Read ewe Psalmowo 31 Bible Online

Psalmowo 31 - ewe bible

Psalmowo 31

¹Dawid ƒe ha na henɔ la.

²Yehowa, wòe mesi tso, megana ŋu nakpem akpɔ gbeɖe o! Tsɔ wò dzɔdzɔenyenye la ɖem!

³Ƒu to anyi ɖe ŋunye, ɖem asi tsɔtsɔe; zu agakpe, si nye sitsoƒe nam, kple mɔ̃ sesẽ, ne naxɔ nam!

⁴Elabena wòe nye nye agakpe kple nye mɔ̃ sesẽ, eye alé nye alɔnu akplɔm le wò ŋkɔ la ta,

⁵Àɖem le ɖɔ, si woɖo nam la me, elabena wòe nye nye sitsoƒe!

⁶Metsɔ nye gbɔgbɔ le asiwò me dem; Yehowa, eɖem, wò Mawu nuteƒetɔ.

⁷Melé fu amesiwo ku ɖe nu maɖinuwo ŋu la; ke nyea meɖo ŋu ɖe Yehowa ŋu.

⁸Matso aseye, eye dzi adzɔm le wò amenuveve ŋuti, le esi nèkpɔ nye hiã, eye nèlé ŋku ɖe nye luʋɔ ƒe xaxa ŋu ta;

⁹mètsɔm ɖe asi na futɔ la o, eye nèɖo nye afɔ teƒe keke.

¹⁰Ve nunye, Yehowa, elabena meɖo xaxa me, nuxaxa na nye ŋku, luʋɔ kple ŋutilã lé ayi.

¹¹Elabena nye agbe nu yi le konyifafa me kple nye ƒewo le hũɖeɖe me; nye vodada na nye ŋusẽ nu tsi, eye nye ƒuwo nyunyɔ.

¹²Mezu alɔmeɖenu na nye ketɔwo katã kple nye aƒelikawo vevie ŋutɔ; mezu bibi na nye ame nyanyɛwo, eye amesiwo kpɔam le kpɔdomee la, sina le nunye.

¹³Woŋlɔm be le dzi me abe ame kuku ene, eye medi ze gbagbã.

¹⁴Elabena mese ame geɖewo ƒe dalidodo be: „Ŋɔdzi nede to ɖee!“ Wode adaŋu kple wo nɔewo de ŋunye be, yewoaɖe nye agbe ɖa.

¹⁵Ke nye la, ŋuwò meɖo ŋu ɖo, Yehowa; megblɔ be, nye Mawu nènye.

¹⁶Asiwò me nye agbe me nyawo le, ɖem tso nye futɔwo kple yonyemetilawo si me!

¹⁷Na wò ŋku me naklẽ ɖe wò dɔla dzi, eye natsɔ wò amenuveve axɔ nam!

¹⁸Yehowa, megana ŋu nakpem o, elabena mele yɔwòm; ŋu nekpe ame vɔ̃ɖiwo, eye woƒe nu netɔ kpe le tsiẽƒe!

¹⁹Woade ga nu na aʋatsoka-nuyiwo, amesiwo gblɔa nya vlo ɖe ame dzɔdzɔe la ŋu le ɖaɖa kple vloɖoɖo me.

²⁰Wò dɔmenyo, si nètu ɖo na amesiwo vɔ̃a wo la, esi nèɖe fia amesiwo si wò tso le amegbetɔviwo ŋku me la, sɔ gbɔ loo!

²¹Eɣla wo ɖe wò ŋku me ƒe ɣaɣlɛƒe tso amewo ƒe aglãdzedzewo nu, eye nèɣla wo ɖe agbadɔ me tso aɖeʋawɔwɔ nu.

²²Woakafu Yehowa, elabena eɖe eƒe amenuveve fiam nukutɔe le ɖu sesẽ me.

²³Esi dzi ɖe le ƒonye la, nyea megblɔ be: Woɖem ɖa le wò ŋku ta: ke èse nye kokoƒogbe, esi medo ɣli na wò.

²⁴Milɔ̃ Yehowa, mi eƒe ame kɔkɔewo katã; Yehowa kpɔa anukwaretɔwo ta, ke eɖoa teƒe na dadalawo wòsɔa gbɔ.

²⁵Misẽ ŋu, eye milé dzi ɖe ƒo, mi amesiwo katã kpɔa mɔ na Yehowa la!