Read ewe Psalmowo 78 Bible Online

Psalmowo 78 - ewe bible

Psalmowo 78

¹Asaf ƒe nufiameha. Nye dukɔ, mise nye nufiame; miƒu le anyi ɖe nye nu me nyawo ŋu!

²Make nye nu kple lododowo, eye mate blemadzowo.

³Nusi miese, míenya, eye mía fofowo tsɔ da xo na mi la,

⁴míaɣlae de wo viwo o, eye míaxlẽ Yehowa ƒe ŋkɔxɔxɔ kple eƒe ŋusẽ kpakple nukunu, siwo wòwɔ la, afia megbeviwo.

⁵Etu se anyi ɖe Yakob, eye wòɖo nufiame anyi de Israel, siwo ŋu wòde se na mía fofowo le be, woafia wo wo viwo,

⁶ne woƒe ƒome megbetɔwo, ɖevi, siwo dzi ge woala la, nanyae, eye woatso ɖe tsitre axlẽe afia wo viwo,

⁷ne woaɖo ŋu de Mawu ŋu, eye womaŋlɔ Mawu ƒe nuwɔwɔwo be o, ke boŋ woalé eƒe sewo me de asi,

⁸ne womaganɔ abe wo fofowo, ƒome sẽto dzeaglã, ƒome, si ƒe dzi meli ke o, eye eƒe gbɔgbɔ meku ɖe Mawu ŋu le nyateƒe me o la ene o.

⁹Efrayim-viwo, aŋutrɔdala, siwo bla akpa la, de megbe le aʋawɔgbe;

¹⁰womelé Mawu ƒe nubabla la me de asi o, eye wogbe zɔzɔ de eƒe seawo nu,

¹¹eye woƒe ŋku dzo le eƒe nuwɔwɔwo kple eƒe nukunu, siwo wòna wokpɔ la dzi.

¹²Ewɔ nukunuwo le wo fofowo ŋku me le Egipte-nyigba dzi, le Zoan-tagba.

¹³Emã atsiaƒu me ɖe eve, eye wòna woto eme, ena tsiwo dzɔ kã abe gli ene,

¹⁴Ŋkeke me la etsɔ alilikpo kplɔ woe, eye le zã blibo la me la etsɔ dzo keklẽ.

¹⁵Efe agakpe me le gbedzi, eye wòna tsi wo kpaŋkpaŋ wono.

¹⁶Ena tsi, si tso agakpewo me, eye tsi do bababa abe tɔsisi gãwo ene.

¹⁷Ke woyi dzi gawɔ nuvɔ̃ ɖe eŋu, eye wodze aglã ɖe dziƒoʋitɔ la ŋu le kuɖinyigba dzi.

¹⁸Wote Mawu kpɔ le woƒe dziwo me hebia nuɖuɖu na woƒe nudzodzro,

¹⁹eye woƒo nu ɖe Mawu ŋu gblɔ bena: Ɖe Mawu ate ŋu aɖo kplɔ̃ de gbedzi loo?

²⁰Kpɔ ɖa, eƒo agakpe, tsi do, eye tɔʋuwo si bababa; ɖe wòate ŋu ana abolo alo lã hã eƒe dukɔ loo?

²¹Eyata esi Yehowa see la, dzi kui, dzo bi de Yakob ŋu, eye dɔmedzoe de dzi ɖe Israel ŋu.

²²Elabena womexɔ Mawu dzi se o, eye womeɖo dzi ɖe eƒe xɔname ŋu o.

²³Eye wòde se na alilikpowo le dzi me, enu dziƒo nu,

²⁴eye mana dza, ne woaɖu; ẽ, dziƒobli wòna wo,

²⁵mawudɔlawo ƒe abolo amegbetɔ ɖu, eye wòna nuɖudu woɖu ɖi ƒo.

²⁶Ena ɣedzeƒeya ƒo le dziƒo ŋu, eye wòtsɔ eƒe ŋusẽ kplɔ dzieheya vɛ.

²⁷Ena lã dza ɖe wo dzi abe ʋuʋudedi ene kple xewo abe ƒutake ene.

²⁸Ena woge dze woƒe asaɖa titina ƒo xlã woƒe nɔƒewo.

²⁹Ale wuɖui ɖi ƒo taŋ, eye wòwɔ woƒe dzodzro dzi na wo.

³⁰Woƒe nudzodzro la nu mekpɔ yi haɖe o, eve woƒe nuɖuɖu la gale nu me na wo ko,

³¹tete Mawu ƒe dɔmedzoe de dzi ɖe wo ŋu, ewu amewo le woƒe amidalawo dome, eye wòƒo Israel-ɖekakpuiwo ƒu anyi.

³²Ke to nusiawo katã gbɔ hã wogawɔ nuvɔ̃ yi dzi, eye womexɔ eƒe nukunuwo dzi se o.

³³Eyata wòna woƒe ŋkekewo bu ɖe gbahlaya me kple woƒe ƒewo ɖe ŋɔdzi me.

³⁴Ne ewu wo la, wobiaa ete sena, eye wotrɔna hedia Mawu;

³⁵woɖoa ŋku edzi be, Mawue nye yewoƒe agakpe, eye Mawu, dziƒoʋitɔ la, enye yewoƒe xɔnametɔ.

³⁶Wovivi nume nɛ kple woƒe nu, eye wotsɔ woƒe aɖe da alakpa nɛ;

³⁷ke woƒe dzi meku de eŋu tsehe o, eye womewɔ eƒe nubabla dzi le nyateƒe me o.

³⁸Ke eya la nublanuikpɔla wònye, etsɔa vodada kena, eye metsrɔ̃a ame o; eɖoa asi eƒe dɔmedzoe dzi zi geɖe, eye meɖea esi le eƒe dziku katã ŋu o.

³⁹Eɖoa ŋku edzi be, ŋutilã wonye, ƒuƒu, si yina, eye megatrɔna gbɔna o la, wonye.

⁴⁰Zi nenie womehedze aglã ɖe eŋu le gbeadzi, eye womedo dziku nɛ le gbedadaƒo o!

⁴¹Wole Mawu tetekpɔ dzi ɖaa, eye wodo dziku na Israel ƒe kɔkɔetɔ la.

⁴²Womeɖo ŋku eƒe asi dzi le gbesigbe wòɖe wo tso ketɔ la si me,

⁴³esime wòwɔ eƒe dzesiwo le Egipte kple eƒe nukunuwo le Zoan-tagba la o.

⁴⁴Ene woƒe tɔsisiwo trɔ zu ʋu, eye womete ŋu nowoƒe tɔʋuwo o.

⁴⁵Eɖo togbatowo ɖe wo dome woɖu wo, kple ekpɔkplɔwo wogblẽ wo.

⁴⁶Etsɔ woƒe numiemiewo na ʋetrawo kple woƒe agblemenuwo na ʋetsuviwo.

⁴⁷Eto woƒe weinkawo nyanyanya kple dzikpe, eye woƒe gbotiwo kple ketsi.

⁴⁸Etsɔ woƒe lãwo na dzikpe kple woƒe lãhawo na dzikedzo.

⁴⁹Eɖo eƒe dɔmedzoe heliheli, nyanyrã, dziku kple xaxa ɖe wo, siwo nye dɔla vɔ̃ɖiwo ƒe ha.

⁵⁰Eɖe mɔ na eƒe dɔmedzoe, meɖe woƒe luʋɔ tso ku nu o, eye wòtsɔ woƒe agbe de asi na ɖɔvɔ̃.

⁵¹Eye wòwu woƒe ŋgɔgbeviwo katã le Egipte, woƒe ŋuse ƒe ŋgɔgbeawo le Xam ƒe agbadɔwo me.

⁵²Ena eƒe dukɔ ho abe alẽwo ene, eye wòkplɔ wo le gbedzi abe lãhawo ene.

⁵³Ekplɔ wo dedie, be womevɔ̃ o; ke woƒe tutɔwo la atsiaƒu nyẽ tsyɔ wo dzi.

⁵⁴Eye wòkplɔ wo va eƒe anyigba kɔkɔe la dzi, va to, si eƒe nuɖusi xɔ la gbɔe.

⁵⁵Enyã dukɔwo le wo ŋgɔ, eye wòdzidze nu ɖe edzi na wo, ne wòanye wo tɔ, eye Israel-toawo nɔ woƒe agbadɔwo me.

⁵⁶Ke wote Mawu, dziƒoʋitɔ la kpɔ, wodze aglã, eye womelé eƒe seawo me ɖe esi o.

⁵⁷Wote ɖe megbe, eye womeɖi anukware o abe wo fofowo ke ene, woƒo asa abe dati doagblɔ ene.

⁵⁸Wotsɔ woƒe nuxeƒewo do dziku nɛ, eye woƒe legbawo wotsɔ do adãe.

⁵⁹Mawu see, dzi kui, egbe Israel keŋkeŋ,

⁶⁰eye wògblẽ nɔƒe, si le Silo, agbadɔ, si wòtu ɖe amegbetɔwo dome la ɖi.

⁶¹Etsɔ eƒe ŋusẽ de aboyo me, eye wòtsɔ eƒe atsyɔ̃ɖoɖo de asi na ketɔ te

⁶²Etsɔ ete dukɔ de asi na yi, eye dzi kui ɖe eƒe ɖomenyinu ŋu.

⁶³Dzo fiã eƒe ɖekakpuiwo, eye womedzi srɔ̃ɖeha na eƒe ɖetugbiwo o.

⁶⁴Eƒe nunɔlawo tsi yi nu, eye avi bu ɖe eƒe ahosiwo.

⁶⁵Tete Aƒetɔ la nyɔ abe alɔ̃dɔla ene, abe kɔlẽtɔ, si wein na wòle aseye tsom ene,

⁶⁶eye wònyã eƒe futɔwo ɖe megbe; ŋukpe mavɔe wòdo wo.

⁶⁷Ke edo vlo Yosef ƒe agbadɔ, eye metia Efrayim-to la o,

⁶⁸ke boŋ etia Yuda-to la, Zion-to, si wòlɔ̃na.

⁶⁹Eye wotu eƒe kɔkɔeƒe la abe dziŋgɔli ene, abe anyigba, si gɔme wóɖo anyi tegbee ene.

⁷⁰Etia eƒe dɔla Dawid, eye wòkplɔe mo alẽkpɔwo gbɔe;

⁷¹eɖee le alẽ vinɔwo yome, ne wòakplɔ ele dukɔ Yakob kple eƒe domenyinu Israel.

⁷²Ekpɔ wo dzi le eƒe dzi dzɔdzoe nu, eye wòtsɔ asi dzeaɖaŋu kplɔ woe.