Read ewe Psalmowo 139 Bible Online

Psalmowo 139 - ewe bible

Psalmowo 139

¹Dawid ƒe ha na henɔ la. Yehowa, èdzro menye, eye nèdze sim.

²Enya nye anyinɔnɔ kple nye tsitretsitsi, eye nèdze si nye susuwo tso adzɔgedzɔgee ke.

³Edo nye azɔlizɔzɔ kple nye anyimɔmlɔ kpɔ, eye nye mɔwo katã le nyanya na wò.

⁴Elabena nyaa ɖeke mele nye aɖe dzi o, kpɔ ɖa, Yehowa, ènya wo keŋ.

⁵Etsɔm ɖe to me le megbe kple ŋgɔ, eye nèɖo wò asi dzinye.

⁶Nunya sia nye nuku nam akpa, ekɔ, nyemate ŋn anya ta le enu o.

⁷Afika madzo le wò gbɔgbɔ la gbɔ ayi, eye afika masi atso wò ŋku me ayi?

⁸Ne melia yi dziƒo la, èle afima, eye ne metsɔ tsiẽƒe wɔ mlɔnyeƒee ta, èle gama;

⁹ne metsɔ agudzedze ƒe aʋalawo dzoe, eye meɖanɔ atsiaƒu ƒe mlɔenu la,

¹⁰kpɔ ɖa, wò asi aɖakplɔm tso gama hã, eye wò nuɖusi além.

¹¹Ne mebe, viviti netsyɔm hã la, ekema zã azu kekeli anɔ ŋunye;

¹²viviti ke hã meɖo tsizi le ŋkuwò me o, eye zã me kɔ abe ŋkeke ene; viviti kple kekeli la ɖeka wole.

¹³Elabena wòe wɔ nye ayikuwo, eye nèkpɔ tanye le danye ƒe dɔme.

¹⁴Meda akpe na wò le alesi wowɔm nukutɔe la ta; wò dɔwɔwɔwo nye nukunu, eye nye luʋɔ dze si esia keŋ.

¹⁵Nye ƒuwo meɣla ɖe wò, esime wowɔm le ɣaɣlaƒe, eye wolɔ̃m ɖe wo nɔewo me le anyigba ƒe gogloƒe o.

¹⁶Esi menye ʋukɔe la, wò ŋkuwo kpɔm, eye woŋlɔ ŋkeke, siwo katã ava emegbe, siwo dometɔa ɖeke meli haɖe o la, ɖe wò agbalẽ me.

¹⁷Ke nye la, Mawu, wò susuwo xɔ asi nam ŋutɔ! Aleke woƒe xexlẽme mehesɔ gbɔe o!

¹⁸Ne mebe, maxlẽ wo la, wosɔ gbɔ wu ke! Ne menyo la, megale gbɔwò ko.

¹⁹Oo Mawu, ne nahawu ame vɔ̃ɖi la ɖe! Mi ŋutsu hlɔ̃dolawo, mite ɖa le gbɔnye!

²⁰Wo, amesiwo le nu ƒom le ŋuwò ɖe nu vlo wɔwɔ ŋu, eye wole ŋkɔwò yɔm ɖe aʋatsokaka ŋu, wo, amesiwo nye wò futɔwo.

²¹Yehowa, ɖe nyemalé fu amesiwo léa fu wò, eye nyemanyɔ ŋu amesiwo tsona ɖe ŋuwò la oa?

²²Mele fu wo gbidigbidi, futɔwo wozu nam.

²³Mawu, dzro menye, eye nadze si nye dzi, dom kpɔ, eye nadze si nye susuwo!

²⁴Eye ne èkpɔ be, fukpekpemɔ le ŋkunye me la, kplɔm to mɔ tegbeetɔ la dzi!