Read ewe Psalmowo 81 Bible Online

Psalmowo 81 - ewe bible

Psalmowo 81

¹Asaf tɔ na henɔ la, ne woadzi ɖe Gat-viwo tɔ nu.

²Migli kple dzidzɔ ɖe Mawu, si nye míaƒe ŋusẽ la ŋu, eye mitso aseye ɖe Yakob ƒe Mawu la ŋu!

³Mixe ha, mina axatsɛwo, gakasaŋku kple saŋku viviwo naɖi!

⁴Miku kpẽ le dzinu yeye dzi, eye ne dzinu sɔ tegblẽ le míaƒe ŋkekenyuieɖugbe!

⁵Elabena esia nye ɖoɖo na Israel kple Yakob Mawu la ƒe kɔnu.

⁶Esime wòho de Egipte-nyigba ŋu la, etsɔe wɔ see na Yosef. Gbe, si nyemenya o la, di mese be:

⁷Meɖe agba ɖa le eƒe abɔta, eye eƒe asi ɖe ɖa le tsikpo ŋu.

⁸Eyɔm le xaxa me, eye mexɔ na wò, meɖo to wò le dziɖegbelilikpo me, eye medo wò kpɔ le dzrewɔtsi la gbɔ. Sela.

⁹Nye dukɔ, see; Israel, maxlɔ̃ nu wò, be aɖo tom loo!

¹⁰Mawu tutɔa ɖeke meganɔ asiwo o, eye megado gbe ɖa na mawu bubuwo o!

¹¹Nyee nye Yehowa, wò Mawu, si kplɔ wò tso Egipte-nyigba dzi. Ke wò nu baa, ne made nu eme na wò taŋ!

¹²Ke nye dukɔ meɖo to nye gbe o, eye Israel melɔ̃ edzi nam o.

¹³Eyata meɖe asi le wo ŋu ɖe woƒe dzimesesẽ la me, ne woazɔ ɖe woawo ŋutɔ ƒe aɖaŋuɖoɖo la nu.

¹⁴Oo, ɖe wònye ɖe nye dukɔ ɖo tom, eye Israel zɔ nye mɔwo dzi la,

¹⁵anye ne asusɔ vie ko mabɔbɔ woƒe futɔwo ɖe anyi, eye matrɔ nye asi ɖe wote ketɔwo ŋu;

¹⁶anye ne Yehowa ƒe adikãtɔwo avivi nu me na wo, eye woƒe ɣeyiɣi anɔ anyi tegbee;

¹⁷anye ne matsɔ tu ʋaʋa anyi woe, eye mana woaɖi ƒo kple kpeto me nyitsi.