Read ewe Psalmowo 69 Bible Online

Psalmowo 69 - ewe bible

Psalmowo 69

¹Dawid tɔ na henɔ la, ne woadzi ɖe „Dzogbenya“ ƒe gbe nu.

²Mawu, xa nam, elabena tsi de nye luʋɔ gbɔ!

³De ƒe agbi mim, afɔɖoƒe meli o, mege ɖe tɔ ƒe gogloƒe, eye tsi ɖɔ va to dzinye.

⁴Meɖo ɣli nu ti kɔ nam, eye nye gbe me xe, mele mɔ kpɔm na nye Mawu ʋuu wòti nye ŋkuwo.

⁵Amesiwo lém ɖe ke me yakatsyɔ la, sɔ gbɔ wu nye taɖa, eye nye futɔ alakpadala, siwo be, yewoagblẽm la, ɖe ha ŋutɔ, nusi nyemeda adzoe o la, teƒe wobe, maɖo.

⁶Mawu, enya nye bometsitsi, eye nye fɔɖiɖiwo meɣla ɖe wò o.

⁷Aƒetɔ. Yehowa Zebaot, ŋu megakpe amesiwo le mɔ kpɔm na wò la, le tanye o! Israel ƒe Mawu, amesiwo dia wò la, ƒe mo megatsi dã o!

⁸Elabena tawò mele vlododo tsom, eye ŋukpe tsyo nye mo ɖo.

⁹Mezu amedzro na nɔvinyeŋutsuwo, kple ame manyamanya na danyeviwo.

¹⁰Elabena ŋuʋaʋã ɖe wò aƒe ŋu mim, eye amesiwo le vlo dom wò la, ƒe vlodoame va dzinye.

¹¹Mefa avi, eye metsi nu dɔ, ke ŋukpe ko wozu nam.

¹²Metsɔ akpanya wɔ nye avɔe, eye mezu hamelo na wo.

¹³Amesiwo bɔbɔ nɔ agbo nu la, le nu ƒom le ŋunye, eye ahamulawo le ha dzim deyem.

¹⁴Ke nyea medo gbe ɖa na wò, Yehowa, le amenuveɣi la; Mawu, tsɔ wò xɔname nyateƒetɔ la ɖo tom le wò amenuveve sɔgbɔ la nu!

¹⁵Ɖem tso agbi me, ne nyemagayi to o, ne mado tso nye ketɔwo si me kple tɔ goglowo me;

¹⁶ne tsi magaɖɔ ato tanye o, ne gogloƒe magamim o, eye vudo magaxe eƒe nu ɖe nunye o!

¹⁷Ɖo tom, Yehowa, elabena wò amenuveve la nyo; le wò nublanuikpɔkpɔ sɔgbɔ la nu trɔ ɖe ŋunye!

¹⁸Megaɣla wò mo ɖe wò dɔla o, elabena ŋɔdzi lém, netsɔ naɖo tom!

¹⁹Te ɖe nye luʋɔ ŋu, eye naxɔe; le nye futɔwo ta dem!

²⁰Enya nye vlododo, ŋukpe kple dzo; ŋkuwò me nye ketɔwo katã le.

²¹Vlododo gba nye dzi, eye wode dɔlã me nam; mekpɔ mɔ na babadoname, ke dzodzroa, eye na akɔfalawo, gake nyemekpɔ ɖeke o.

²²Wotsɔ veve nam be, maɖu, eye esi tsikɔ wum la, wokpe aha tsitsi nam.

²³Woƒe kplɔ̃ netrɔ zu ɖɔ na wo, eye wòanye mɔ̃ na amesiwo ɖe dzi ɖi!

²⁴Woƒe mo netsyɔ zi, ne womagakpɔ nu o, eye na woƒe ali nanɔ ʋaʋãm tegbee!

²⁵Trɔ wò dɔmedzoe kɔ ɖe wo dzi, eye wò dziku heliheli nelé wo!

²⁶Woƒe agbletawo nezu aƒedo, eye amea ɖeke meganɔ woƒe agbadɔwo me o!

²⁷Elabena wole amesi nèƒo la, yome tim, eye amesi ŋu nède abi la, ƒe vevesesewo ŋu wole nu ƒom le.

²⁸Tsɔ fɔɖiɖi ƒu fɔɖiɖi dzi na wo, eye megana woade wò dzɔdzɔenyenye la gbɔ o.

²⁹Woatutu wo ɖa le agbalẽ la me, eye womegaŋlɔ wo kpe de ame dzɔdzɔewo ŋu o!

³⁰Ke nyea mele nublanui me, eye veve ɖi tsi de ŋunye, gake Mawu, wò xɔname akɔm ɖe dzi.

³¹Matsɔ hadzidzi akafu Mawu ƒe ŋkɔ, eye matsɔ akpedada ado bubui.

³²Eya adze Yehowa ŋu wu nyitsu, si dzo le eta, eye eƒe afɔkli me fe.

³³Hiãtɔwo akpɔe, eye woɔkpɔ dzidzɔ. Mi amesiwo le Mawu dim la, miaƒe dzi negbɔ agbe!

³⁴Elabena Yehowa ɖoa to ame dahewo, eye medoa vlo eƒe gatɔwo o.

³⁵Dziƒo kple anyigba, atsiaƒu kpakple nusiwo katã ʋãna le eme, mikafui!

³⁶Elabena Mawu axɔ na Zion, eye wòatso Yuda-duwo, ne woana afima, eye woanye wo tɔ.

³⁷Eƒe dɔla ƒe viwo atsɔe anyi domee, eye amesiwo laa eƒe ŋkɔ la, woana eme.