Read ewe Psalmowo 94 Bible Online

Psalmowo 94 - ewe bible

Psalmowo 94

¹Mawu hlɔ̃biala, Yehowa, Mawu hlɔbiala, do!

²Wò anyigba ƒe ʋɔnuɖrɔ̃la, kɔ ɖokuiwò dzi, eye naɖo dadalawo ƒe nuwɔwɔ teƒe na wo!

³Ɣekaɣie, Yehowa, ɣekaɣi ame vɔ̃diwo atso aseye ase ɖo?

⁴Wole nuƒoƒo yrom hele nya tovowo gblɔm; ame vɔ̃ɖiwo katã le ɖadzra ɖam.

⁵Yehowa, wogbã wò dukɔ la nyanyanya, eye wole wò domenyinu la ɖe anyi,

⁶wowu ahosiwo kple amedzrowo, eye woɖo hlɔ̃ ɖe tsyɔeviwo ŋu

⁷hele gbɔgblɔm be: Yehowa mele ekpɔm o, Yakob ƒe Mawu la medze sii o!

⁸Mi gegeme, siwo le dukɔ la dome, midze sii, eye mi bometsilawo, ɣekaɣi miadze nunya?

⁹Eya, amesi wɔ to, ɖe mase nu oa? Eya, amesi wɔ ŋku, ɖe makpa nu oa?

¹⁰Eya, amesi hea to na dukɔwo, ɖe mahe to oa? Eya, amesi fia nunya amegbetɔwoa?

¹¹Yehowa nya amegbetɔwo ƒe susuwo be, dzodzro wonye.

¹²Yehowa, woayra ŋutsu, si nèhe to na, eye nètsɔ wò se le fia nui,

¹³ne nana gbɔdzɔe le dzɔgbevɔ̃eɣi, si me woɖea yɔɖo na ame vɔ̃ɖiwo ya.

¹⁴Elabena Yehowa magbe eƒe dukɔ la o, eye magblẽ eƒe domenyinu la di o,

¹⁵Elabena ʋɔnuɖɔɖrɔ̃ agatrɔ ɖe dzɔdzɔenyenye nu, eye amesiwo katã ƒe dzi to mɔ ɖeka la, aku ɖe eŋu.

¹⁶Ameka atso ɖe ame vɔ̃ɖiwo ŋu nam, eye ameka ado ɖe nu vɔ̃ɖi wɔlawo ŋu ɖe nunye?

¹⁷Ɖe menye Yehowa ye xɔ nam o la, anya ne eteƒe makpɔ adidi hafi ɖoɖoe nazi le nye luʋɔ ŋu le tsiẽƒe o.

¹⁸Ne mele gbɔgblɔm be, nye afɔ le ʋaʋãm la, Yehowa, wò amenuveve léam ɖe asi.

¹⁹Mele ŋugble geɖe dem le nye dzi me, ke wò akɔfaname doa dzidzɔ na nye luʋɔ.

²⁰Ɖe gbegblẽ ƒe zikpui, si tsoa hiãkame ɖoa anyi ɖe sea teƒe la, ade ha kpliwòa?

²¹Wode ha bibibi ɖe ame dzɔdzɔe la ƒe luʋɔ ŋu, eye wobu fɔ ʋu maɖifɔ.

²²Ke Yehowa enye nye mɔ sesẽ, eye nye Mawu enye nye sitsoƒe ƒe aga.

²³Ana woƒe dzɔgbevɔ̃e natrɔ va wo dzi, eye wòatsɔ woawo ŋutɔ ƒe nu vɔ̃ɖi wɔwɔ atsrɔ̃ woe; Yehowa, mía Mawu la, atsrɔ̃ wo.