Read ewe Lododowo 1 Bible Online

Lododowo 1 - ewe bible

Lododowo 1

¹Israel-fia Salomo, Dawid vi la, ƒe lododowo nye esia

²ne woadze nunya kple amehehe, eye woase nuƒoƒo nunyatɔwo gome,

³ne woaxɔ amehehe, si fiaa gɔmesese ame, dzɔdzɔenyenye, nu dzɔdzɔe wɔwɔ kple nuteƒewɔwɔ na ame ɖokui;

⁴ne gegemewo nadze aɖaŋu, eye ɖekakpulwo nadze si nu, eye woabu tame;

⁵ne nunyala nasee, eye wòadzi eƒe nunya ɖe dzi, eye mɔ sɔsɔe nasu nugɔmesela si;

⁶ne woase lododowo, abebubuwo, nunyalawo ƒe nyawo kple adzowo gɔme.

⁷Yehowa-vɔvɔ̃ enye sidzedze ƒe gɔmetoto; ke bometsilawo doa vlo nunya kple amehehe.

⁸Vinye, se fofowò ƒe amehehe, eye megagblẽ ɖawò ƒe nufiame ɖi o;

⁹elabena seƒoƒotsihe nyui wonye na wò la kple kɔgɛ na wò kɔ.

¹⁰Vinye, ne nuvɔ̃wɔlawo le nuwò blem la, megalɔ̃ edzi o!

¹¹Ne wogblɔ be: Yi kpli mi, míade xa ɖe ʋukɔkɔɖi ŋu, eye míanɔ adeklo dzi ɖe ame maɖifɔ ŋu naneke mawɔmawɔe,

¹²míami wo agbagbe abe tsiẽƒe ene,

¹³míaƒe asi asu nu vevi vovovowo dzi, eye míatsɔ aboyonu ayɔ míaƒe xɔwoe,

¹⁴nana tasɔsɔ ɖeka me kpli mi, eye akplo ɖeka nana mí katã mía si la,

¹⁵ekema vinye, megazɔ ma ɖeka dzi kpli wo o, eye nahe wo afɔ ɖe megbe tso wo toƒe wo.

¹⁶Elabena woƒe afɔwo le tsɔtsɔm ɖe vɔ̃ɖiwɔwɔ ŋu, eye wole abla ɖem, be woakɔ ʋu ɖi.

¹⁷Elabena dzodzroe woɖoa mɔ̃ ɖi le xewo katã ŋku me.

¹⁸Woawo la woawo ŋutɔ ƒe ʋu ŋue wole xa ɖem ɖo, eye woawo ŋutɔ ƒe agbe ŋue wole adeklo dzi ɖo.

¹⁹Alea wòanɔ na amesiwo katã le viɖe madzɔmadzɔ yome tim lae; aɖe ekpɔlawo ƒe agbe ɖa.

²⁰Nunya le ɣli dom le kpɔdomee, eye wòkɔ eƒe gbe dzi le ablɔwo me,

²¹ele ɣli dom le kpɔdomeewo ƒe dzogoe, siwo dzi zi le, kple agbowo nu, du blibo la katã me wòle eƒe nyawo gblɔm le be:

²²Ɣekaɣi mi gegemewo míalɔ̃ bometsitsi, mi fewuɖulawo miakpɔ dzidzɔ le fewuɖuɖu ŋu, eye mi bometsilawo mialé fu sidzedze ase do?

²³Mitrɔ kɔ ɖe nye mokaname ŋuti. Kpa ɖa, mana nye gbɔgbɔ nado bɔbɔbɔ, eye mana miadze si nye nyawo.

²⁴Esi mele ame yɔm, eye miegbe, meke nye abɔwo, eye amea ɖeke melé ŋku ɖe eŋu o,

²⁵míedo toku nye aɖaŋuɖoɖowo katã, eye miegbe nye mokaname la,

²⁶eyata nye hã mako nu le miaƒe dzɔgbevɔ̃e ŋu, eye maɖe alɔme, ne ŋɔdzi xa aƒe na mi,

²⁷ne ŋɔdzi xa aƒe na mi abe dziya ene, eye miaƒe dzɔgbevɔ̃e do abe ahom ene; ne hiã kple xaxa va mia dzi.

²⁸Ekema woayɔm, eya nyematɔ o; woadim, ke womakpɔm o.

²⁹Le esi wolé fu sidzedze, eye womedo Yehowa-vɔvɔ̃ o,

³⁰le esi womelɔ̃ ɖe nye aɖaŋuɖoɖo dzi o, eye woɖo vlo nye mokanamewo katã ŋuti la,

³¹eyata woaɖu woƒe zɔzɔme ƒe kutsetsewo, eye woƒe aɖaŋuɖeɖewo neɖi ƒo na wo.

³²Elabena gegemewo ƒe godzedze wua woawo ŋutɔwo, eye bometsilawo ƒe anyinɔnɔ bɔkɔɔ tsrɔ̃a wo.

³³Ke amesi ɖoa tom la, anɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le eƒo o.