esia nye akɔfafa nam le nye hiã me be, wò nye la gbɔ agbem.

⁵¹Dadalawo le fewu ɖum le ŋunye vevie ŋutɔ, ke nyemete ɖe aga le wò se la ŋu o.

⁵²Yehowa, meɖo ŋu wò se le tso mavɔ me ke, eye mete akɔ ne ɖokuinye.

⁵³Dzi kum heliheli ɖe ame vɔ̃ɖi, siwo gblẽ wò see ɖi la ŋuti.

⁵⁴Wò ɖoɖoanyiwo nye hadzidzi nam le aƒe, si me menye amedzro le.

⁵⁵Yehowa, meɖoa ŋu wò ŋkɔ le zã me, eye meléa ŋku ɖe wò se la ŋu.

⁵⁶Esia su asinye, elabena medzra wò sededewo ɖo.

⁵⁷Yehowa enye nye gome, megblɔ be, malé ŋku ɖe wò nyawo ŋu.

⁵⁸Meƒo koko na wò tso dzi blibo me, ve nenye le wò ŋugbedodo la nu.

⁵⁹Mebu tame le nye zɔzɔme ŋu, eye metrɔ nye afɔ ɖe wò ɖaseɖiɖiwo ŋu.

⁶⁰Mewɔ kaba, be malé ŋku ɖe wò seawo ŋn, eye nyemalala o.

⁶¹Ame vɔ̃ɖiwo ƒe kawo ɖe to ɖem, ke nye ŋku medzo le wò se la dzi o.

⁶²Mefɔ le zãtiƒe, be mada akpe na wò le wò ɖoɖo dzɔdzɔeawo ta?

⁶³Xɔlɔ̃ menye na amesiwo katã vɔ̃a wò kple amesiwo léa ŋku de wò sededewo ŋu.

⁶⁴Yehowa, wò amenuveve yɔ anyigba dzi fũ; fia wò ɖoɖowom.

⁶⁵Yehowa, èwɔ nyuie na wò dɔla le wò nya la nu.

⁶⁶Fia gɔmesese nyui kple nunyam; elabena mexɔ wò nya dzi se.

⁶⁷Hafi woava bɔbɔm ɖe anyi la, metra mɔ, ke azɔ le melé ŋku ɖe wò nya ŋu.

⁶⁸Wò dɔme nyo, eye nèwɔa nu nyui, fia wò ɖoɖowom.

⁶⁹Dadalawo da alakpa ɖe asinye; ke nyea melé wò seawo me ɖe asi tso dzi blibo me.

⁷⁰Woƒe dzi ku ami ahe ami ene, ke nyea mekpɔ dzidzɔ le wò seawo ŋu.

⁷¹Enyo nam ŋutɔ be, wobɔbɔm ɖe anyi, ne masrɔ̃ wò ɖoɖowo.

⁷²Wò nu me sewo nyo nam wu sika kple klosalo akpe nanewo.

⁷³Wò asiwo wɔm, eye woɖɔm ɖo; fia nunyam, ne masrɔ̃ wò seawo!

⁷⁴Amesiwo vɔ̃a wò la, woakpɔm ahakpɔ dzidzɔ, elabena mele wò nya la sinu kpɔm.

⁷⁵Yehowa, menyae be, wò ʋɔnudɔdrɔ̃wo le eteƒe, eye nèbɔbɔm ɖe anyi le nyateƒe la me.

⁷⁶Wò amenuveve nenye akɔfafa nam le wò ŋugbedodo na wò dɔla la nu.

⁷⁷Wò nublanuikpɔkpɔ neva dzinye, ne mana agbe, elabena wò se la enye nye dzidzɔ.

⁷⁸Ŋu nekpe dadalawo, elabena wotem ɖe anyi yakatsyɔ; ke nyea wò seawo ŋu medea ŋugble lena.

⁷⁹Amesiwo vaa wò kple amesiwo nya wò ɖaseɖiɖiwo, netrɔ ɖe ŋunye.

⁸⁰Fɔɖiɖi meganɔ nye dzi ŋu le wò ɖoɖowo me, ne ŋu nakpem o.

⁸¹Nu le nye luʋɔ ŋu le wò xɔnɔme didi me wò nye sinu kpɔm mele.

⁸²Nu te nye ŋkuwo ŋu le wò ŋugbedodo didi me be: Ɣe kaɣi nafa akɔ nam?

⁸³Elabena ne mele abe lãgbɔlẽgolo, si le dzokɔ ene hã, nyemɔŋlɔ wò ɖoɖowo be o.

⁸⁴Wò dɔla ƒe ŋkekewo la, nenie wole? Gbekagbe nadrɔ̃ ʋɔnu yonyemetilawo?

⁸⁵Dadalawo ɖe ne num, wo amesiwo mewɔa nu ɖe wò se la nu o.

⁸⁶Wò seawo katã nye nyateƒe; wole yonyeme tim yakatsyɔ, xɔ nam!

⁸⁷Ekpɔtɔ vie wotsrɔ̃m ɖa le anyigba dzi kloe, ke nyemegblẽ wò seawo ɖi o.

⁸⁸Gbɔ agbem le wò amenuveve la nu, eye malé ŋku ɖe wò nu me ɖaseɖiɖiwo ŋu.

⁸⁹Yehowa, wò nya la li ke ɖe dziƒo tegbee.

⁹⁰Wò nuteƒewɔwɔ li tso dzidzime yina dzidzime, èɖo anyigba anyi, eye wòtɔ ɖe tsitrenu.

⁹¹Woli vaseɖe egbe, elabena wo katã wole suhɔwòm.

⁹²Ɖe menye wò see nye nye dzidzɔ o la, anye ne metsrɔ̃ ɖe nye hiã me.

⁹³Nyemaŋlɔ wò sewo be tegbee o, elabena woawo nétsɔ gbɔ agbem.

⁹⁴Tɔwò menye, xɔ nam, elabena mebiaa wò seawo ta sena.

⁹⁵Ame vɔ̃ɖiwo de xa ɖe ŋunye, be yewoatsrɔ̃m, ke nye la meléa ŋku ɖe wò ɖaseɖiɖiwo ŋu.

⁹⁶Mekpɔ nuwo katã ƒe nuwuwu, ke seƒeɖo meli na wò se la o.

⁹⁷Aleke gbegbe nyemehelɔ̃a wò se lae o! Nye ŋugbledede wonye ɖaa.

⁹⁸Wò se la wɔm nunyalae wu nye futɔwo, elabena tɔnyee wonye tegbee.

⁹⁹Medze nunya wu nye nufialawo katã, elabena wò ɖaseɖiɖiwo nye nye ŋugbledede.

¹⁰⁰Mese nu gɔme wu ame tsitsiwo, elabena melé wò seawo me ɖe asi.

¹⁰¹Mete nye afɔ ɖe megbe tso toƒe vɔ̃ɖiwo katã gbɔ, ne malé ŋku de wò nya ŋu.

¹⁰²Nyemete ɖa le wò ɖoɖowo ŋu o, elabena wòe fia num.

¹⁰³Wo nyawo vivi na nye veme wu anyitsi le nye nu me.

¹⁰⁴Wò sewo na medze nunya, eyata melé fu aʋatsomɔwo katã.

¹⁰⁵Wò nya enye akaɖi na nye afɔ kple kekeli na nye toƒe.

¹⁰⁶Meka atam, eye nyemagbe edziwɔwɔ o be: Malé ŋku de wò ɖoɖo dzɔdzɔeawo ŋu.

¹⁰⁷Wobɔbɔm ɖe anyi ŋutɔ, Yehowa, gbɔ agbem le wò nya la nu.

¹⁰⁸Yehowa, na nye nu ƒe vɔsa faawo nadze ŋuwò, eye fia wò ɖoɖowom.

¹⁰⁹Melé nye agbe ɖe asiƒome ɖaa, ke nyemeŋlɔ wò se la be o.

¹¹⁰Ame vɔ̃ɖiwo tre mɔ nam, ke nyemetra ɖa tso wò seawo gbɔ o.

¹¹¹Wò ɖaseɖiɖiwo nye nye domenyinu tegbee, elabena woawoe nye nye dzi ƒe dzidzɔ.

¹¹²Nye dzi lɔ̃ be, yeawɔ wò ɖoɖowo dzi tegbee vaseɖe nuwuwu.

¹¹³Melé fu adzɔveeɖulawo, ke melɔ̃a wò se la.

¹¹⁴Ɣaɣlaƒe kple akpoxɔnu nènye nam; wò nya la sinu dzem mele.

¹¹⁵Mi nu vlo wɔlawo, mite ɖa le ŋunye, ne malé nye Mawu ƒe seawo me ɖe asi.

¹¹⁶Lém ɖe asi le wò ŋugbedodo la nu, ne manɔ agbe, megana ŋu nakpem le nye mɔkpɔkpɔ me o.

¹¹⁷Do ŋusẽm, ne woaxɔ nam, eye makpɔ dzidzɔ le wò ɖoɖowo ŋu tegbee.

¹¹⁸Egbe amesiwo katã tra tso wò ɖoɖowo gbɔ, elabena woƒe alakpadada mele ɖeke me o.

¹¹⁹Eɖe anyigba dzi ame vɔ̃ɖiwo katã ɖe aga abe aŋuka ene, eyata melɔ̃a wò ɖaseɖiɖiwo.

¹²⁰Nye lãme lulu le wò ŋɔdzi ta, eye wò ʋɔnudɔdrɔ̃ tso dzika ƒo nam.

¹²¹Mewɔa nusi le eteƒe kple nusi edzɔ; megagblẽm ɖe amesiwo tem ɖe anyi la si me o.

¹²²Xɔ nya ɖe wò dɔla nu hena eƒe nyui, ne dadalawo nagatem ɖe anyi o.

¹²³Nu te nye ŋkuwo ŋu le wò xɔname kple wò ŋugbedodo dzɔdzɔe la ŋuti.

¹²⁴Wɔ na wò dɔla le wò amenuveve la nu, eye nafia wò ɖoɖowom.

¹²⁵Wò dɔla menye, fia nunyam, ne madze si wò ɖaseɖiɖiwo!

¹²⁶Yehowa ƒe nuwɔɣi do edzi, elabena wotu wò se la.

¹²⁷Eyatae melɔ̃a wò seawo wu sika kple sika nyuitɔ ɖo.

¹²⁸Eyata mebua wò seawo katã be, wole eteƒe; melé fu aʋatsomɔwo katã.

¹²⁹Wò ɖaseɖiɖiwo nye nukunu, eyata nye luʋɔ léa wo me de asi.

¹³⁰Ne woʋu go wò nya la, eklẽna, eye wòfiaa nunya amesiwo ŋu wɔna mele o.

¹³¹Meke nu de te, eye nye veme ƒu, elabena wò seawo le dzroyem.

¹³²Trɔ ɖe ŋunye, eye nave nunye, abe alesi wòdze amesiwo lɔ̃a wò ŋkɔe la ene.

¹³³Tsɔ wò nya la li ke nye afɔɖeɖe, eye megana nu vɔ̃ɖia ɖeke naɖu fia de dzinye o!

¹³⁴Ɖem tso amegbetɔwo ƒe tetedeanyi me, ekema malé ŋku de wò seawo ŋu.

¹³⁵Na wò ŋku me naklẽ ɖe wò dɔla dzi, eye nafia wò ɖoɖowom.

¹³⁶Nye ŋkuwo le tsi kplɔm yoo abe tɔʋu ene, le esi womelé ŋku de wò sea ŋu o ta.

¹³⁷Yehowa, dzɔdzɔetɔ nenye, eye wò ʋɔnudɔdrɔ̃wo le eteƒe.

¹³⁸Ede wò sewo le dzɔdzɔenyenye kple nuteƒewɔwɔ me ŋutɔ.

¹³⁹Ŋuʋaʋa le wu ye ge, elabena nye ketɔwo ŋlɔ wò nya la be?

¹⁴⁰Wò nya me kɔ ŋutɔ, eye wò dɔla melɔ̃a nu le egbɔ o.

¹⁴¹Nyemele ɖeke me o, eye wodo vlom, ke nyemeŋlɔ wò sewo be o.

¹⁴²Wò dzɔdzɔenyenye le dzɔdzɔe tegbee, eye wò se la nye nyateƒe.

¹⁴³Hiã kple xaxa dzɔ de dzinye, ke wò seawo nye nye dzidzɔ.

¹⁴⁴Wò ɖaseɖiɖiwo le dzɔdzɔe tegbee; fia nunyam, ne manɔ agbe.

¹⁴⁵Meyɔ wò tso dzi blibo me, Yehowa, ɖo tom; malé wò ɖoɖowo me ɖe asi.

¹⁴⁶Meyɔ wò, xɔ nam, ne malé ŋku ɖe wò ɖaseɖiɖiwo ŋu.

¹⁴⁷Meɖo ɣli, hafi ŋu nava ɖe le eme; wò nya la sinu dzɔm mele.

¹⁴⁸Nye ŋkuwo le te hafi zãdzɔɣiwo ɖo, bene made ŋugble le wò nyawo ŋu.

¹⁴⁹Ɖo to nye gbe le wò amenuveve la nu; Yehowa, gbɔ agbem le wò ɖoɖoawo nu.

¹⁵⁰Amesiwo le ŋukpenanuwɔwɔ yome tim la, gogo, wole adzɔge tso wò se la gbɔ.

¹⁵¹Yehowa, ètsɔ kpuiƒe, eye wò seawo katã nye nyateƒe.

¹⁵²Xoxoxo ke menya le wò ɖaseɖiɖiwo ŋu be, èɖo wo anyi tegbee.

¹⁵³Kpɔ nye hiã ɖa, eye naɖem, elabena nyemeŋlɔ wò se la be o.

¹⁵⁴Wɔ nye dzre, eye naɖem; gbɔ agbem le wò ŋugbedodo la nu.

¹⁵⁵Xɔname le aga tso ame vɔ̃ɖiwo gbɔ, elabena womebiaa wò ɖoɖowo ta sena o.

¹⁵⁶Wò nublanuikpɔkpɔ sɔ gbɔ, Yehowa, gbɔ agbem te wò ɖoɖoawo nu.

¹⁵⁷Yonyemetilawo kple nye ketɔwo de ha; ke nyemete ɖe aga tso wò ɖaseɖiɖiwo gbɔ o.

¹⁵⁸Mekpɔ ame mawɔnuteƒewo, eye wòvem be, womeléa ŋku ɖe wò nyawo ŋu o.

¹⁵⁹Kpɔe ɖa dzro, melɔ̃a wò seawo; Yehowa, gbɔ agbem le wò amenuveve la nu.

¹⁶⁰Wò nya ƒe taƒoƒo enye nyateƒe, eye wò ɖoɖo dzɔdzɔeawo li tegbee.

¹⁶¹Amegãwo ti yonyeme yakatsyɔ, eye nye dzi dzo nyanyanya le wò nya la ta.

¹⁶²Dzi le dzɔyem ɖe wò ŋugbedodo la ŋu, abe amesi kpɔ aboyonu geɖe ene.

¹⁶³Mele tu aʋatso, eye menyɔ ŋui; ke melɔ̃a wò se yia.

¹⁶⁴Mekafua wò zi adre le ŋkeke me, le wò ɖoɖo dzɔdzɔeawo ta.

¹⁶⁵Ŋutifafa gã le amesiwo lɔ̃a wò sea la si, eye nukiklia ɖeke meli na wo o.

¹⁶⁶Yehowa, mele mɔ kpɔm na wò xɔname, eye mewɔa wò seawo dzi.

¹⁶⁷Nye luʋɔ léa ŋku ɖe wò ɖaseɖiɖiwo ŋu, eye melɔ̃a wo vevie ŋutɔ.

¹⁶⁸Meléa ŋku ɖe wò seawo kple ɖaseɖiɖiawo ŋu, elabena nye mɔwo katã le ŋknwò me.

¹⁶⁹Yehowa, nye ɣli netu wò; fia nunyam le wò nya la nu.

¹⁷⁰Nye kokoƒoƒo nede ŋkuwò me, ɖem le wò ŋugbedodo la nu!

¹⁷¹Nye nuyiwo adudu kafukafu aƒo ɖi, elabena èfia wò ɖoɖowom.

¹⁷²Nye aɖe adzi ha le wò nya la ŋu, elabena wò seawo katã le dzɔdzɔe.

¹⁷³Na wò asi nakpe ɖe ŋunye, elabena metia wò seawo.

¹⁷⁴Yehowa, wò xɔname le dzroyem, eye wò se la enye nye dzidzɔ.

¹⁷⁵Nye luʋɔ nenɔ agbe, ne wòakafu wò, eye wò ʋɔnudɔdrɔ̃wo nekpe ɖe ŋunye.

¹⁷⁶Metra abe alẽ bubu ene; di wò dɔla, elabena nye ŋku medzo le wò seawo dzi o.