Read ewe Psalmowo 22 Bible Online

Psalmowo 22 - ewe bible

Psalmowo 22

¹Dawid ƒe ha na henɔ la, ne woadzi ɖe „Agudzedzezinɔ“ ƒe gbe ŋu.

²Nye Mawu, nye Mawu, nukaŋuti nègblẽm ɖi? Nye hũɖeɖe ƒe nyawo metsɔ ɖe nye xɔname gbɔ o.

³Nye Mawu, meyɔ wò le ŋkeke me, ke mètɔ nam o, eye le zã me, ke nyemekpɔ gbɔdzɔe o.

⁴Ke wò la, ele kɔkɔe, eye nèbɔbɔ nɔ Israel ƒe kafukafuwo dome gli.

⁵Ŋuwò mía fofowo ɖo ŋu ɖo, ŋuwò woɖo ŋu ɖo, eye nèxɔ na wo.

⁶Wòe wodo ɣli na, eye woɖe wo; ŋuwò woɖo ŋu ɖo, eye ŋu mekpe wo o.

⁷Ke nye la ŋɔ menye, menye amegbetɔ o; amewo ƒe alɔmeɖenu menye, eye dukɔ la ɖo vlom.

⁸Amesiwo katã kpɔm la, ɖu fewu le ŋunye, woke woƒe nuyiwo, eye woʋuʋu ta gblɔ be:

⁹Nefae na Yehowa, axɔ nɛ, eye wòaɖee, elabena eƒe nu nyo eŋu.

¹⁰Elabena wòe hem tso dɔ me, eye nèna menɔ ɖanye ƒe no nu bɔkɔɔ.

¹¹Wotsɔm gblẽ ɖe dziwò tso dɔ me ke, eye nye Mawu nenye tso danye ƒe dɔ me.

¹²Meganɔ adzɔge tso gbɔnye o, elabena xaxa tu aƒe; elabena xɔnametɔa ɖeke mele afi o.

¹³Nyitsu geɖewo de to ɖem, Basan ƒe nyitsuwo ƒo xlãm.

¹⁴Woke woƒe nu ɖe ŋunye abe dzata, si le xɔxlɔ̃m hele nu vuvum ene.

¹⁵Woƒom ɖe anyi abe tsi ene, nye ƒuwo katã dudu; nye dzi zu abe anyigba ene helólo ɖe dɔ me nam.

¹⁶Ami ƒu le ƒuto me nam abe sonugaglɛ ene, nye aɖe le ɖe nye veme, eye nètsɔm ɖo ku ƒe ʋuʋudedi me.

¹⁷Elabena avũwo ƒo xlãm, ame vɔ̃ɖiwo ƒe ha ɖe to ɖem, eye woku nye asiwo kple afɔwo.

¹⁸Mate ŋu axlẽ nye ƒuwo katã. Ke woawo kpɔe, eye wofɔ ŋku ɖe dzinye.

¹⁹Womã nye avɔwo ɖe wo nɔewo dome, eye wodzidze nu ɖe nye awu dzi.

²⁰Ke wò, Yehowa, meganɔ adzɔge o; nye ŋusẽ, afɔ netsɔ naxɔ nam!

²¹De nye luʋɔ tso yi nu, nye tenu ɖeka la tso avũwo si me.

²²Xɔm tso dzata ƒe nu me, eye naɖem tso tò ƒe dzowo nu.

²³Matsɔ wò ŋkɔ ade gbe ƒae na nɔvinyewo, eye makafu wò le amehawo dome be:

²⁴Mi amesiwo vɔ̃a Yehowa la, mikafui! Mi Yakob-ƒomeawo katã, mibui! Mi Israel-ƒomeawo katã, misi eƒe ŋku me!

²⁵Elabena medo vlo, eye menya ŋu hiãtɔ ƒe hiã o, meɣla ŋku me ɖee o, eye esi wodo ɣli nɛ la, eɖo to.

²⁶Gbɔwòe nye kafukafuha tso le ameha gãwo dome. Maxe nye adzɔgbeɖefe le amesiwo vɔ̃nɛ la ŋku me.

²⁷Hiãtɔwo aɖu nu aɖi ƒo; amesiwo biaa Yehowa ta sena la, nekafui! Agbe neɖo miaƒe dzi ŋu tegbee!

²⁸Anyigba ƒe mlɔenuwo katã aɖo ŋku edzi atró ɖe Yehowa ŋu, eye dukɔwo ƒe ƒomeawo katã ade ta agu ɖe ŋkuwò me.

²⁹Elabena Yehowa tɔ enye fiaɖuƒe la, eye wòle fia ɖum ɖe dukɔwo dzi.

³⁰Amesiwo katã da ami le anyigba dzi la, ade ta agu ɖe eŋku me, eye amesiwo katã aɖo agu ɖe ke me la, adze klo nɛ. Ke nye luʋɔ ya le agbe nɛ.

³¹Dzidzimeviwo asubɔe, eye megbeviwo axlẽ nya afia le Yehowa ŋu.

³²Woava atsɔ eƒe dzɔdzɔenyenye aɖe gbe ƒãe na dukɔ, si dzi ge woala la, be nyae wɔe de goe.