Read ewe Psalmowo 147 Bible Online

Psalmowo 147 - ewe bible

Psalmowo 147

¹Mikafu Yehowa, elabena kafukafuhadzidzi na mía Mawu la enye, eye wòvivina; kafukafu edzee.

²Yehowa tsoa Yerusalem, eƒoa Israel ƒe amesiwo woka hlẽ la, nu ƒu;

³eya, amesi ɖaa gbe le amesiwo ƒe dzi gbã la ŋu, eye woblaa woƒe abiwo.

⁴Eya, amesi ɖo xexlẽme na dzinuviwo, eye wòyɔa wo katã ŋkɔ.

⁵Mía Aƒetɔ la lolo, eƒe ŋusẽ tri akɔ, eye goléƒe mele eƒe nunya ŋu o.

⁶Yehowa léa hiãtɔwo ɖe asi, ke ebɔbɔa ame vɔ̃ɖiwo vaseɖe anyigba ke.

⁷Mixe akpedaha hena Yehowa, mitsɔ kasaŋkuwo ƒo ha na mía Mawu la;

⁸eya, amesi tsa alilikpowo xea dziŋgɔli ŋku me, ewɔa tsidzadza hena anyigba, eye wònana gbe miena ɖe towo dzi.

⁹Eya, amesi na nuɖuɖu lãwo kple akpaviãvi, siwo le xɔxlɔ̃m.

¹⁰Mekpɔa dzidzɔ le sɔ ƒe ŋusẽ ŋu o, eye ŋutsu ƒe ate medzea eŋu o.

¹¹Amesiwo vɔ̃a Yehowa la, ƒe nu dzea eŋu, amesiwo le eƒe amenuveve lalam.

¹²Yerusalem, kafu Yehowa; Zion, ɖo wò Mawu ɖe dzi.

¹³Elabena ewɔ wò agbo ƒe gametiwo sesĩe, eye wòyra viwòwo le mewò;

¹⁴eya, amesi na wò liƒowo ŋu fa, eye wòtsɔ lu ʋaʋã ɖi ƒoe na wò.

¹⁵Eya, amesi ɖo eƒe nya ɖe anyigba dzi, eye eƒe sedede ɖi ɖu;

¹⁶eya, amesi naa sno abe ɖetifu ene, eye wòwua míãtsi babla abe dzowo ene;

¹⁷eya, amesi tsɔa eƒe tsi babla dana kɔkɔkɔe; ameka anɔ te ɖe eƒe vuvɔ nu?

¹⁸Eɖo eƒe nya ɖa, eye wòna wolólo, ena eƒe ya ƒo, eye tsia sina lalala.

¹⁹Eɖe eƒe nya fia Yakob, eƒe ɖoɖowo kple kɔnuwo fia Israel.

²⁰Emewɔ alea na dukɔa ɖeke o, eye womenya eƒe kɔnuwo o. Mikafu Yehowa!