Read ewe Psalmowo 51 Bible Online

Psalmowo 51 - ewe bible

Psalmowo 51

¹Dawid ƒe ha na henɔ la,

²esime wode Batseba gbɔ, eye nyagblɔɖila Natan va egbɔ.

³Mawu, ve nunye le wò dɔmenyo la nu, eye le wò nublanui-kpɔkpɔ sɔgbɔ la nu tutu nye dzidadawo ɖa!

⁴Le tsi nam keŋkeŋ tso nye vodada me, eye naklɔ ŋunye tso nye nuvɔ̃ me!

⁵Elabena nye dzidadawo la, medze si wo, eye nye nuvɔ̃ le ŋkunye me daa?

⁶Wò ɖeka ɖeɖe ko ŋuti mewɔ nuvɔ̃ ɖo, eye nusi nye vɔ̃ le ŋkuwò me la, mewɔ, ne tɔwò nadzɔ le wò nuƒoƒo me, eye ŋuwò nadza le wò ʋɔnudɔdrɔ̃ me.

⁷Kpɔ ɖa, voɖaɖa me wodzim ɖo, eye nuvɔ̃ me danye fɔ nye fu ɖo!

⁸Kpɔ ɖa, nyateƒe, si le dzi me la, nèdina, eyata ɖe nunya fiam le adzame!

⁹Tsɔ akutsa klɔ nye nuvɔ̃ ɖa, ne ŋunye naɖi; le tsi nam, ne matu tititi wu ɖetifu!

¹⁰Na mase dzidzɔ kple aseyetsotso, ne nye ƒu, siwo nèŋe la, nagli kple dzidzɔ!

¹¹Ɣla wò mo ɖe nuvɔ̃nyewo, eye tutu nye vodadawo katã ɖa!

¹²Mawu, wɔ dzi dzadzɛa ɖe nam, eye nade gbɔgbɔ yeye, si li ke la, menye!

¹³Megatsɔm ƒu gbe le ŋkuwò me o, eye megaxɔ wò gbɔgbɔ kɔkɔe la le asinye o!

¹⁴Gatsɔ wò xɔname do dzidzɔ nam, eye natsɔ gbɔgbɔ, si me lɔlɔ̃nu le le, lém ɖe asi!

¹⁵Mafia wò mɔ dzidalawo, eye nuvɔwɔlawo atrɔ tame ɖe ŋuwò.

¹⁶Mawu, nye xɔname ƒe Mawu, ɖem tso hlɔ̃fe me, ekema nye aɖe atso aseye le wò dzɔdzɔenyenye ŋuti!

¹⁷Aƒetɔ, ke nye nuyiwo, eye nye nu aɖe gbe ƒa wò kafukafu!

¹⁸Elabena mèdia akpedavɔsa o, anye ne mana wò; numevɔsa hã medzea ŋuwò o!

¹⁹Vɔsewo na Mawu wonye gbɔgbɔ, si wote de anyi; Mawu, màdo vlo dzi gbagbã, si tugu la o.

²⁰Le wò amenuveve la nu wɔ nyui na Zion; ɖo Yerusalem ƒe gliwo!

²¹Ekema dzɔdzɔenyenye-vɔsawo, numevɔsa kple vɔsa blibo adze ŋuwò; ekema woatsɔ nyitsuwo asa vɔe le wò vɔsamlekpui la dzi.